NEHEMIE 1 - Bible en langue Bulu

Meyeʼelane me Néhémie

¹ Mejô me Néhémie mon Akalia. E ngone Kisle, mbu mewôme baa, valé me too e nlô tison ba loone Suz,

² Anani, wua ya bobejañ, a bôte befe bʼéziñ valé, be nga so Yuda. Nde me nga sili be minsili ajô Beyude be nga fam nkeane minkôm, a ajô Yérusalém.

³ Ane be nga yalane me na: Ba be nga liʼi te ke minkôm, be nʼéfase si éte wé, be too e mbia njuʼu été a ôson été: mfine mekok wo bômane Yérusalém ô maneya ke wo buʼi, a mimbé yʼété mi maneya diʼiban a nduan.

⁴ Eyoñe me nga wôʼô mejô mete, me nga tabe si a yôn, a tabʼéyôé abe melu. Me nga tyi bidi a yeʼelan asu Zambe ya yôp,

⁵ a jô na: Héé, A Nti! Zambe ya yôp, Zambe a nʼanen a éko woñ, wo wo baʼale élat a liti mvam e be ba ba nyeʼe wo a baʼale mebendé môé!

⁶ Alo dôé e tame vôʼôlô, a mise môé me tame kuiban a yalane meyeʼelan me mbo ésaé wôé. Eyoñe ji ma yeʼelan asu dôé môs baa alu, asu bone bʼIsraél, bebo bisaé bôé, a mem abé bone bʼIsraél, abé dangan bi boya wo; ma a nda bôte jam bi boya abé .

⁷ Bi boya foʼo wo abé , a bi nji ke baʼale mebendé, memvinda a minjôan ô nga ve Môze, mbo ésaé wôé.

⁸ Simesaʼane mejô ô nga kobô Môze, mbo ésaé wôé na: Eyoñe mia ye bo bijabô, ma ye mialane mia e meyoñ été.

⁹ Ve nge mia beta bulan e be ma, a baʼale mebendé mam, a bo me, éyoñe te ñhe ma ye kôane mia, jaʼana mi nga wuaban e fé a kui e susuʼa yôp, a ma ye bulane mia e vôme nyô me nga tobe na jôé dam da ye tabe.

¹⁰ Be ne bebo bisaé bôé a e bôte bôé ô nga kôté a beta ngule wôé, a wo wôé ô nʼéwôlô.

¹¹ A Nti! Alo dôé e tame ñhe vôʼôlô meyeʼelane me mbo ésaé wôé, a meyeʼelane bebo bisaé bôé ba kômbô ko jôé dôé woñ! Kañeseʼe dene na, mam me mbo ésaé wôé me wulu mvoʼé , a boʼo na me yene mvam e be môte nyô. Melu mete me mbe mbi élaé e be njô bôt.