NKÔLAN 14 - Bible en langue Bulu

¹ Ane Nti a nga kobô Môze a jô nye na:

² Kobôʼô bôte ya Israél a jô be na be bulane mvus a vule minkan ôsu ya vôm ba loone na Pi-Hahirôt, e zañe Migdôl a mañ, zôsôôô a Bal-Séfôn. Mia ye vule minkan zôsôôô a vôm ate, bebé a mañ.

³ Faraoñ a ye jô na: Bôte ya Israél be dimiya fé, nkôte si ô mineya be.

⁴ Ma ma ye ve nleme Faraoñ ntip, a ye tôñe be. Ve ma ye belane Faraoñ a nkan bita wé ôse mfaʼa ya duma dam, nalé bôte ya Ejipte ba ye yeme na ma me ne Nti. Ane be nga bo nalé.

⁵ Nde be nga kate njô bôte ya Ejipte na bôt be maneya tup. Ane Faraoñ a bebo bisaé bé be nga tyendé asimesane dab mfaʼa bôte ya Israél. Nde be nga jô na: Za jame bi boya di ane bi suuya Israél a ke a bo te beta bo bisaé!

⁶ Ane Faraoñ a nga nyoñ vagoñ bita wé a bôte bé.

⁷ Ane a nga nyoñ bevagoñ bita be ne ngule nkôman tañe mintet misaman a ba bevoʼo bese ya Ejipte, vagoñ ase a bili bôt mewôm mesaman a belaa.

⁸ Nti a nga bo nleme Faraoñ ntip, ane a nga tôñe bôte ya Israél, ve bôte ya Israél be nga kôlô a wo mbetane yôp.

⁹ Ane bôte ya Ejipte be nga tôñe be. Nde bikabela bise a bevagoñ be Faraoñ, bewulu bikabela a nkane bita wé, be nga koone be bebé e mañ, mfaʼa ya Pi-Hahirôt, zôsôôa Bal-Séfôn.

¹⁰ Ane Faraoñ a nga subu bebé. Nde bôte ya Israél be nga bete mis a yene bôte ya Ejipte be zaʼa be mvus. Ane be nga dañe ko woñ. Nde be nga yône e be Nti

¹¹ a jô Môze na: Ye amu mesoñ me mbe momo Ejipte nde ônga zuu bia na bi mane zu wu e fé été va? Za jame ô nga bo bia na, wo vaa bia Ejipte?

¹² Ye sa jam bi nga jô wo di bi too Ejipte na, ô jôʼé bia bi bo bôt ya Ejipte bisaé? A lôte na bi zu wu e fé été va?

¹³ Ane Môze a nga yalane be na: Te koone woñ, tebaʼan ne séé, a yen ane Nti a ye nyii mia e môse wu, amu bôte ya Ejipte mi lôô e môse wu, mia ye bo te beta yene be akekui nnôm éto.

¹⁴ Nti émien a ye wosan asu denan; ve mia tabaʼane bivô.

¹⁵ Ane Nti a nga jô Môze na: Amu jé wo yône be ma? Jôʼô bôte ya Israél na be ke dulu ôsu.

¹⁶ Ve wo beteʼe ntume wôé yôp, same wo wôé e mañe yôp, a kandé me e zañ a bôte ya Israél ba ye nyiin ézezañ mañ me ntoo nkôt.

¹⁷ A ma ma ye bo minleme mi bôte ya Ejipte ntip, nalé ba ye tôñe be mvus, a ma ye belane Faraoñ a nsamba mewosan wé, bevagoñ bita bé a bewulu bikabela bé mfaʼa ya duma dam.

¹⁸ A bôte ya Ejipte ba ye yeme na me ne Nti, éyoñ me maneya nyoñe duma e be Faraoñ, e be bevagoñ bita bé a e be bewulu bikabela bé. Israél a dañ évele mañ.

¹⁹ A nge Zambe a mbe a wuluʼu ôsu ya ngame Israél, a nga kôlô a tebe nye mvus; ane nsume nkute fe ô nga kôlô ôsu viab a tebe be mvus.

²⁰ Nsume nkute te ô mbe e zañe ngame bôte ya Ejipte a nyô Israél. O mbe nsum nkut mfaʼa Israél a dibi mfaʼa bôte ya Ejipte, ô nga faé a alu. Ngum alu ôse bôte ba be nji kui e ba bevoʼo bebé; Môze a metiñ me Zambe awôm.

²¹ Ane Môze a nga same wo wé e mañe yôp, nde Nti a nga tindi mañ me bulane mvus a ngul ya beta évuñulu a nga vuñ ngum alu a soʼo mfaʼa jôp da tôô.

²² Ane bôte ya Israél be nga suane ézezañe mañ be wuluʼu a mebo, ane mendim me nga bo mimfin mibaé e mbo nnôm a mbo ngale wop.

²³ Bôte ya Ejipte be nga tôñe be mvus; bikabela bi Faraoñ bise, bevagoñ bita bé a bewulu bikabela bé fe, be nga suane be mvus ézezañ mañ.

²⁴ Bebé melendé me tyé, Nti a nga fombô ngame bôte ya Ejipte a too nsum nduan a nsume nkut été, ane a nga zametane ngame bôte ya Ejipte.

²⁵ Minka bevagoñ ya bita mi nga mane koo, nalé be nga bo te fe ngul ya wulu. Ane bôte ya Ejipte be nga jô na: Ntubane bôte ya Israél, amu Nti a wosane bôte ya Ejipte asu dap.

²⁶ Ane Nti a nga jô Môze na: Same wo wôé e mañe yôb a mendim ma ye yandan bôte ya Ejipte yôp, bevagoñ bita bab a bewulu bikabela bap.

²⁷ Ane Môze a nga same wo e mañe yôp; ndibe tyé, mañ me nga beta bulan avale me wôʼô tabe; bôte ya Ejipte be nga mate me; ve Nti a nga sôʼôlô be ézezañ mañ été.

²⁸ Ane mendim me nga bulan a yandane bevagoñ bita, bewulu bikabela a ngume nkane bita Faraoñ yôp, mbie bi nga mane nyiin e mañ été e mvuse bôte ya Israél a teke môte wua a nga liʼi.

²⁹ Ve bôte ya Israél be nga wulu a mebo nkôte mañ été, a mendim me mbe mimfin mibaé e mbo nnôme a mbo ngale wop.

³⁰ Môs ôte Nti a nga nyii Israél e wo bôte ya Ejipte; a Israél a nga yene mimbim mi bôte ya Ejipte e nsaʼa mañ.

³¹ A Israél a nga yene ane Nti a tebe bôte ya Ejipte ngame yat a wo ô ne ngu. Ane bôte bese be nga ko Nti woñ; ane be nga buni Nti a Môze mbo ésaé wé.