NKÔLAN 18 - Bible en langue Bulu

Yétrô, ntyia Môze a zu jome nye

¹ Yétrô, ntuni ya Madian, ntyia Môze, a nga wôʼôtane mam mese Zambe a nga bo Môze a Israél ayoñe dé; ane a nga vaa be Ejipte.

² Ane Yétrô, ntyia Môze a nga nyoñe Séfôra, nga Môze, nye a nga suu na a ke,

³ nalé fe bobefam bé bebaé: wua jôé na Gérschom, amu Môze a nga jô na: Me ne ntabe éza si;

⁴ nyô mboʼo jôé na Eliézer, amu a nga jô na: Zambe ésaa a zuya volô ma a kôté ma e meyo me nkpwaté mekôn Faraoñ.

⁵ Yétrô, ntyia Môze a nga zu e be nye e nkôte si vôm be nga vule minkan e nkôle Zambe, ba be bon a minga Môze nsamba.

⁶ Ane a nga jô Môze na: Ma, nyo ntyi, ma zu e be wo bia nyo ngal a bobefam bôé bebaé nsamba.

⁷ Ane Môze a nga ke tôbane ntyi a luu asu si ôsu vié a wubane nye; ane be nga silane minsili ajô ya mvoʼé jap, nde be nga nyiine nda éndelé été.

⁸ Ane Môze a nga kañete ntyi wé mam mese Nti a nga bo Faraoñ a Ejipte amu ése ajô Israél, minjuʼu mise mi nga kui be e zen a ane Nti a nga kôté be.

⁹ Ane Yétrô a nga vak amu mvaé ése Nti a nga bo Israél a amu a nga kôté be e wo bôte ya Ejipte.

¹⁰ Ane Yétrô a nga jô na: Nti a boʼo ébotan, nyô a nga kôté mia e wo bôte ya Ejipte a nyô a nga kôté ayoñe dé éjôé bôte ya Ejipte!

¹¹ Ma yeme éyoñe ji na a ne anen a dañe bezambe bese: a nga liti nalé éyoñ bôte ya Ejipte be nga tibili bôte ya Israél.

¹² Ane Yétrô, ntyia Môze a nga nyoñe mveane ba ve ngumba a mife mfaʼa ya ve mie Zambe. Ane Aron a bemvendé bese ya Israél be nga zu di vôme wua ba be ntyia Môze asu Zambe.

¹³ Mametyé, Môze a nga tabe éto ya tyiʼi bôte mejô, a bôt be nga tebe asu Môze ataté tyé a kui ngôʼé.

¹⁴ Ntyi a nga yene mam mese a nga bo mfaʼa bôt, ane a nga jô nye na: Jé wo bo ji mfaʼa bôte ba? Amu jé wo tabe éto ya tyiʼi mejô étam, a bôte bese be zaʼa ve be wo ataté tyé a kui ngôʼé?

¹⁵ Ane Môze a nga yalane ntyi na: Nalé a ne na bôt ba zu e be ma na be sili Zambe mam.

¹⁶ Nge be bili ajô éziñ, ba zu fe e be ma: éyoñe te ma tyiʼi ajô e zañe mengam mebaé, a éyoñe te ma yeʼele be memvinda a metiñ me Zambe.

¹⁷ Nde ntyia Môze a nga jô nye na: Jam wo bo e nji ke yiane nalé.

¹⁸ Wo ye teʼe womien a bôt mia be be mi ne nsamba ba, amu mbeʼe ô dañeya wo adit, ô se nguleya beʼe wô étam.

¹⁹ Eyoñ ji tame vôʼôlô tyiñe jam; ma zu ve wo fek a Zambe émien a tabeʼe e be wo! Boʼo ntebe zañ e zañe ayoñ a Zambe, a womien kele liti mam e be Zambe.

²⁰ Yeʼeleʼe bôt metiñ a memvinda, litiʼi be zen ba yiane tôñ, a ésaé ba yiane bo.

²¹ Wôna tobôk ayoñ été, benyabôtô, ba ba ko Zambe woñ, ba ba nyeʼe bebela, ba ba vini maʼan me ne ékotekot; teléʼé be bivete ya bôte toyini, ntet, mewôm metan nge bôte awôm.

²² Mbe ñhe be tame tyiʼi bôte mejô biyoñ bise, ve be zu e be wo mfaʼa ajô ese e ne anen: Bebien be tyiʼi mejô me ne éveves. Sekéʼé mbeʼe wôé, be volô wo wô beʼe.

²³ Nge wo bo nalé a Zambe a vaʼa wo mebendé, wo ye tebe mvoʼé , a ayoñe dina ese da ye kui mvoʼé e vôm mia ke.

²⁴ Ane Môze a nga vôʼôlô tyiñe ntyi wé: nde a nga bo aval ese a nga jô.

²⁵ Ane a nga tobe benyabôtô Israél ase été, a telé be minlô ya ayoñ: bivet ya toyina bôt, ntet, mewôm metan a awôme da.

²⁶ Bôte bete mbe be nga tyiʼi bôt mejô éyoñ ése; be kele liti Môze mejô me ne ayaé, a tyiʼi ma mese me ne éveves.

²⁷ Ane Môze a nga suu ntyi a ke a bulane e si jé.