NEHEMIE 8 - Bible en langue Bulu

Bôte bese ba vôʼôlô nlañan metiñ

¹ Ngone zamgbwale é nga kui bone bʼIsraél be too e bitisone biap. Eyoñe te ñhe bôte bese be nga sulan ane môte wua, e vôm a mbe ôsu ya mbé mendim. Nde be nga jô Esdras, Ntili bekalate na, a zuu kalate metiñe me Môze, mme Nti a nga bendé Israél.

² Ane Esdras, ntuni , a nga soo kalate metiñ ôsu ékôane bôt, é mbe befam a binga, a ba bese be mbe nguleya wôʼô jam é nga jôban. Jame di é nga boban ngone zamgbwale é too alu da.

³ A nga lañ e kalatʼété, ataté mametyé a kui zañe môs , a tele vôm a ne ôsu mbé mendim: befam, binga a ba be mbe nguleya wôk be too. Bôte bese be nga tuʼa vôʼôlô nlañane kalate metiñ.

⁴ Esdras, ñyeme bekalate, a nga tele e monʼéwolo bilé yôp, nye a nga kômban amu awolo te. Bôte bana be nga tele nye fefel e mbo nnôm: Matitia, Séma, Anaya, Uri, Ilkiya a Maséya: e mbo ngal: Pedaya, Mikaél, Malkiya, Asum, Asbadana, Zakari a Mesulam.

⁵ Ane Esdras a nga kui kalate bôte bese be lôô, amu a mbe a tele ôyabe yôp a dañe bôte bese. Eyoñ a nga kui nye, nde bôte bese be nga tebe betetele.

⁶ Esdras a nga botane Nti, e Zambe a ne anen, a bôte bese be nga yalane na: Amen! Amen! Ve kumbu a kañ asu Nti, mesu me butu si.

⁷ Yasua, Bani, Kérébia, Yamin, Akub, Kabetayi, Odiya, Maséya, Kélita, Azaria, Yôzabad, Anañ, Pelaya a Belévit, be nga bo ésaé ya kôñelane be metiñe na be tuʼa me wôk a bôte bese be nga tele betetele.

⁸ Be mbe be lañek ne sañesañ e kalate metiñe me Zambʼété, a kate atinan ya vôm ba te lañ, ane bôt be ne tuʼa wôk jôm ba te lañ.

⁹ Néhémie ngovina, Esdras ntuni a ñyeme bekalate, nalé fe belevite, be nga bo ésaé ya yeʼele bôt. Be nga jô bôte bese na: Môse wu ô ne ntelan ngumba asu Nti, e Zambe wônan. Te taban ôlun été nge e miliʼi été! Amu bôte bese be nga yôn éyoñ be nga wôʼô mejô ya kalate metiñ.

¹⁰ Esdras a nga jô be na: Kelan a di betit be ne avoñ, a nyu biôm bi nʼévôvoé, a lôme mengap e be ba be nji bi jôm: amu môse wu ô ne ntelan asu Nti wongan; te wôʼan ôlun amu avaʼa Nti nde é ne ngule jenan.

¹¹ Belévit be jeʼe bôte bese minlem be jôʼô na: Tabaʼane bivôl, amu môse wu ô nʼétyi, te wôʼan ôlun!

¹² Ane bôte bese be nga ke be nga tuʼa wôʼô mejô be nga kate be.

Abôʼô bibem

¹³ E môse baa, minlô menda me bôte ya ngum ayoñ betuni a Belévit, be nga sulan e be Esdras ñyeme bekalate na be vôʼôlô mejô ya metiñ.

¹⁴ Be nga koone ntilan e metiñ été na Nti a nga kobô a anyu Môze na: Bone bʼIsraél ba yiane tabe bibeme si éyoñ abôʼô ya ngone zamgbwale da boban.

¹⁵ Nalé fe na ba yiane mialane foé e bitisone biab a e Yérusaleme na: Kelane nkôl a nyoñ mebui mʼôlivié, mebui mʼôlivié yʼafan, mebui me mirte, mebui melen a mebui bilé bise bi bili abui mekaé, mi lôñe bibem, avale ntilan ô né.

¹⁶ Nde bôte be nga ke a nyoñe mebui bilé mete. Be nga lôñe bebiene bibem, môt ase éfuse si ya nda jé, e minseñe miap, e minseñe ya nda Zambe, e vôme ya mbé mendim, a e vôme ya mbé Efrayim.

¹⁷ Ekôane bôt ése ya ba be nga so minkôm é nga lôñe bibem a tabe bie si. Ataté melu Yasua mone Nun a kui môse wu, bone bʼIsraél be nji tame bo jame nalé: beta mevak me nga boban.

¹⁸ Môs ôse be nga lañ e kalate metiñ été, ataté môs ôsu a kui wu wo suʼulan. Be nga jem abôk tañe melu zamgbwal. Ekôan ja dib abôk é nga boban e môse muame, aval ane ñyeʼelan ô mbe.