NKÔLAN 32 - Bible en langue Bulu

Eveʼela nyak mboon a mvot

¹ Eyoñe bôt be yeneya na Môze a boya te jiʼa bulan e nkôle si, ane be nga sulane vôm Aron a nga too a jô nye na: Kôlôʼô si a bo bia bezambe ba ye wulu ôsu viangan, amu Môze, nyô a nga bo na bi bet a kôlô Ejipte; bi nji yem jam e kuiya be nye.

² Nde Aron a nga jô be na: Vaʼane bimvônga bi mvot bi ne binga benan melo, a bobefam benan a bobebinga benan, a zuane ma bie.

³ Ane bôte bese be nga vaa bimvônga bi mvot bi nga too be melo a zu ve bie Aron.

⁴ Ane a nga nyoñe mvot mo map, a nga nyemé nye nduan a kôme mone nyak. Nde be nga jô na: A Israél! Tame yene bezambe be nga soo bia Ejipte.

⁵ Eyoñ Aron a nga yene jame di ane a nga lôñe ataʼa metunaʼa ôsu vié a yôtane na: A akiti, abôk da ye bo mfaʼa duma Nti.

⁶ Tyé kpwaa, be nga kôlô si ndibe ntyé, a ve mimvean mi ne mingumba, a liti mimvean ya nlatane ngbwa. Ane bôt be nga tabe si a di a nyu; ane be nga kôlô si a bo mevak.

⁷ Ane Nti a nga jô Môze na: Boʼo avôle ya sis, amu bôt ô nga soo be Ejipte be boya nsem.

⁸ Be jiʼaya liʼi zen me nga liti be; be boya bebien mone nyak a mvot é ne nyeman, be kuteya meboñ si ôsu vié, a be veya mimvean, a be jôya na: A Israél! Tame yen bezambe be nga soo wo Ejipte.

⁹ Nde Nti a nga jô Môze na: Me lôô na bôte ba be ne bôt be ne melo abui.

¹⁰ Eyoñ ji jôkéʼé ma! Ayaa dam da ye yôñe be be, a ma zu mane jiane be; ve ma ye bo wo beta ayoñe bôt.

¹¹ Ane Môze a nga yeʼelane Nti, Zambe wé, a jô na: Amu jé ayaa dôé, a Nti, da ye yôñe nyôle bôte bôé, mbe ô nga soo be Ejipte a beta ngul ése, a wo ô ne éwôlô?

¹² Amu bôte ya Ejipte ba ye jô na, a nga vaa be na be tôbane bidim, na a mane wôé be e minkô, a mane jiane be si nyô? Bulaʼan mvus mfaʼa ya ayaa dôé, jôbaʼan bidim ya bôte bôé!

¹³ Simesaʼan Abraham, Izak a Israél, bebo bisaé bôé, mbe ô nga kane ngana be womiene na, ma ye fôle mvoñe jenan ane ateté ya yôp, ma ye ve mvoñ jenan si nje me nga kobô na, ja ye bo énjab nnôm éto.

¹⁴ Nde Nti a nga jôban bidim a nga kobô na a ye bibi bôte bé.

¹⁵ Ane Môze a nga bulane nkôle si a bili bifase mekoʼo mo, bi too ntilan mekuʼu mebaane li a li.

¹⁶ Bifase mekoʼo bite bi mbe ésaé Zambe, a ntilan ô mbe fe wu Zambe nkpwelan.

¹⁷ Yasua a nga wôʼô tyiñ bôt be mbe be yôtaʼan, nde a nga jô Môze na: Ma wôʼô zôʼé bita e minkan.

¹⁸ Môze na: A nji bo zôʼé jia ya ndañan nge nyô ya ñwuane ébôm: Ma wôʼô ve jia.

¹⁹ Eyoñ be nga kui minkan, nde be nga yene mone nyak a mebôk . Ane ayaa Môze e nga yôñ; nde a nga wua mekoʼo a nga bili si a bôé me nkôle si.

²⁰ Ane a nga nyoñ mone nyak be nga bo, a diʼi nye nduan, ndub ya été, a nga miam je mendim a nyuu me bôt ya Israél.

²¹ Ane Môze a nga jô Aron na: Bôte ba be boya wo jé ane wo titi be abime adite mbeʼe abé dina bitu?

²² Ane Aron a nga yalane na: Ayaa Nti wom e boʼo te yôñ! Womien wo yem bôte ba, asimesane dap e luu kom ése ve mboon abé .

²³ Ba te jô me na: Boʼo bia bezambe ba wulu bia; amu Môze, môt a nga soo bia Ejipte, bi nji fe yem jam e kuiya be nye.

²⁴ Nde ma te jô be na bôt be bili mvot be ve ma je! Nde ba te ve ma je; ane ma te wua je nduan, ateme na mone nyak nye a nga vame nduan été.

²⁵ Môze a nga yene na bôt be nyiineya nzametan été, a Aron a nga jôʼé be nzametane été a kui na, be ntoo zesé biôm e mise besiñe bap.

²⁶ Ane Môze a nga tebe mbé minkan a jô na: Ba bese be ne ngame Nti be zaʼa be ma! Ane mvôʼô Lévi bese be nga sulan fefele jé.

²⁷ Ane a nga jô be na: Avale di nde Nti, Zambe ya Israél a jô na: Môt ase ya be mia a nyoñe nkpwaté mekôn, éyoñe te mia ye wulu minkan mise ataté mbé wu a kui wu ôvok, môt ase a wôék monyañ, mvôé jé, évuvumane jé.

²⁸ Ane mvôʼô Lévi be nga bo ane Môze a nga bendé be; môs ôte bôt be nga wu bebé bôt toyini éla.

²⁹ Ane Môze a nga jô na, vaʼane miabebiene den be Nti, môt ase, toʼo a ve monafam wé nge monyañe wé, nalé a ye botane mia den.

Meyeʼelan me Môze

³⁰ Tyé kpwaa, Môze a nga jô bôte na: Mi boya beta nsem. Eyoñ ji ma zu bet be Nti, éyoñ éziñ ma zu bo na Zambe a jamé minsem mienan.

³¹ Môze a nga bulan be Nti a jô na: Bôte ba be boya nsem ô ne anen, be boya bebien bezambe be mvot.

³² Ajô te jaméʼé be nsem wob éyoñe ji! Nge nalé momo, ma yeʼelan wo, tyame jôé dam e kalate ô maneya tili.

³³ Ane Nti a nga jô Môze na: Nyô a bo nsem wo wosane ma nye ma ye vaa jôé kalate wom.

³⁴ Kele éyoñ ji a wulu bôt a kui be vôm me nga jô wo nye, si ya ntiñetan. O lôô éngele wom a ye wulu ôsu viôé. Ve môs ya ayaa dam, ma ye yaa be amu nsem wop.

³⁵ Ane Nti a nga bibi bôt, amu be nga bo mone nyak nye Aron a nga kôm.