NEHEMIE 13 - Bible en langue Bulu

Nkômane mam mevale meval

¹ Melu mete be nga lañ e kalate Môze été, bôte bese be too, a koone ntilane na: MonʼAmonite a mone Môabite be nji yiane nyiin ésulane bôte Zambe,

² amu be nji ke zu tôbane bone bʼIsraél be bili belet a mendim, a amu be nga kuse Balame na a yoʼé be: ve Zambe wongan a nga kôñelane biyoʼé bi bo bibotan.

³ Eyoñ be nga wôʼô atiñ , be nga kandé Israél a bikule bise.

⁴ Nalé a ngenan te boban, Eliasib, ntuni a mbe ntelan e bitune bi nda bi Zambe wongan, a too fe évuvumane Tôbiya,

⁵ a nga ve nye beta étune nda , e vôme mimvean, ôtu, biôm mebelan, ngab awômô ya fôn, mfefé woon a mbon, biôm bi nga veban asu Belévit, beyia bia a bebaʼale mimbé, a biôm be nga vaa asu betuni bi nga taté bo bi tabeʼe.

⁶ Me mbe momo Yérusalém éyoñe mam mete me nga boban, amu me nga beta bulan e be njô bôt, mbu mewôme lale a baa Artakzersés njô bôte ya Babilôn a nga too. Amané mbu, njô bôt

⁷ a nga ve ma nguleya beta zu Yérusalém, éyoñe te nje me nga yene mbia jam Eliasib a nga bo na a ve Tôbiya étune nda ya minseñe nda Zambe.

⁸ Nde me me nga wua biôme bi Tôbiya bise atan.

⁹ A me nga ve tyiñe na be mane tune bitune bi nda , éyoñe te me nga beta mane futi biôme ya nda Zambe été: mimvean a ôtu.

¹⁰ Be nga kate fe me na mengabe Belévit me nji ke veban, a na Belévit a beyia bia be nga bili bisaé ya bo be nga mane tup, môt ase afube dé.

¹¹ Nde me nga ve bekobô mejô bijô a jô be na: Amu jé nda Zambe é liʼiya teke môt? Ane me nga sulane Belévit a beyia bia a bulane môt ase ésaé jé.

¹² Eyoñe te Yuda ase a nga zuu ngab awômô fôn, mfefé woon a mbon e vôm ba naane biôm.

¹³ Esaé ya baʼale mevôm ba naane biôm, me nga ve je Sélémia ntuni , Sadok ñyeme bekalate, Pedaya wua ya Belévit, Anañ mone Zakur, mone Matania a too be fefel, amu mbamba jôé be nga bili na be ne zôsôô . Be nga nyoñʼésaé ya kabe bobenyañe babe biôm.

¹⁴ O Simesaʼane ma, a Zambe wom, amu jame te, a te tyame mimboone ya mbunan me boya mfaʼa ndaa Zambe wom a mame mé ya nkañan.

¹⁵ Melu mete, me nga yene bôt e Yuda, be miate bibuma e môse Sabat, be nyoñe mimbome bidi a beté mie e bijakase yôp, nalé fe woon, bibuma bi figié bibuma bi rézéñ a mevale mimbeʼe mefe, a zuu bie e Yérusalém môse Sabat; a me nga komekane be môse be nga kuane bidi biap.

¹⁶ Bôte ya Tire fe be nga too valé a mevale mʼakume mese a kuane me môse sabat e be bôte ya Yuda a e Yérusalém.

¹⁷ Me nga ve biwôlô bi bôte ya Yuda bijô a jô be na: Mbia jam mia bo nyô a tinane jé éyoñe mia ndaman étyi ya môse sabat ?

¹⁸ Ye saa nne bʼésoo benan be nga bo ana? Ajô te e Zambe wongan a zuu mbia be mame bana be bia a e tisone nyô. A mia mia kôʼôlan ayaa dé e nyôl Israél éyoñ mia ndaman étyi sabat !

¹⁹ Nné ane mimbé ya Yérusalém mi nga tabe e dibi été, te na sabat a kui, me nga ve abendé na be fete bivine mimbé a beta yoé mie ve e mvuse sabat . Me nga telé bevoʼo ya bebo bisaé bam e mimbé, be kamane na mimbeʼe mi bo te nyiin e môse sabat .

²⁰ Ajô te bebo makit a bekuane mevale me biôme mese be nga lôt alu da nge mebaé e Yérusalém atan.

²¹ Me nga komekane be a jô be na: Amu jé mia lôt alu ôsu mfin? Nge mia beta taté avale mboone te, ma ye futi mia mo nyôl. Ataté éyoñe te, be nji fe beta zu éyoñe sabat .

²² Me nga jô fe Belévit na: Be tune bebien a zu baʼale mimbé asu mbaʼalan étyi ya sabat . A Zambe wom, ô simesaʼane fe ma mfaʼa ôte, a baʼale ma aval ane mvame jôé é né.

²³ Eyoñe te fe me nga yene Beyude be nga luʼu bengone ya Asdôd, Amon a Môab.

²⁴ Efase jia ya bone bap be nga yeme kobô ve Asdônieñ, teke fe yeme kobô beyude; be nga yeme kobô ve minkobô ya meyoñ mefe.

²⁵ Nde me nga komekane be a yoʼé be; me nga bôme bevok a té be bisil, me jôʼô be be kane ngana a jôé Zambe na: Mia ye bo te beta ve bobebinga benan e be bobefame bap, a mia mia ye bo te beta nyoñe bobebinga bab asu bobefame benan nge asu denane miabebien.

²⁶ Ye sa mfaʼa te ñwô Solômon, njô bôte yʼIsraél, a nga bo abé ? Njô bôte mfe a nji bo ane nye, Zambe a nga telé nye njô bôte ya Israél ase; ve jame da na binga bikuu be nga dutu fe nye abé été.

²⁷ Bi nji kômbô beta wôʼô na mia bo bijabô bi nʼangôndô mfaʼa Zambe wongan éyoñe mia luʼu bengone bikuu.

²⁸ Wua ya bone be Yôyada, mone Eliasib, évete betuni, a mbe nnômengona Sambala, mone ôrônite. Me nga titane nye a kôlô ma mis.

²⁹ O simesaʼane be, a Zambe wom, amu be nga ve ésaé é nʼétyi mvin, nalé fe élate betuni a Belévit.

³⁰ Me nga tune be mfaʼa ya mone bikul ase a beta telé a yemete jame betuni a Belévit be nga yiane bo, môt ase asu ésaé dé été,

³¹ nalé fe jam da fombô mimvean ya njaʼa a biyoñ bi ne ntelan a bembômô . O simesaʼane ma mbamba nsimesan , a Zambe wom!