NKÔLAN 15 - Bible en langue Bulu

Jia va ndañan

¹ Ane Môze a bôte ya Israél be nga yia Nti e jia ji be jôʼô na: Ma ye yia Nti jia. Amu a litiya ndañan wé a wuaya ékabela a nyô a wulu je yôb e mañ été.

² Nti a ne ngule jam a tin ya e bia biam, a ntoo nyiane wom. A ne e Zambe wom, ma ye seʼe nye A ne Zambe ésaa wom: ma ye wumu nye.

³ Nti a ne nyô a wosan, jôé dé e ne na Nti.

⁴ A sôʼôlôya bevagoñ bita e mañ été, Ba be Faraoñ a nkane bita wé. Evele mañ é nga yandan beta mimbene mié ya mewosan.

⁵ Mendim me nga yandane be, be nga sise mevôm me ne édok aval ane mekok .

⁶ Mbo nnôme wôé a Nti, Ô ne abeñ amu ngule jé. Mbo nnôme wôé a Nti, Ô maneya tyaʼa nsiñ.

⁷ Amu anene ya éjijine jôé, wo sôʼôlô a kpwé si kayale, ba ba tebe a wosane wo. Ayôñ ya ayaa dôé wo tii de ane ngôkop. Da mine be ane minkôte bilok.

⁸ Evuñulu ya mimbile mi môé miôé, é nga kôane mendim vôme wua. Mendim me nga mane wôn ézezañ mañ. A tebe ane mimfin.

⁹ Nsiñ a mbe a jôʼô na: Ma ye tôñ, A ma ye koone nye. Ma ye kabane biôm ya nsa, A ma ye jaé a bie. Ma ye té nkpwaté mekôn a wo wom wo ye nyoñe bie amu wô.

¹⁰ Ô nga vuñulu ngabe ya mvebe wôé, Ane mañ me nga yandane be yôp. Be nga mane nyiin ane atyi étyé, e mendim me ne ngule si.

¹¹ Zʼane aval ane wo ézezañ bezambe été, a Nti? Zʼane aval ane wo Nyô abeñe dé e tii étyi jé? Nyô a ne angôndô, a yian ékañaʼa. Nyô a bo bitua bi mam.

¹² Ô nga same mbo nnôme wôé ane si é nga mine be.

¹³ Amu mbamba nleme wôé, ô nga wulu ayoñ, e di ô nga kôté. A e ngule jôé wo liti de zen a kui éto jôé é ne étyi.

¹⁴ Meyoñ me nga wôʼô de, A ma fôʼôban. Mintaé mia lat Bôt be too e si Befilisteñ.

¹⁵ Bejôô ya Edom ba dañe ko woñ. Bôte mewosan ya Môab ba fôʼôsan. Bôte ya Kanaan atek e biya be.

¹⁶ Woñ a angôndô bia ye ku be yôp. Ba ye ku mvuk ane mekok a ngule ya wo wôé. Akekui ayoñ dôé e lôteya a Nti! Akekui ô lôteya ayoñ dôé, di ô nga kus!

¹⁷ Vôm ô nga kôme étabaʼa jôé, a Nti! Wo ye kee be a toé be e nkôle wôé yôp. A Nti! vôm a ne étyi mo môé me nga telé.

¹⁸ Nti a ye jôô nnôm éto a biyoñ bise.

¹⁹ Amu bikabela bi Faraoñ bevagoñ bita bé a bewulu bikabela bé be nga dimesan e mañ été. A Nti a nga soo mendim ya mañ Me yadane be yôp. Ve Israél a nga wulu a mebo ézezañe nkôte mañ.

²⁰ Miriam, nkulu mejôa minga Aron, a nga nyoñe mone ngom a biñga bese be nga tôñe nye mvus, be bôme bone mengom a jem.

²¹ Ane Miriam a nga yalane be na: Yiʼane Nti jia amu a litiya ngule jé; a wuaya ékabela a nyô a wulu je e mañ été.

Mendim me ne ayô

²² Ane Môze a nga bo Israél a kôlô évele mañ; ane be nga nyoñe zen ja ke e nkôte si ya Sur. Eyoñ be wuluya melu mela, be nga bo te yene mendim.

²³ Ane be nga kui e vôm ba loone na Mara; ve be nga bo te nyu mendim ya Mara, amu me mbe ayô; ajô te éyôlé é nga veban vôm ate é ne na Mara.

²⁴ Ane bôt be nga kobô Môze menyiñ a jô na: Bia ye nyu jé?

²⁵ Nde Môze a nga yône be Nti; ane Nti a nga liti nye élé éziñ, nje a nga wua e mendim. Ane mendim me nga bo avoé. Vôm ate Nti a nga ve ayoñ Israél miñyeʼelan ba yiane tôñ a minjôan ba yian vôʼôlô, a vôm ate fe a nga veʼele be.

²⁶ Ane a nga jô na: Nge wo tuʼa vôʼôlô tyiñe Nti, e Zambe wôé, nge wo bo jam e ne zôsôôô e mise mé, nge wo kee melo mfaʼa ya metiñe mé, a nge wo wulu ane memvinda mé ma yeʼele, ébubua ôkone jia ya bibubua bi akon me nga kute bôte ya Ejipte, ja ye bo te kui be wo, amu ma me ne Nti a bo wo mvoʼé .

²⁷ Ane be nga kui Elim, vôm a bili menjeñ awôm a mebaé a melen mewôm zamgbwa. Ane be nga vule minkane valé, bebé a mendim.