NEHEMIE 12 - Bible en langue Bulu

Betuni a Belévit

¹ Betuni a Belévit be nga so mekaban ba be Zôrôbabél mone Séaltiél, a Yasua, mbe ba: Seraya, Irméya, Ezra,

² Amaria, Maluk, Atuk,

³ Sekania, Rehum, Merémôt,

⁴ Iddô, Ginetôyi; Abia,

⁵ Miamin, Maadia, Bilga,

⁶ Semaya, Yôyarib, Yedaya,

⁷ Salu, Amôk, Ilkuia a Yedaya. Melu Yesua, bana bese be mbe bivete ya menda betuni a Belévit.

⁸ Bevoʼo ya Belévit be mbe môé na: Yesua, Binui, Kadmiél, Kérébia, Yeuda a Matania. Matania a bobenyañe bé be nga bo ésaé nyiane bia.

⁹ Bekbukia a Uni ba be be be nga bo ésaé bebé vôme wua.

¹⁰ Yasua a nga biaé Yôyakim, Yôyakim a nga biaé Eliasib, Eliasib a nga biaé Yôyada.

¹¹ Yôyada a nga biaé Yadua.

¹² Betuni ya melu Yôyakim be too bivete ya menda me bôt mbe ba: Méraya asu Seraya; Anania asu Yérémi,

¹³ Mesulam asu Esdras, Yôanañ asu Amaria,

¹⁴ Yônatañ asu Meluki, Yôsep asu Sebania,

¹⁵ Adna asu Arim; Elkayi asu Merayôt,

¹⁶ Zakari asu Iddô; Mesulam asu Ginetôn;

¹⁷ Zikri asu Abia Piltayi asu Minyamin a Môadia;

¹⁸ Samua asu Bilga; Yônatan asu Semaéya;

¹⁹ Matnayi asu Yôyarib; Uzi asu Yedaéya,

²⁰ Kalayi asu Salayi; Eber asu Amôk;

²¹ Akabia asu Ilkiya, Netanil asu Yedaéya.

²² Melu Eliasib, Yôyada, Yôanañ a Yadua, Belévit, bivete ya menda me bôt a betuni, be nga tilibane môé éjôé Darius, mone Perse.

²³ Bone be Lévi, bivete ya menda me bôt, be nga tiliban e kalate minkañete a kui melu Yôanañ mon Eliasib.

²⁴ Bivete Belévit: Akabia, Sérébia a Yasua mone Kadmiél a bobenyañe bap be nga tele bôte bevoʼo yat be yiʼa étôtok a duma Nti bia, avale David môta Zambe a nga bendé, be too minsamba minsamba.

²⁵ Matania Bakbukia, Abdias, Mesulam, Talmon a Akub, bebaʼale mimbé be nga bo ésaé bebaʼale be tele mimbé yôp.

²⁶ Be nga too melu Yôyakim mone Yasua, mone Yôsadak, a melu Néhémie ngovina, Esdras ntuni a ntili bekalate.

Mveane Zambe akaʼa ya Yérusalém

²⁷ Eyoñe mveane Zambe mfine ya Yérusalém ô nga kpwaan, be nga ke nyoñe Belévit mevôm mese be nga too a zuu be Yérusalém, nalé abôʼô da ye boban e mevaʼa été, a nyiane bia yʼékañaʼa, a mbômane biwoé, memvet a bingombé.

²⁸ Bone beyia bia be nga sulan be soʼo mefôla ma bômane Yérusalém a minlame ya Nétôfa,

²⁹ be soʼo fe Bét-Gilgal a mefane ya Géba a Azmavét; amu beyia bia be nga lôñe bebiene minlam e mefôla ma bômane Yérusalém.

³⁰ Betuni a Belévit be nga tune bebiene a tune fe bôte ya ayoñ, mimbé a mfin.

³¹ Me nga bo na bivete ya Yuda bi bet e mfine yôp, a me nga kôme minsamba beyia bia mibaé. Nsambʼôsu ô nga wulu e mfine yôb e mbo nnôm, be kelek e mbé akun.

³² Ozé a éfase bivete jia ya Yuda be nga wulu e mvuse jap.

³³ Azaria, Esdras, Mesulam,

³⁴ Yuda, Bényamin, Semaéya a Yérémi,

³⁵ bevoʼo ya bon betuni, be bili metoñ: Zakari mone Yônatan, mone Semaéya, mone Matania, mone Mikaya, mone Zakur, monʼAsaf,

³⁶ a bobenyañe bé: Semaéya Azaril, Milalayi, Gilalayi, Maayi, Netanil, Yuda a Anani, be bili biôme mezik bi David môta Zambe; Esdras ñyeme bekalate a too asuzoʼo wop.

³⁷ Eyoñ be kuiya mbé anjeñ, be nga teme na be kuiya abete ya vôm étabaʼa David é né; nde be nga bete je mfine yôb ôbien, a vôm ate be mbe ôyabe yôb a beta ndaa David, ane be nga kee dulu ôsu a kui mbé mendim, e tison mfaʼa jôp da tôô.

³⁸ Nsamba baa ya beyia bia ô nga taté dulu mbo ngal. Me nga too be mvus a éfase bôt évok, e mfine yôp. Bi nga lôte bebé nkume mimbeʼe mi nduan, a bebé vôme mfin ô ne ndam;

³⁹ bi nga kee dulu ôsu mbé Efrayime yôp, mbé Yekana yôp, a mbé bekos, éyoñ bi lôteya nkum Ananil a nkume mintet, bi nga lôte mbé mintômba a kui mbé bebaʼale.

⁴⁰ Minsamba beyia bia mi nga tebe e nda Zambe; ma a bekobô mejô be nga tôñe ma bi nga tebe.

⁴¹ Betuni: Eliakim, Maaséya, Miniamin, Mikaya, Elioénayi, Zakari a Anania be nga loñe metoñ.

⁴² Maaséya, Semaéya, Eléazar, Uzi, Yôanañ, Malkiya, Elam a Ezére fe be nga too. Beyia bia be nga yia tyiñe yôp. Evete jab é mbe Yizraya.

⁴³ Môs ôte, bôt be nga tyiʼi biôm abui a bo abui mevak, amu Zambe a nga ve be beta jam ya vaʼa nye. Binga a bongô fe be nga vak: bôt be nga wôʼôtane mevaʼa ya Yérusalém mete ôyap.

Mimvean asu betuni a Belévit

⁴⁴ Môs ôte, be nga telé bôt ba yiane baʼale bitune menda ba naane bembômô a mengabʼ awômô; be nga telé be na be ke ba nyoñe mengabe mete, mme atiñ da ve asu betuni a Belévit, mengabe mete me soʼo mefub ma bômane bitison. Bôte bese be nga vak amu ésaé betuni a Belévit be nga bo,

⁴⁵ ane be nga baʼale jam ese da fombô ésaé Zambe wop, a ésaé ntunan, nalé fe beyia bia a bebaʼale mimbé, avale David a Solômon mone wé be nga bendé;

⁴⁶ amu melu mvus, éyoñe David a Asaf, bivete beyia bia bi nga too, nalé fe bia ya nkañan a mvean akéva asu duma Zambe.

⁴⁷ Melu Zôrôbabél a Néhémie, Israél ase a nga ve mengabe beyia bia a ma bebaʼale mimbé môs ôse; avale te fe mfaʼa mengap me ne ntelan étyi asu Belévit, a Belévit be nga ve mengap me ne ntelan étyi asu bone bʼAron.