NKÔLAN 1 - Bible en langue Bulu

Minjuk yʼIsraél e si yʼEjipte

¹ Mana me ne môé me bôt yʼIsraél be nga ke Ejipte ba be Yakob, be nga ke môt ase a e nda bôte jé:

² Ruben, Siméoñ, Lévi, Yuda,

³ Yisakar, Zabuloñ a Bényamin.

⁴ Dañ a Naftali, Gad, Azér.

⁵ Abime bôt ese e nga bialé e be Yakob e mbe bôt mewôme zamgbwa; ve Yôsep a mbe Ejipte.

⁶ Ane Yôsep a nga wu a bobenyañ bé bese a miaé bôte wé ôse.

⁷ Ane bôte yʼIsraél be nga biaé a fôé, a bo abui a dañe dañe bo ngu, a jaé si yʼEjipte.

⁸ Mfefé njô bôt ô nga tebe Ejipte ô nji ke yeme Yôsep.

⁹ Ane mfefé njô bôte ôte ô nga jô bôte ya si jé na: Mi lôô bôte yʼIsraél be ntoo abui a ngu a dañe bia,

¹⁰ zakan bi bôndane feʼe ya séʼé tañ bôte jab é bo te beta bo abui. Amu nge bita bia kui, be ne lat a besiñ bangan a wosane bia, be suʼulane kôlô nge nyoñe si jangan.

¹¹ Ane be nga telé be bivet bisaé bitibelaʼa na bi ve be bisaé bi ne ayaé ya bo. Ane be nga ve be ésaé ya lôñe Faraon bitisone ya naane akum e Pitom a e Ramzés.

¹² Abim be nga tibili be, abime te fe Israél a nga fôé a yiane Ejipte ese.

¹³ Ane bôt yʼEjipte be nga tibili ba ya Israél alo a njet ése.

¹⁴ Enyiñ jab ve bo atyi a ayô amu mfaʼane tyia a mbiban brik, ô laté fe a ésaé ése ya mefup. Bôte ya Ejipte be nga tibili be a mevale mesu bisaé mese me ne ayaé.

¹⁵ Ane njô bôt yʼEjipte a nga kobô e binga be nga bo ésaé ya bialé binga Beébre be mbe môé na Sifera a Pua na:

¹⁶ Eyoñ mia bialé binga Beébre a fombô be éyoñ be too e bito ya abiaé yôp, nge mon a ne fam a yiane wu, nge a ne minga a yiane nyiñ.

¹⁷ Ve bedokita be binga ba be mbe beko Zambe woñ, be nji bo njôane njô bôt mewôk, be ve nyii e bobefam ba bialé.

¹⁸ Nde njô bôte ya Ejipte a nga loone be a sili be na: Amu jé avale mboone di? Mia nyii bobefam amu jé?

¹⁹ Ane be nga yalan Faraoñ na: Binga Beébre be nji bo ane ba ya bôte ya Ejipte. Be ne biwôlô amu ba biaé e zen te na be kui e be bebialé binga.

²⁰ Ane Zambe a nga botane bedokita be binga bete, a Israél a nga fôé a dañe bo ngu.

²¹ Amu bedokita be binga ba be nga ko Zambe woñ, nde a nga botane fe menda me bôte map.

²² Ane Faraoñ a nga suʼulane bendé ayoñe dé ese na: Monafam ase a ye bialé, mia ye wua nye ôsôé, a mia ye nyii mona minga ase.