NKÔLAN 22 - Bible en langue Bulu

¹ Nge ba bi ñwuwub ô tube mfin a wôé wô, awu dé te da ye bo te bijô e be môt éziñ,

² ve nge be nga wôé wô a koone na jôb e tôôya, bôt be nga wôé wô ba ye beʼe mekua ya awu dé. Ñwuwup wo ye yaʼane tañ, ve nge ô nji bi jôm, ba ye kuane wô amu wube wé;

³ Nge jôm ô nga wup, nnôm nyak, éjakas nge mone ntômba é ngenan é vee, e mo mé, maʼane mé ma ye bo biyoñ bibaé.

⁴ Nge môt a zametane mam afube éziñ été, nge ke afube mindiʼi mi woon, nge lôme mbame biyeme wé ô ke di bidi éza afup, môt ate a ye yaʼan a mbamba bibuma, bi ya nya afubu a bi ya afube mindiʼi mi woon.

⁵ Nge nduan ja yôñ e sas biteñ, a mimbom mi nlisi nge nyô a ngenan nge afub ebien a bia mane dik, môt a nga boʼé nduan éte a ye yaʼan éjian ya biôm bite.

⁶ Nge môt éziñ a ve nyô mboʼo moné nge biôm bife na a baʼale nye bie, biôm bite ve wuban e nda môt a baʼale bie, nge ñwuwube te wo yené, wo ye yaʼane maʼan biyoñ bibaé.

⁷ Nge be nji yene ñwuwube te, môt a ne nda biôm bia te wuban a ye subu asu Zambe a jô tyiñe yôb na: A nji same wo wé a nyoñ éza akum.

⁸ Nge jam éziñ ya mvô e fombôʼô nyak, éjakas, mone ntômba, ngômesan nge jôm éziñ é ne njañan, da ye yené na e ne bebela, ajô ya mengam mebaé mete da ye kui asu be Zambe; nyô Zambe a ye ve mekua a ye yaʼan nyô mbok maʼan biyoñ bibaé.

⁹ Nge môt éziñ a ve nyô mboʼo été éjakas, nnôme nyak, mone ntômba nge éyem éfe, a éyeme te ja wu nge buʼi abo, nge nyoñebane bilanda môt teke yen,

¹⁰ bôte bete bebaé ba ye kalane jôé Nti: nyô a nga baʼale éyem a ye jô tyiñe yôbe na: A nji same wo wé a nyoñ éza akum; mmiene éyem a ye kañese ngana éte a môt a te kane je a ye bo teke yaʼane tañ.

¹¹ Ve nge éyem é nga wuban e nda jé été, a ye yaʼane mie éyeme tañ.

¹² Nge ñyôyoʼo tit éziñ ya afan ñwô ô nga nyabe éyeme te mefus, môt a nga bili je été a ye soo mefuse ya été ane ngaa ya te bijô wôé, a a ye bo teke yaʼane tañ.

¹³ Nge môt a kôlé môt éyem, je ve buʼi abo nge wu mie éyeme e mo, môt a nga kôlé a ye yaʼane tañ.

¹⁴ Nge jame te da boban mie éyeme a too, môt a nga kôlé a ye bo te yaʼane tañeya éjian. Nge be nga yôé éyem a tañ, tañ éte ja yian.

Esemé mfaʼa Zambe a môta binam

¹⁵ Nge fam éziñ ja won éndune ngon é ngenan teke atiñ aluk a jôʼôbô je, a ye yaʼane nsuba éndune ngone te é nga yiane yaʼane na a ke aluk a luʼu fe je é bo e minga wé.

¹⁶ Nge ésaa ngon a bene ve nye ngo jé, a ye yaʼane moné tañe nsuba é ne ntyiʼan asu bindun bengon.

¹⁷ Wo ye bo te nyii ngbwengbwele minga.

¹⁸ Ba ye wôé e môt ase a jôʼôbô a éyem.

¹⁹ Nyô a tyiʼi bezambe befe biyem, vengevenge ve Nti étam, a ye foʼo wôéban.

²⁰ Wo ye bo te diane ntabe nge tibili wô; amu mia fe mi mbe mintabe si ya Ejipte.

²¹ Mia ye bo te tibili nkus nge monenyui.

²² Amu nge wo tibili be a be ke be yône be ma, ma yem ane ma ye wôʼô miñyône miap.

²³ Ayoʼo dam da ye yôñ, a ma ye wôé mia a nkpwaté mekôn; binga benan ba ye liʼi minkus a bone benan ke bobenyui.

²⁴ Nge wo kôlé môte ya bôte bam moné, nge éngôngole môt mia je mi too, te bo nsé memvôla wé, a wo ye bo te sili nye tañ a nseñge.

²⁵ Nge wo nyoñ e môte mbok alôʼô éban, wo ye bulane nye de jôb é ngenan te dim;

²⁶ amu nje étam ja volô nye avep, nje étam ja buti ékôbe jé; nge nalé momo a ye bômbô vé? A nge a yône be ma, ma ye wôʼô nye amu ma me ne nyô a wôʼô nye mintaé.

²⁷ Wo ye bo te yoʼé Zambe nge tote bifia meta bia wosane njô bôte ya ayoñe dôé.

²⁸ Wo ye bo te tyendé éyoñe wo yiane ve ma ngabe jôé ya woon, a mbon wo yiane ve ma. Wo ye ve ma ntôle ya bobefame bôé.

²⁹ Avale te fe wo ye bo mfaʼa ya mimbame biyeme miôé, ataté mi mi ne anen a kui mi mi ne tyôtyoé. Ntôl ôse wo ye tabe e fefele nyia tañe melu zamgbwa; e môse muam, wo ye ve me wô.

³⁰ Mia ye bo bôt be ne étyi mfaʼa wom. Mia ye bo te di mbilize tit ya mefup: mia ye wua wô bemvu.