NEHEMIE 2 - Bible en langue Bulu

Nkeane Yérusalém

¹ E ngone Nisañ, mbu mewôme baa Artakzersés a nga jôô, woon a mbe a tele nyʼôsu, ane me nga nyoñe woon ate a kalane nye njô bôt. Mbot ô nji ke tame bo ma asu nalé éyoñ éfe asu dé.

² Nde njô bôt a nga sili me na: Amu jé asu dôé e ne éyôé, teke na wo kon? Ôlune te wo yiane bo ve wu ya nlem . Beta woñ a nga bi ma,

³ ajô te me nga yalane njô bôte na: Njô bôt a tabeʼe nnôm éto! Asu dam da ye bo te bo éyôé aya éyoñe tisone mesoñe bʼésaa bam é ntoo ntyaman, a mimbé mié ndiʼan a nduan?

⁴ Nde njô bôt, a jô me na: Wo sili ñhe jé? Me nga yeʼelane Zambe ya yôp

⁵ a yalane njô bôte na: Nge njô bôt a kañese, a nge mbo ésaé wôé a yeneya mvame be nye, lôme ma e Yuda, mfaʼa tisone mesoñe bʼésaa bam é né, naa me beta lôñe je.

⁶ Nde njô bôt ngal a too nye fefel, a nga yalane me na: Dulu dôé da ye tabe nté ôvé, a wo ye bulan éyoñ évé? Ajô te njô bôt a nga yene mvaé ya suu ma me ke, a me nga kate nye nté dulu da ye tabe.

⁷ Me nga jô njô bôte na: Nge njô bôt a yene mvaé nalé, be ve ma bekalate asu bejôô ya bifuse bi si bi ne Efrate yat, nalé ba ye jôʼé ma me lôt, akekui ma ye suane Yuda,

⁸ a kalate mfe asu Asaf, mbaʼale mefane njô bôt, éyoñe te a ye ve ma bilé asu mimbé ya beta nkaʼalé a ne bebé nda Zambe, asu beta mfine mekoʼo ya tison a asu nda ma ye ke tabe. Nde njô bôt a nga ve ma kalate ate: amu mbamba wo Zambe wom ô mbe be ma.

⁹ Ane me nga ke e be bejôô ya bifuse bi si bi ne Efrate yat a ve be bekalate be njô bôt. Njô bôt a nga lôme bivete minsamba mewosan a bebebe bikabela be ke liʼitane ma.

¹⁰ Eyoñe Sambala, mone Orônite, a Tôbiya, mbo ésaé a too mone Amonite, be nga wôʼô jame te, be nga nyoñe de mbia nyoñan nyô na: Môt a so na a zu jeñe mvaé bone bʼIsraél.

¹¹ Ane me nga kui Yérusalém a tabe été melu mela.

¹² Nde me nga kôlô si a alu, teke kate môt éziñ jame Zambe wom a nga futi e nleme wom été na me bo asu Yérusalém. Me nji ke bi tite fe ve nyô me nga bete yôp.

¹³ Me nga kui atan a alu, a lôt e mbé ya mbiʼili, asu e lôô ma mfaʼa ya anjeñe dragoñ, a mfaʼa ya mbé akun, me kele ma fombô mimfine ya Yérusalém mi nga buʼi, a mimbé mi nga diʼiban a nduan.

¹⁴ Me nga lôt bebé mbé anjeñ, a bebé étame njô bôt, ve vôme tit me nga bete yôp é mbe ngul ya lôt a mbe momo.

¹⁵ Me nga tulan mimbôʼôlé mi mveñ a alu ese, a ke ma fombô mfin. Eyoñe te me nga beta lôte mbé ya mbiʼili, a bulane mvus.

¹⁶ Bekobô mejô be nji ke yeme vôm me nga ke, nge jôm me nga bo. A kui éyoñe ji, me nji ke kate Beyude jam éziñ, nge betuni, nge biwôlô bi bôt, nge bekobô mejô, nge bôte bevoʼo be mbe be bili ésaé éziñ.

¹⁷ Ane ñhe me nga jô be na: Mi lôô abime njuʼu bi tele été di! Yérusalém a ne ntyaman, a mimbé mié ndiʼan a nduan! Zaʼan, bi tame beta lôñ mfine mekoʼo ya Yérusalém, nalé bia ye bo te beta nyiñ ôson été.

¹⁸ Ane me nga kañete be ane mbamba wo Zambe wom ô mbe be ma, a mejô njô bôt a nga kobô ma: nde be nga jô na: Nkôlaʼane si, bi lôñ! Ane be nga nyoñe ngul amu mbamba ntyiʼan be nga tyiʼi ate.

¹⁹ Eyoñe Sambala, mone Orônite, Tôbiya, mbo ésaé mone Amonite, a Gésém, mone Arabe, be nga wôʼô jame te, be nga woé bia a biasé bia. Be nga jô na: Jé mia bo le? Ye mia bene njôane njô bôt?

²⁰ Nde me nga yalane be na: Zambe ya yôb a ye bo na ésaé é wulu bia mvoʼé , bebo bisaé bé, bia ye kôlô si a lôñ: ve mia mi nji bi ngap, nge ngul, nge jame ya simesan e Yérusalém été.