NKÔLAN 27 - Bible en langue Bulu

Ataʼa ba diʼi mimvean

¹ Wo ye bo ataʼa metunaʼa a asé. Nté ya été ô too menyiʼi me mo metan a ndame jé menyiʼi me mo metan. Ataʼa metunaʼa te da ye bo nté a ndam abime da, a nkôñ yʼété menyiʼi me mo mela.

² Wo ye bo minlak e mekuʼu menyin ya été; ve minlak mite mia ye bo nlatan a atak bibaane bi bo jôme jia; wo ye yañe ataʼa ese a mvot.

³ Wo ye bo bikutan asub ataʼa metunaʼa te, bisobelé bié, bisua bié, bilume bié a biyañaʼa bié, wo ye bo biôm bite bise a mvot.

⁴ Wo ye bo njiñelete avote mvot a futi bilondo bi mvot e mekuʼu menyin ya été.

⁵ Wo ye yemete avote te mbômaʼan éfase jia ya ataʼa si; avot da yiane suʼu tañe anyiʼi wo da a étun nté nkôñ ya yôb ataʼa e bili.

⁶ Wo ye bo mimbôñ ya atak a asé a yañe mie a mvot.

⁷ Ba ye nyiñeli mimbôñ e bilondo été a mimbôñ mia ye bo e mekuʼu ya atak éyoñ ba beʼe de.

⁸ Wo ye lôñe ataʼa te a mebam mfaʼa ya été ô too mfule mfu; avale e nga litibane be wo avale te wo ye lôñe de.

Nseñ ya tabernakel

⁹ Mfaʼa ya nké, wo ye bo nseñ tabernakel; wo ye bo wô a besandé be ndombo é ne ntiñan a mvosane nsinga; besandé bete be kele mfaʼa ya nké tañe menyiʼi me mo ntet.

¹⁰ Beta mekône mab ma ye bo mewôm mebaé, bisukaʼa bi mvote biap ke mewôm mebaé; akop ya mekôn a mimbôñ mi beʼe de da ye boban a silba.

¹¹ Mfaʼa ya akôé, besandé ba ye fe bo avale te nté menyiʼi me mo ntet, a mekôn mewôm mebaé map, a bisukaʼa bi mvote biab mewôm mebaé; akob ya mekôn a mimbôñ mi beʼe de da ye boban a silba.

¹² Ndam ya nseñ, mfaʼa jôbe da dim, ja ye bo besandé bindelé menyiʼi me mo mewôm metan, a mekône mab awôm, a bisukaʼa biab awôm.

¹³ Mfaʼa jôbe da tôô, ndam ja ye bo menyiʼi me mo mewôm metan;

¹⁴ afabe da menyiʼi me mo metan, a mekône mab a bisukaʼa biap.

¹⁵ Afabe baa menyiʼi me mo awôm a metan a mekône menene mab mela a bisukaʼa biab bilaa.

¹⁶ Mbé ya nseñ wo ye bi éyé ja dibe wô ô too menyiʼi me mo awôm a metan, nduban blum, mfô a évele, mboon a nya ndomboo a too mvosane minsinga, ésaé ya mintyetyeñ betiñe biôm, a mekône menyin a bisukaʼa biap.

¹⁷ Beta mekône mese ma bômane nseñ ma ye bi mimbôñ mi silba miap, akobe silba dap, a bisukaʼa bi mvote biap.

¹⁸ Nté ya nseñ wo ye bo menyiʼi me mo ntet; ndame jé li a li ase menyiʼi me mo mewôm metan, a nté nkôñ ya yôbe wé menyiʼi me mo mewôm metan, bindelé ya été bi too nya ndomboo, ntiñan a mvosane minsinga, bisukaʼa ya été bi too mboon a mvot.

¹⁹ Biôm mebelane bise ya tabernakel , mekône mé a ma mese ya nseñ ma ye boban a mvot.

Mfufube mbon

²⁰ Wo ye jô bôte ya Israél na be zu mbon ôwôndô a ne ntyaʼan; mbon ôte ô too nléane mvaé asu ébi bifufup: nalé belambe ba ye yôñ éyoñ ése.

²¹ Nda éndelé bisulan, atan ya éyé ya zañe nda é ne ôsu ya éwolo élat, Aron ba be bone bé ba ye telé belambe be yôñ ataté mamengôʼé a kui mametyé asu Nti. Jame di e ne mvinda ya nnôm éto mfaʼa miaé mise ya bôte ya Israél.