NEHEMIE 6 - Bible en langue Bulu

Bindeñelaʼa bife ya besiñ

¹ Eyoñe Sambala, Tôbiya, Gésém monʼArabe a besiñ bangan bevok be nga nyoñe foé na, me beteya mane lôñe mfine mekok , a na teke fe vôm éziñ a yoo, valé me ngenan te futi bivin e mimbé,

² Sambala a Gésém be nga lôme ma mbañete na: Zaʼak, bia be wo bi tame laan e Kefirim, e mbiʼili Onô. Valé be maneya kômesane na ba zu bo ma mbia jam.

³ Nde me nga lôme be éyalan a minlômane na: Me bili beta ésaé ya bo, a me se nguleya sis: amu jé ésaé ja yiane tebe nté ma liʼi je a zu e be mia?

⁴ Mbañete wua be nga lôme wô tañe biyoñ binyin, a ma me nga bulane be vʼavale éyalane da.

⁵ Nde Sambala a nga lôme ma mbañete te wua éyoñe tane a ésoé mbo ésaé jé é bili kalate e mo a yoo.

⁶ Kalatʼate a mbe ntilane na: Foé ja mialan e meyoñ , a Gasmu a yemete na, wo a Beyude mi bili ôsimesan ya ben éjôé, ajô te wo beta lôñe mfine mekok . Ba jô na wo ye bo njô bôte wop.

⁷ Ô teléya fe telé bekulu mejô be kulu mejô e Yérusalém asu dôé na: Njô a ntoo e Yuda! Eyoñe ji avale menyiñe te da ye kui e be njô bôt. Zaʼa ñhe bia be wo bi fase jame te.

⁸ Ane me nga yalane nye na: Avale menyiñ wo kobô de le e nji ke bo été, womiene wo té té de!

⁹ Amu bôte bete bese be nga kômbô ve bia woñ be jôʼô na: Ba ye dimili ngule minlem, a ésaé ja ye bo momo. A Zambe vaʼa ma ngul éyoñe ji!

¹⁰ Nde me nga ke e be Semaéya, mone Delaya, mone Meyetabél, a nga fet émien e nda été a jô na: Zaʼa bi ke nsamba e nda Zambe, ézezañe nda Zambe a dibe mimbé yʼété, amu ba zu wôé wo, a ba ye zu wôé wo a alu.

¹¹ Me nga yalane na: Môt a ne ane ma a ne nguleya tubʼaya? A môte mbé a ne ane ma a ne nguleya nyiine nda Zambe a nyiñ? Me se nguleya nyiin.

¹² Me nga suʼulane yeme na sake Zambe nyʼa nga lôme nye, vʼa nga kulu ajô dame nalé amu Sambala a Tôbiya be nga kuse nye.

¹³ Eyoñe be nga kuse nye, be nga simesane na ma ye ko woñ a tôñe mefeʼe mé, a bo jam é ne nsem; éyoñe te be nga ye ve ma mbia jôé asu ya samele ma.

¹⁴ A Zambe wom, ô simesaʼane Tôbiya, Sambala, a mimboone miap, nalé fe Nôadia, minga a ne nkulu mejô, a bekulu mejô bevok; be nga jeñe na be ve ma woñ.

¹⁵ Mfine mekok ô nga man e ngonʼélul é too melu mewôm mebaé a metan, tañe môse mewôm metan a mibaé.

¹⁶ Eyoñ besiñe bangane bese be nga wôʼô ajô te, ba bese be ne te yeme Zambe be bômaʼane bia, be nga ko woñ a silibane si e mise mabe mebien, a suʼulane yene na: Ésaé é nga boban amu nkômbane Zambe wongan.

¹⁷ Melu mete, biwôlô bi bôte biziñe ya Yuda fe bi nga lôme Tôbiya bekalatʼéyoñ ése, bekalate bevoʼo be soʼo be Tôbiya be kelek e be be.

¹⁸ Amu bôt abui ya Yuda be nga kalane minkale ya late nye ngbwa, amu a mbe nnôme ngone Sekaria, mone Ara, a na, mone wé, Yôanañ, a nga luʼu ngone Mesulam, mone Berékia.

¹⁹ Be mbe be seʼe nye, me too, be kele fe kate nye mam ma kobô. Tôbiya a nga lôme bekalate ya ve ma woñ.