NKÔLAN 25 - Bible en langue Bulu

Nlôñane Tabernakel a mebendé ya été

¹ Ane Nti a nga kobô Môze na:

² Kobôʼô bôte ya Israél na: Be vaa mvean ya ékañaʼa wom. Mia ye vaa wô e be môt ase nlem ô ne ésôs.

³ Mvean mia ye vaa e be môt ase ñwô wu: Silba a mvot;

⁴ biyé bi ne blum, mfô a évele, abeñe biyé bi léñ a mimvot bikela;

⁵ bikôb beyôm mintômba nduban évele, a bikôbe bi beta betit ya mañ bi ne afip, mebam mʼasé.

⁶ Mbon asu belambe, alobinda da nyume mvaé asu mbon ba woʼo bôt éyoñ ba telé be bito a asu bityitaʼa bia nyume mvaé;

⁷ mekoʼo me ôniks a mefe asu ya futi me e mimbot betuni ba jaé be loʼone mie na éfôd péktôral.

⁸ Ba ye kôme ma vôm a ne étyi a ma ye tabe ézezañe jap.

⁹ Mia ye wulu mam mese aval ane éveʼela tabernakel é né a aval ane éveʼela ya biôm mebelan bise ya été ma ye liti wo é né.

Ewolo, Tebele, ébi bifufup

¹⁰ Ba ye bo éwolo a asé; nté ya été wo ye bo menyiʼi me mo mebaé a étun, ndam anyiʼi wo da a étun, nkôñ anyiʼi wo da a étun.

¹¹ Ba ye yañe nya mvotô mfaʼa ya été a atan, a futi fe nkôngô mvot mbômaʼan mekuʼu mese.

¹² Wo ye kôme bilondo bi mvot binyin asu éwolo éte a futi fe bie mekuʼu menyin ya été: Bibaé li a bibaé li.

¹³ Wo ye kôme mimbôñ mibaé a asé a yañe mie mvot.

¹⁴ Wo ye some mimbôñ mite e bilondo ya mefefele mʼéwolo, mmie ba ye bo be bekeʼe mie éwolo.

¹⁵ Mimbôñ mia ye tabe e bilondo ya éwolo été; a ba ye bo te vaa mie été.

¹⁶ Wo ye futi bifase mekoʼo metiñ bibaé ma ye ve wo éwolo été.

¹⁷ Wo ye kôme abam a nya mvotô nté ô too menyiʼi me mo mebaé a étun, ndam anyiʼi wo da a étun.

¹⁸ Wo ye bo biveʼela bibaé ya beéngele ba loone Bekerubim a mvot e mekuʼu mebaé ya abame di; wo ye bo bie a mvot é ne mbiban,

¹⁹ kérubim wua akuʼu di a nyô mbok akuʼu avok; mia ye bo Bekerubim ba jôme jia, nlatan a mekuʼu mebaé ya abam.

²⁰ Bekerubim ba ye same mefabe mab e yôp, mefabe mete me butiʼi abam a Bekerubim bebiene ke be lôane mesu; mesu mab ma ye fombô abam.

²¹ Wo ye nyoñe abam a telé de éwolo yôb a futi mekoʼo metiñ ma ye kee wo éwolo été.

²² Ma ye tôbane wo abame yôp, e zañe Bekerubim bebaé be tele éwolo metiñe yôp; ma ye kobô wo, nalé ma ye ve wo mebendé mam mese asu bôte ya Israél.

²³ Wo ye fe kôme tebele a asé: nté wé binyiʼa bi mo bibaé, ndame jé ényiʼa wo jia a étun.

²⁴ Wo ye yañe tebele ate a nya mvotô mbômaʼane.

²⁵ Wo ye bômane nye a ntem alen a yañe fe mvot e nkôngô ntemba alene te mbômaʼane.

²⁶ Wo ye lui bilondo bi mvot binyin a futi bie e mekuʼu menyin ma tôbane a mekône menyin ma tôban a tebele.

²⁷ Bilondo bia ye bo bebé a ntemb alen ô ne mbômaʼane tebele, a ba ye some mimbôñ été mfaʼa ya volô mbeʼane tebele.

²⁸ Wo ye bo mimbôñ a asé a yañe mie a mvot, mia ye volô mfaʼa ya beʼe tebele;

²⁹ Wo ye kôme bone bisua bié a bilaé bié a mekobe minlaʼa mé, a bidoʼo bisua bié; biôm bite bia ye volô mfaʼa mimvean mi woon a wo ye bo bie a nya mvotô.

³⁰ Wo ye bôôé mimmaman mi fembé mi ne ndem ya mvoʼé e zañe Zambe a bôte bé e tebele yôp, a mia ye bômbô éyoñ ése ôsu viam.

³¹ Wo ye bo ébi bifufup a nyaa mvotô: Ja ye boban a mvot é ne mbiban. Biôm bise ya été bia ye bo nlatane jôme jia: tin, nkuk, bikpwas, bibuma a mesam.

³² Mintyaé misaman mia ye bembe je nkuk: mila éfase ji a milale mivok éfase évok.

³³ Ntyaé ôse ô beʼe bikpwase bilaa bi too éveʼela ane amande, ékpwas ése é bili bibuma a mesam. Ntyaé ôvok ô bili bikpwas bilaa éveʼela ane amande bibuma a mesam bi too été. Avale te da ye bo mfaʼa mintyaé misaman mia ye bembe ébi bifufup.

³⁴ E tine ya ébi bifufup, bilaé bia ye bo binyin, éveʼela ane amande, élaé é bili bibuma bié a mesame mé.

³⁵ Ebuma ja ye tyebe e mibaé ya mintyaé mi ne bifufube si; a ébuma évok e mintyaé mibaé mivoʼo si. Nalé a ne na e mintyaé misaman mia so mfaʼa ébi bifufube si.

³⁶ Meton a mintyaé bia ye bo nlatane jôme jia, jia te é too mboon a mvot é ne mbiban, nya mvotô.

³⁷ Wo ye bo belambe zamgbwale ya été; wo ye futi belambe bete na be faé mfaʼa ya asu.

³⁸ Menjo ma tyiʼi nsañ lambe vôm ô maneya dik a e bone bisua asub da kutane été bia ye boban a nya mvotô.

³⁹ Ba ye belane kili gram mewôm mela a ényin (talañ), mfaʼa ya kôme ébi bifufup a biôm mebelane bié bise.

⁴⁰ Fombôʼô a tôñ éveʼela é litebaneya be wo e nkôle yôp.