NEHEMIE 4 - Bible en langue Bulu

¹ Ve Sambala, Tôbiya, Bearabe, Beamônite a Beasdôdieñ, be nga dañe yaa éyoñ be nga wôʼô na nkôman mimfine ya Yérusalém wo ke ôsu, a na, mevôm mese me mbe ntuan, be tatéya na ba dibe me.

² Nde bese be nga vute ngame ya zu wosane Yérusalém a liti nye njuk.

³ Bi nga yeʼelane Zambe wongan, a bi nga telé nsamba bemombô môs baa alu amu be. Nalé bi nga kamane biabebien éyoñ ése be ne zu wosane bia.

⁴ Ve Yuda a nga jô na: Bôt be beʼe mimbeʼe be nji bi ngul a mevôm me ne ntyaman me dañeya abui: ajô te bi nji bi nguleya beta lôñe mfine mekoʼo wu.

⁵ A besiñe bangan be nga jô jô na: Ba ye bo te yem, a bo te yene jôm, akekui bi kuiya ézezañe jap: bia ye wôé be, éyoñe te bia ye telé ésaé.

⁶ Ve Beyude ba be be be nga too bebé be nga zu kate bia foé biyoñ awôme na: Ba so mevôme mese na be zu wosane bia.

Ngômôtô mfaʼa ésaé a mewosan

⁷ Nde me nga ke ma jeñ mevôm mese me ne e mvuse mfine mekok , me too édok, a telé bezimbi ane mebum me né, be bili fe minkpwaté mekôn a bilaé.

⁸ Eyoñ me maneya fombô ane bôt be tele, me nga kobô benya bôtô, bekobô mejô a ba bevoʼo bese na: Te koone be woñ! Mi simesaʼane Nti, nyô a ne anen a angôndô, nalé mia ye wosan asu bobenyoñ, bobefame benan a bobebinga benan, binga benan a menda menan!

⁹ Eyoñe te besiñe bangan be nga wôʼô na be kateya bia foé, ane Zambe a nga tyame jam be nga kômbô bo, ve bia bese bi nga bulane mfine mekok , môt ase ésaé jé.

¹⁰ Ataté môs ôte, ngabe jia ya bebo bisaé bam é nga lôñe mfine mekok , a nyô fok é nga bili mekoñ, biben, bilaé a melôʼô bityé. Bivet bi mbe bi tele e mvuse nda bôte Yuda ése.

¹¹ Ba be nga lôñe mfin a ba be mbe be kalaʼane mimbeʼe be nga bo ésaé a wo wua, wo ôvoʼo kik ô bili jôme mewosan;

¹² môt ase ya ba be mbe be lôñôk, a nga bili nkpwaté mekône wé ntiñetan angeteñ: be nga bo ésaé be too nalé. Môt a loñe toñ a nga tele ma bebé.

¹³ Ane me nga jô benya bôtô, bekobô mejô a bôte bevoʼo bese na: Ésaé é ne anen a ndam, a bi ne mmialan mfine mfin, bana ôyap a ba bevok.

¹⁴ Sulaʼan e fefele jangan, e vôm mia ye wôʼô tyiñe toñ: Zambe wongan a ye wosan asu dangan.

¹⁵ Avale te nde bi nga kee ésaé ôsu, éfase jia ya be bia é bili mekoñ ataté melendé me tyé, akekui éyoñ ateté da yené.

¹⁶ Eyoñe te fe nje me nga beta jô bôte na: Môt ase a ye lôt alu e Yérusalém baa mbo ésaé wé; bia yiane bi nsamba bebaʼale a alu, wôna a amôs bôte bese be bo ésaé.

¹⁷ A bia ye bo te vaa mengômesane mangan. Wôna ma, bobejañ, bisoé bebo bisaé biam, bôte ba mombô be nga tôñe ma: môt ase a nga bili ve biôm mewosan a mendim.