NKÔLAN 12 - Bible en langue Bulu

Ntelan abôk Pak

¹ Ane Nti a nga jô Môze ba Aron e si ya Ejipte été na:

² E ngone nyô, e mfaʼa wônan, ja ye bo ngon ôsu ya bengon; ja ye bo, e mfaʼa wônan, ngon ôsu ya mbu.

³ Kobaʼan ékôane bôt ése ya Israél na: Ngone nyô é too melu awôm, mia ye nyoñ, e nda bôt ése, mone kabat, a nda ése mone kabat.

⁴ Nge mone kabat a ne anen, nda bôt ke tyôtyoé, wôna nda éte ja ye di nye a bôt be ne be bebé ane tañe bôt é né. Mia ye kabe mone kabat a ve môt ase a ne ngul ya di.

⁵ Mone Kabat ate a yiane bo mvoʼé mimfaʼa mise, nnôm a ntoo mbu wua; mia ye nyoñe nye nge e mintômba nge e bikela.

⁶ Mia ye baʼale nye a kui e ngone nyô melu awôm a menyin, a Israél ase a too nsulan, a ye wôé nye e zañe ngôʼé ébaé.

⁷ E menda mese ba ye di nye, mia ye nyoñe ngab ya metyi mé a woʼo me e mekôn mebaé me beʼe mbé , a e mimbé yôp.

⁸ Alu te ebien ba ye di minsôn mbuban e nduan a e belet é ne te mvusan, a biloʼo bi ne ayô.

⁹ Mia ye bo te di nye mbelan éfas nyumi éfas, nge ñyaman a mendim; ve mbuban e nduan: Nlô, mimbiaé a miñya .

¹⁰ Mia ye bo te liʼi jôm é kui mametyé: A nge jôm éziñ ja buk é kui tyé, mia ye diʼi je e nduan.

¹¹ Avale di nde mia ye di nye: Kandé e ntiñetane mengeteñ, besilefas e mebo a ntum e mo; mia ye di nye avô: A ne pak e mfaʼa Nti.

¹² Alu te ma ye lôt e si ése ya Ejipte a wôé mintôle mise ya été, ataté bôt a kui betit, a ma ye belan mintyiʼane mejô miam mi wosane bezambe bese ya Ejipte: ma me ne Nti.

¹³ E vôm ase mi né, metyi ma ye bo mia ndem; éyoñ ma ye yene me, ma ye dañe mia yôp, a teke ébubua éziñ ja wôé ja ye bo e be mia éyoñ ma ye bibi si ya Ejipte.

¹⁴ Môs ôte wo ye bo mia wu ya simesan, a wo ye bo mia wu ya beta mevak, abôk e mfaʼa Nti. A miaé mi bôte mienan mia ye baʼale de ane atiñ ya nnôm éto na be bo mebôk môs ôte.

¹⁵ Mia ye di belet é ne te mvusan tañ melu zamgbwa. Ataté e môs ôsu, mia ye vaa jôm ja vusu belet e menda menan, amu môt ase a ye di belet é ne mvusan ataté e môs ôsu a kui e wu zamgbwale, ba ye vaa nye Israél été.

¹⁶ E môs ôsu, môt ase a ye nyoñe nloon ô ne étyi, a e môse zamgbwale wô fe ô ne étyi. Teke ésaé éziñ ja ye boban mimôs mite, vengevenge ve ñyaman bidi asu môt ase ya e be mia.

¹⁷ Mia ye baʼale abôk belet é ne te mvusan, amu môs ôte ôbien ñwô me nga vaa minsamba mienan mi kôlô Ejipte: mia ye baʼale môs ôte ane atiñe ya biyoñ bise asu miaé mi bôte mienan mise.

¹⁸ E ngon ôsu ya mbu ataté melu awôm a menyin mamengôʼé a kui melu mewôm mebaé a da mamengôʼé, mia ye di belet é ne te mvusan.

¹⁹ Nté melu zamgbwa, ba ye bo te koone jôm ja vusu belet e menda menan été: amu môt ase a ye di belet é ne mvusan ba ye vaa nye Israél été, toʼo a ne nneñ nge bialébialé ya si éte.

²⁰ Mia ye bo te di belet é ne mvusan; mevôm mese mi too, mia ye di belet é ne te mvusan.

²¹ Ane Môze a nga loone bemvendé bese ya Israél a jô be na: Toban a biane bone bekabat asu denan, nda bôt ése kabate jia, éyoñ te mia ye tyiʼi pak .

²² Mia ye nyoñe abusa izôp a dube de metyi me ne fandé été; éyoñe te mia ye miame me e mimbé yôb a mekône mebaé me beʼe mbé ô ne mbômelan. A teke môte ya be mia a ye kui atan ya nda jé akekui mametyé.

²³ Nti a ye lôt a wôé bôte ya Ejipte, a éyoñ a ye yene metyi e mbé yôp, a e mekôn mebaé ya mbé ô ne mbômelan, a ye lôt e mbé yôb a bo te kañese na awu e zu e menda menan a wôé mia.

²⁴ Akekui nnôm éto, mia ye baʼale njôane wu ane atiñ mfaʼa wôé a miaé mise ya bone bôé.

