NKÔLAN 13 - Bible en langue Bulu

Mebendé ma fombô pak a mintôle ya abialé

¹ Ane Nti a nga kobô Môze a jô na:

² Teléʼé ntôle jôme ôse étyi mfaʼa wom, jôm ése ja taté kui abum e be bôte ya Israél, toʼo môt, toʼo tit, é ne énjam.

³ Ane Môze a nga jô bôte na: Simesaʼane môse wu, ñwô mi nga kôlô wô Ejipte, nda belo amu Nti a nga vaa mia e vôme nyô a ngul ya wo wé. E belet é ne te mvusan ja ye bo te diban.

⁴ E môse wu mia kôlô, e ngon ba loon Abib.

⁵ Eyoñ Nti a ye bo na mi nyiin e si Bekananééñ, Behétiéñ, bʼAmoréeñ, Behévieñ a Beyébuzieñ, nje a nga kane ngana e be bʼésoo na a ye ve mia je: si menyañ a wôé bia len, wo ye bo jam ya nkañane wu e ngone nyô.

⁶ Melu zamgbwa wo ye di belet é ne te mvusan, e môse zamgbwale abôʼô da ye bo asu duma Nti.

⁷ Nté melu zamgbwale mete, belet é ne te mvusan ja ye diban; e belet é ne mvusan ja ye bo te yené e nda jôé nge jôm ja vusu je, ngum éfuse si wôé ôse.

⁸ Môs ôte wo ye kañete mone wôé na: Abôʼô di da boban amu a ne môs Nti a nga bo me na me kôlô Ejipte.

⁹ Nkañane te wo ye bo jam ya simesan a ndem e wo wôé a e asu dôé. Wo ye volô wo ô simesane na wo yiane yôtan atiñ Nti amu nye a bo na mi kôlô Ejipte a ngul ya wo wé.

¹⁰ Mbu ôse, wo ye bo njôane wu mewôk ane ô ne ntelan.

¹¹ Eyoñ Nti a ye kui wo e si Bekananééñ aval a nga tiñeti wo a bʼésoo bôé a ve wo je,

¹² mia ye ve nye mintôle beyôm mise mia bialé, a bone bese ba taté bialé e mimbam biyem miôé, beyôm ya été ba ye bo jôme Nti.

¹³ Wo ye ve mona kabat éjiane mona éjakas ase a taté bialé, a nge wo bo te ve mona kabat, wo ye buʼu mona éjakas tyiñ . Wo ye fe ve mona kabat éjiane ntôle monafam ya e bone bôé.

¹⁴ A ye bo na môse éziñ nyo mon a ye sili wo na amu jé jame di? Wo ye yalane nye na: Nti a nga vaa bia e nda belo Ejipte a ngule wo jé.

¹⁵ Amu Faraoñ a nga bo ntibe nlem ya suu bia, nde Nti a nga wôé mintôle mise ane bityiʼa mfaʼa Nti a kôté mintôle mise ya bone bam.

¹⁶ Ba ye bo ndem ntiñetane wo wôé a mbaʼane mvom asu jôé e zañ mise mebaé, na Nti a nga vaa bia Ejipte a ngul ya wo wé.

Dulu ataté Ejipte a kui nkôle Sinayi

¹⁷ Eyoñ Faraoñ a nga suu bôt be ke, Zambe a nji kee be e zene ya si Befilisteñ, akôsa bo é mbe tyiʼibi, amu Zambe a nga jô na: Bôt be za tyendé asimesan éyoñ be yeneya bita, a viane bulane Ejipte.

¹⁸ Ve Zambe a nga wulu bôte bete e zen é ne émokot, e nkôte si e mfaʼa ya évele mañ. Ane bôte ya Israél be nga kôlô Ejipte be too nkômesan mfaʼa ya bita.

¹⁹ Ane Môze a nga nyoñ bives bi Yôsep: Amu Yôsep a nga kane Israél ngana na: E ne bebela na Zambe a ye jome mia a éyoñ mia ye kôlô va, mi kelee a bivese biam.

²⁰ Ane be nga kôlô Sukôt a bômbô meyôa Etam akuʼu fé.

²¹ Amôs, Nti a nga wulu ôsu viab a too nsum nkut été mfaʼa ya liti be zen; a alu, a too nsum nduan été mfaʼa ya faé be éfufup, ndemben be wulu alu a môs .

²² Amôs nsum nkut ô nji kôlô ôsu viap, nalé fe nsum nduan a alu.