NEHEMIE 5 - Bible en langue Bulu

Mimfañ mi bôt mia tibili ayôme bôt: Néhémie a wosane mboon ôte

¹ Bôte yʼayoñ a e binga bap be nga tat abui a bobenyañ Beyude.

² Bevok be nga jô na: Biabebien, bobefame bangan a bobebinga bangan bi ne abui; bia kômbô nyoñe fôn, éyoñe te bia ye di a nyiñ:

³ ba bevok be nga jô na: Bia ve mefube bidi mangan, mefube mindiʼi mangan, a menda mangan éban, asu ya nyoñe fôn éyoñe mfumbale zaé a kuiya.

⁴ Befe be nga jô na: Bi nga kôlé moné bi liʼi mefube bidi mangan a mefube mindiʼi mangan éban, asu toya njô bôt.

⁵ Ve a too na bia fe bi beʼe menyôl ane bobejañ; bone bangan be ne fe ane bone bap: ve tame yene na, bi veñesaneya bobefame bangan a bobebinga bangan alo; be maneya veñesan abui ya bobebinga bangan alo, biabebien teke nguleya bo jam, mefube bidi mangan, a mefube mindiʼi mangan me ntoo asu bôte befe.

⁶ Me nga dañe wôʼô ôlun éyoñe me nga wôʼô ñyône wop a minkobô mite.

⁷ Nde me nga tyiʼi na: Ma zu ve biwôlô bi bôt a betyiʼi mejô mekua: ane me nga jô be na: Jia! Mia kôlé bobenyoñe biôm a nseñge! Ane me nga sulane beta ékôan amu ajô dap.

⁸ Me nga jô be na: Bi nga kôté bobejañ be nga kuaban e be meyoñ me ne te yeme Zambe a abime ngul bi nga bili, vʼéyoñe ji miabebien mia kuane bobenyoñe benan e be bôte ya ayoñe dangan! Be nga tabe bivô, amu be nji ke bi jame ya yalan.

⁹ Ane me nga kee nkobô ôsu na: Jam mia bo e nji ke bo mvaé. Ke mia yiane wulu mi koo e Zambe wongane woñ, éyoñe te meyoñ me ne te yeme Zambe, me ne besiñe bangan, ma ye bo te biasé bia?

¹⁰ Ma fe, bobejañe bam, a bisoé bebo bisaé bam, bi nga kôlé be moné a fôn, njamaʼane be mvôla éte!

¹¹ Bulaʼane be mefube bidi mabe den, nalé fe mefube mindiʼi map, beôlivié bab a menda map, ô laté a ngabe ntete ya moné, nyô ya fôn, avut a nyô ya mbon mi nga yemete be ane nsenge.

¹² Nde be nga yalane na: Bia ye bulane biôme bite, a bia ye bo te sili be jôm, bia ye bo e jam wo jô: ane me nga loone betuni a bo na bôte bana be kane ngana ya bo avale be nga jô ôsu viap.

¹³ Me nga samese mfeʼe yʼalôʼô dam a jô na: Avalʼébiene di nde fe Zambe a ye samese môt ase a ye bo te tôé mejô mé: a ye samese nye atan ya nda jé a atane ya biôme bié, nalé ba ye samese a liʼi môt ate te jôme mo! Ane ékôane bôt ése é nga jô na: Nalé a bobaʼan! A wumulu Nti. A bôte bese be nga bo ane be nga jô.

¹⁴ Ataté môse njô bôt a nga telé ma me bo ngovina wop, e si ya Yuda ataté mbu mewôme baa a kui mbu mewôme lale a baa njô bôt Artakzersés, tañe mimbu awôm a mibaé, toʼo ma, toʼo bobejañ, teke môt a nga nyiñ a akume da yiane ngovina.

¹⁵ Eyoñe te me ngenane te so, bengovina yʼôsu be nga liti bôt ényan, be nga sili be besikel be argent mewôm menyin, belet a woon bi bete yôp; toʼo bisoé bebo bisaé biabe fe bi nga tibi bôte yôp. Ma me nji ke bo nalé amu nkoone Zambe wome woñ.

¹⁶ Nalé fe na, me nga bo ésaé ya kôme mfine mekoʼo wu, a bi nji kuse afub éziñ, a bisaé bebo bisaé biam bise mfulaʼan, bi nga bo ésaé.

¹⁷ Bôt be nga di e tawôlô wom ntet a mewôm metan: Beyude, bekobô mejô, te lañe bôt be nga zu be bia be soʼo be meyoñ ma bômane bia.

¹⁸ Môs ôse be nga kômesane ma ngume nyak, mintômba misaman mi too ntoban a anen; a melu awôm mese, be nga kômesane woon ase a yian abui abui. Akôsa bo nalé me nji ke sili biôm bia yiane ngovina, amu adit ésaé é nga titi bôt bete bitul.

¹⁹ A Zambe wom! Ô simesaʼane ma mbamba nsimesan amu mam mese me boya asu bôte bana.