²⁵ A ye bo na, éyoñ mi kuiya e si Nti a ye ve mia avalʼane a nga tiñeti, mia ye baʼale jame ya nkañan di.

²⁶ A éyoñ bon benan ba ye sili mia na jam ya nkañan di da tinan aya mfaʼa wônan?

²⁷ Mia ye yalane na: A ne mveane ya nlôtan mfaʼa Nti, nye a nga lôt menda me bôte ya Israél yôb Ejipte, éyoñ a nga wôé bôte ya été a nyii menda mangan. Ane bôt be nga lui mesu si a kañ.

²⁸ E nde bôte ya Israél be nga ke a bo ane Nti a nga bendé Môze ba Aron, nalé be nga bo.

²⁹ E zañ alu, ane Nti a nga wôé mintôle mise ya Ejipte, ataté ntôle fam Faraoñ a too éto njôô jé a kui mi yʼalo e ne menda a mintôle ya mimbam biyem;

³⁰ Ane Faraoñ a nga kôlô si a alu, émien a bebo bisaé bé bese, a bôte bese ya Ejipte. Beta ñyôn a nga boban Ejipte été, amu teke nda éziñ ya bôte ya Ejipte é mbe teke mbim.

³¹ Alu te ebien, Faraoñ a nga loone Môze ba Aron a jô be na: Tebaʼane tetele mi kôlô ézezañ ya bôte bam été, miabebien a bôte ya Israél fe, kelan a boʼone Nti ésaé avale mi nga jô.

³² Nyoñane fe mimbam biyem mienan, mi mi ne anen a mi mi ne tyôtyoé, aval ane mi nga jô; kelan, a botane fe ma.

³³ Bôte ya Ejipte be nga tindi Israél a kôlô be si jab avô; amu be nga jô na: Bia bese bi ntoo bewu.

³⁴ Bôte ya Israél be nga nyoñ mfuʼane avut wop, valé ô ngenan te vus. Ane be nga tiñeti befandé be mfuʼane avute te e besandé biyé été a beʼe be e bituu.

³⁵ Bôte ya Israél be nga bo fe ane Môze a nga lebe be, amu be nga sili bôte ya Ejipte mimbot mi silba a mvot, a akum ya jaé.

³⁶ A Nti émien a nga bo na bôte ya Israél be yene mvam e mise me bôte ya Ejipte, ajô te be nga ve be ngul ya nyoñ jôm ése be nga sili. Nalé ate Israél a nga sa bôte ya Ejipte.

Bôte ya Israél ba kôlô Ejipte

³⁷ Ane Israél a nga wulu ataté vôm be nga too jôé na Ramzés a kui vôm be nga taté woʼon jôé na Sukôt be too fame fam ja wulu a mebo toyini mintet misaman, te lañe binga a bongô.

³⁸ Abui bôt ya meyoñ e nga tôñe fe be a ke nsamba wop. Be nga bili fe beta mimbam: Mi betit be ne tyôtyoé a mi betit be ne anen.

³⁹ E Sukôt nye be nga yam begatô be ne te vus a mfuʼan avut be nga so wô Ejipte, amu mfuʼane avute te ô nji bi mvusu, amu be nga titane be Ejipte, avale ya na be nji bi éyoñ ya beta yange nge kômesane bebien ngaʼaban.

⁴⁰ Israél a nga tabe Ejipte mimbu mintet minyin a mewôm mela.

⁴¹ E môs ôbien mbu mintet minyin a mewôme lale ô nga kpwaan, ñwô minsamba mewosane mi Nti mise mi nga kôlô Ejipte.

⁴² Alu te e mbe alu Nti a nga bo évévé mfaʼa ya vaa Israél Ejipte, alu ya évévé mfaʼa bôte ya Israél bese na be baʼale metiñ ya abôʼô pak .

⁴³ Ane Nti a nga jô Môze ba Aron na: Metiñ ya pak e me ma: teke nneñ a ye di nye.

⁴⁴ Ve ôlo ôse be nga kus a moné ô ne di éyoñ mi maneya tyiʼi nye atyel.

⁴⁵ Nneñ a mbo ésaé a nyoñe tañ ba ye bo te di nye.

⁴⁶ Mia ye di nye foʼo ve nda été; mia ye bo te kui minsône mié atan, a mia ye bo te buʼu éves éziñ.

⁴⁷ Ekôane bôt ése ya Israél ja ye bo abôʼô pak .

⁴⁸ Nge nneñ a too e be wo a kômbô nyoñe ngab abôʼô Pak, mfaʼa Nti, fam ése é ne e nda jé ja yiane taté tyiʼibane atyel, éyoñe te a ntoo ngul ya subu bebé a nyoñe ngab abôʼô pak amu a ntoo aval ane bialébialé. Ve teke môt a ne te ntyiʼibane atyel a ye di pak .

⁴⁹ Nneñ a ne ntabe e be wo a bialébialé ba ye wulu atiñe da si.

⁵⁰ Bôte ya Israél bese be nga bo foʼo vʼane Nti a nga bendé Môze ba Aron;

⁵¹ môs ôte ôbien Nti a nga vaa bôte ya Israél Ejipte be too mbamba ntaʼan minsamba mewosan.