NKÔLAN 21 - Bible en langue Bulu

Metiñ ma fombô ajô alo

¹ Mintyiʼan wo ye liti be e mie mi:

² Eyoñ wo ye kuse ôlo ô too mone Hébre, a ye saé tañe mimbu misaman, ve mbu zamgbwale, a ye kôlô fili teke yaʼane jôm.

³ Nge a nga so étam, a ye fe kôlô étam. Nge a nga so a bili minga, ba nga ba ye kôlô bebaane.

⁴ Nge masa wé nye a nga luʼu nye minga a biaé nye bobefam a bobebinga, minga a bone bé ba ye bo biôm bi masa, a ôlo ôbien wo ye kôlô étam.

⁵ Nge ôlo wo yemete na: Ma nyeʼe masa wom, nalé fe e minga wom a bone bam, me nji kômbô kôlô,

⁶ éyoñe te masa wé a ye zuu nye bebé e be Zambe, a kele fe nye bebé évin nge akône mbé , éyoñe te masa a ye tube nye alo a jôm é ne nsoñ, éyoñe te a ye saane masa wé ngum nté ényiñ.

⁷ Eyoñe fam ja ye kuane monaminga wé ane ôlo , a ye bo te kôlô avale alo da kôlô.

⁸ Nge masa wé a nga kuse nye, a nji yene nye mvaé, masa ate a ye bo na a kôtéban avô; ve a nji bi ngul ya kuane nye e be bikuu, amu a nji wulu nye ane e ne zôsôôô.

⁹ Nge a luʼu nye e monafame wé, a ye belane nye ane metiñ ya nkeane bengon meluk ô né.

¹⁰ Nge a nyoñe minga mfe, a ye bo te séʼé nge bidi, nge ngômesan, nge mam mese ya ma yiane aluʼu minga ôsu.

¹¹ Nge a nji bo nye e mam melale ma, minga ate a ne ngul ya kôlô teke yaʼane jôm, teke ve moné.

Metiñ ma fombô bibôm a meveñ

¹² Môt a bôm e môte mbok akekui a wu, ba ye foʼo wôé nye.

¹³ Nge a nji bôé nye ékolé ôbaʼa ôsu, ve Zambe émien nye a veya nye nye, ma ye telé wo vôm a ne nguleya ke sobô.

¹⁴ Ve nge môt a vañe wôé môte mbok ndimba, toʼo a tele ataʼa metunaʼa dame yôp, wo ye vaa nye a wôé nye.

¹⁵ Môt a bibi ésaa nge nyia a ye wôéban.

¹⁶ Môt a wube môt a kuane nye nge baʼale nye e mo mé, a ye wôéban.

¹⁷ Môt a yoʼé ésaa nge nyia, a ye wôéban.

¹⁸ Eyoñ bôt bebaé ba wôman, nge wua ya été a lume nyô mboʼo akok nge bibi nye ékuta, ve nye teke wu, ve nalé a boʼo nye na a bômbô si,

¹⁹ nge a ne ngul ya beta kôlô si a wulu atan a ntum , môt a nga bibi nye a ye kôlô teke étom, ve a ye tuni nye amu ntelan a nga telé nye ésaé. Nalé fe na a ye saé nye akekui a ntoo mvoʼé .

²⁰ Nge môt a bibi ôlo vié a ntum , toʼo ôlo te ô ne fam nge minga a be wu nye mo, a yiane tôban akunaʼa.

²¹ Ve nge môse wua nge mibaé mia lôt ôlo ôte teke wu, wo ye bo te kuneban amu ô ne e moné wé.

²² Nge befam ba luman, be jimbi mbubume minga, wô ve biaé teke mbia jam mfe, ba ye yaʼane aleman nnôme minga ate a ye yete be; ba ye yaʼane nye aval ane bekum ba ye jô.

²³ Ve nge jam e ne abé da kui, éyoñe te ényiñ ja ye tañe ényiñ,

²⁴ nalé fe dis da ye tañe dis, asôñ da ye tañe asôñ, wo wo ye tañe wo, abo da ye tañe abo,

²⁵ ndiʼan wo ye tañe ndiʼan, aveñ da ye tañe aveñ a nlun wo ye tañe nlun.

²⁶ Nge môt a bibi e dis ôlo vié, toʼo ô ne fam nge minga, a dise te e tui, môt ate a ye suu ôlo te ô ke fili, nalé a ne maʼane ya dise dé.

²⁷ Nge a koé asôñe ôlo ô ne fam nge minga, a ye suu wô fili, nalé a ne maʼan ya asôñe dé.

²⁸ Nge nnôme nyak a jii fam nge minga nlak wôna fam nge minga ate a wu, ba ye lume nnôme nyaʼa ate mekok a ba ye di minsône mié a môt a ne nye a ye bo teke étom.

²⁹ Ve nge nnôme nyaʼa ate a tameya zu a lume bôte minlak, be kate fe môt a ne nye nalé, ve nye teke baʼale nye, ba ye lume nye mekok nge a wôé fam nge minga, ba ye wôé môt a ne nye.

³⁰ Nge môt a ne nye a ne ntindane ya yaʼan aleman mfaʼa ya kôté ényiñe jé a ye ve tañ ése é ne nye ntindane ya ve.

³¹ Nge nyak ja jimbi mona fam nge mona minga, avale bi yeneya mvus, nne fe ba ye wulu ajô te nalé.

³² Nge nyak ja jimbi ôlo ô too fam nge minga, ba ye yaʼane môt a ne ôlo te tañe besikel be silba mewôm mela, éyoñe te fe ba lume nnôme nyak ate mekok .

³³ Nge môt éziñ a ye liʼi mfaʼan anjeñ ô yoo, nge na môt a ye faʼa anjeñ te buti de, wôna nnôme nyak nge éjakas bi kpwele été,

³⁴ miene anjeñ a ye yaʼan miene éyem ja te ku anjeñ moné éjiane ya éyem, a émien a ye nyoñe mbim éyeme te.

³⁵ Nge nnôme nyaʼa môt éziñ a jii nnôm nyaʼa e môte mbok minlak a wôé nye, bôte bete ba ye kuane nnôme nyak a vee a kabane moné; avale te fe ba ye kabane nnôme nyak a ne ñwuan.

³⁶ Ve nge nnôme nyak a te wôé nyô mbok a tame zu a bo nalé, môt a ne nye te baʼale nye, môt a ne nye a ye yaʼan nnôme nyak a vee éjiane nyô a nga wu.

Metiñ ma nambe ndamane biôm

³⁷ Nge môt éziñ a wub nnôme nyak nge mone ntômba, nge a tyiʼi nye tyiñ nge kuane nye, nnôme nyaʼa wua a ye yaʼane betan a bone biyem benyin señe mone ntômba.