NAHUM 3 - Bible en langue Bulu

Tison ja kuli metyi, mimbim mia zu bômbô été

¹ Bidim a tison ja kuli metyi, nyô é ne njalan a wup a bikôʼôs, nyô é ne njalan a ñwôlane bôte biôm a nji jeñe biôme ya bi.

² Eduñe nkasa a éduñe minka; bikabela bia yôô, bevagoñ ba sembe.

³ Bikabela bia kui bita, nkpwaté mekôn wo ngemban, akoñ da kuli minkôkô mié; ézuʼu bôt é maneya balé meveñ! Mimbim mi ngunu si! Mimbim tekʼalañé! Bôt ba ke ba kolé mimbim!

⁴ Amu abui mejian me minga ébamba, njalan a bijañ, ntebʼôsu mame me ngbwee, a nga kuane meyoñ me bôt a mejiane mé, a kuane fe meyoñ me bôt a ngbwele jé.

⁵ Me ne wo ngame yat, nalé Nti ya minsamba mewosan a jô, ma ye ves éziñgi jôé a beté wo je asu, ma ye liti meyoñ e soé jôé, a ôsone viôé e be bijôé ya si nyô.

⁶ Ma ye kute wo mbuan asu, ma ye vaa abeñe dôé, a ma ye bo wo jôme bôt ba beme mis.

⁷ Nalé ate môt ase a ye yene wo a ye tub a ke wo ôyap, a jô na: Ninive a ntoo bilik. Za a ye ko nye éngôngo? Mvolane nlem wo ye so nye vé?

Aval e nga kui Tebés nde da ye kui Ninive

⁸ A Ninive, ye wo dañe Tebés, tison é ne nlôñan e zañ asôé, mbômaʼane a mendim? Nkaʼalé wé ô mbe mañ, mañ me too fe mfine wé.

⁹ Etiôpi é nga bili ngul é ne te nné, nalé fe Ejipte. Bôte ya But a ba ya Libi be mbe bôt mia be be mi nga bo élat.

¹⁰ Ve da nye fe a keya mekaban, a nga ke a too nkôm; minkeñelé mi bone mié fe mi nga koʼoban e fefele minjoñ mise. Be nga kabane benya bôtô bé a mboon asimba , e beta be bôte bé be mbe ntiñetane bengôkop.

¹¹ Wo fe wo ye bili bilam, wo ye sobô; wo fe wo ye jeñ asoé ya sobô besiñe bôé.

¹² Aleme dôé ese e ne ane bibuma befigié bi maneya tôlôbô bi ntoo nteʼan abui; éyoñ ba suʼu befigié, bibuma bite bia ku anyu ya nyô ase a kômbô di bie.

¹³ Bôt ô bili be ne ve binga be too ézezañe jôé. Mimbé ya si jôé mia yombô asu besiñe bôé ne ngeññ. Nduan ja diʼi mengôñe môé.

¹⁴ Laane mendim, a bôte ya Ninive amu ndilane ba ye dili mia bita wo ye kui be wo! Kômʼaleme dôé! Nyiʼin e mbotoʼo été a tibi ékon a mebo! Betaʼa kôm ébé ba diʼi brik!

¹⁵ Vôm ate nduan ja ye mine wo nkpwaté mekôn wo ye wôé wo, wo ye wôé wo ane meselek! Boʼo womien avis ane meselek! Boʼo womien avis ane bitandak!

¹⁶ Ô nga bulane bebo makite bôé be bo abui a dañ ateté ya yôp; aselek da ndamé mefab a yele.

¹⁷ Bebaʼale bôé be ne bitandak, bebo bisaé bôé ane mbame bembaʼasan, ba bebe minkaʼalé mi sam, éyoñ aveb e né. Eyoñe jôp da tôô, ba mane yele, teke na môt a ne beta yem e vôm be mbe.

¹⁸ A njô bôte yʼAsiri, bebaʼale mintômba bôé ba ke ôyo, biwôlô bi bôte biôé bi tele teke fôʼôsan: e bôte bôé be maneya mialan e minkôle minkô, a môt ya kôane be vôme wua a nji bo.

¹⁹ Teke mvolan ô ne yené asu aveñe dôé. Fôle jôé é ne ve nyô ja wôé. Ba bese ba ye wôʼô be kobôʼô ajô dôé, ba ye kute wo kôp; amu za nye ézezame jôé é nga bo te nambe teke awoʼon?