NKÔLAN 19 - Bible en langue Bulu

Israél a kui nkôle Sinayi

¹ E metataʼa ya ngone lale ya nkôlane wob ya Ejipte, Israél a nga kui môse te nkôte si ya Sinayi.

² Nkôlane ya Refidim, ane be nga kui e nkôte si ba loone Sinayi a vule minkane valé zôsôôô a nkô.

³ Ane Môze a nga bete be Zambe; nde Nti a nga loone nye e nkôle yôb a jô nye na: Avale di nde wo ye kobô nda Yakob a kate bôte ya Israél na:

⁴ Miabebien mi nga yene jam me nga bo Ejipte, ane me nga beʼe mia e mefabe me ndôé a zuu mia e be mamien.

⁵ Ajô te, nge mia ye tuʼa vôʼôlô tyiñe jam, a baʼale élate jam, mia ye bo ayoñe dame mamien ézezañe meyoñ mese été, amu si ése é ne énjam.

⁶ Mia ye bo mfaʼa wom ayoñ betuni, mfufub ayoñ.

⁷ Ane Môze a nga sis e nkôle si a loone bemvendé bese ya ayoñ, a kate be mejô mese aval ane Nti a nga bendé nye.

⁸ Ane bôte bese be nga yalane tyiñe jia na: Bia ye bo mam mese Nti a jôya bia na bi bo; ane Môze a nga bulane ke kate Nti mam mese bôt be nga jô.

⁹ Ane Nti a nga jô Môze na: Ô lôô ma ye zu e be wo e dibi nkut été, nalé bôt ba ye wôk éyoñ ma ye kobô wo, a tabe wo ndi biyoñ bise. Ane Môze a nga bulane ke kate Nti mam mese bôt be nga jô.

¹⁰ Ane Nti a nga jô Môze na: Kele be bôt a tune be e môse wu a akiti; be sôbe mengômesane map.

¹¹ Be tabe nkômesan asu môse lale, amu Nti a ye sis bôte bese be lôô a mis.

¹² Wo ye ve bôte bese minné mbômaʼan vôm ase ô jôʼô be na: Tabaʼan ntyel ya bete nkô nge nambe éwom ya été: Amu môt ase a ye nambe nkô a ye foʼo wôéban.

¹³ Ba ye bo te nambe nye a mo, ve ba ye lume nye mekok , nge na ba ye lume nye akoñ, toʼo a ne tit nge môt, a ye bo te nyiñ. Eyoñ toñ nlaʼa nnôm ntômba ja ye loñeban, ba ye bet e nkôle yôp.

¹⁴ Ane Môze a nga sise nkôle si a ke mfaʼa bôt be mbe; ane a nga tune be, a ane be nga sôbe mengômesane map.

¹⁵ E nde ñhe a nga jô bôte na: Tabaʼane nkôman den melu mela, môt a boʼo te subu minga éziñ bebé.

¹⁶ E môse lale mametyé, ndume mveñ, zoʼoyañ a afibe nkut bi nga bo a yiane nkô; ane tyiñe toñ é nga wôʼé ngul abui, a bôte bese be mbe minkan be nga fôʼôban.

¹⁷ Ane Môze a nga kuli bôte bese atan minkan, be ke tôbane Zambe: Ane be nga tebe e nkôle si.

¹⁸ Otita ô nga jaé e nkôle Sinayi ôse amu Nti a nga sise wô yôb e nduan été; ôtita te ô nga bet ane wu ya mbeʼe nduan, a nkôl ôse ô nga suʼuban a ngul ése.

¹⁹ Toñ é nga dañe dañ kobô ngu. Môze a kobôʼô, a Zambe a yalaʼane nye, a tyiñ é funaʼan zoʼoyañ.

²⁰ Avale te Nti a nga sise Nkôle Sinayi yôp, abôbône nkôle yôp, a Môze a nga bet.

²¹ Ane a nga jô Môze na: Sise si a tuʼa lebe bôte na be tabe ntye, amu be za zu bebé vôme Nti a né, a kômbô yen: Abui e za mane wu.

²² Nalé fe na, betuni ba yiane subu bebé be Nti be taté tune bebien: Nti a za jiane ngab éziñ ya be be.

²³ Ane Môze a nga jô Nti na: Bôt be se ngul ya bet nkôle Sinayi amu ô nga tuʼa ve bia ayemé na, bi telé minné e nkô a telé wô étyi.

²⁴ Ane Nti a nga jô nye na: Tatéʼé sise si, éyoñe te wo ye suʼulane bet mia Aron; ve betuni ya ayoñ be boʼo te jeñe na be bet a zu vôme Nti a né, amu a za jiane bôte bevoʼo ya minsamba miap.

²⁵ Ane Môze a nga sise vôme bôt be nga too a kobô be.