NAHUM 2 - Bible en langue Bulu

¹ Mbeʼe mbañete a mate mbil e minkôle yôp, a kate mbamba foé ya mvoʼé : Jeme mebôʼô môé a Yuda, boʼok e mam ô nga tiñeti amu mbia môt ate a ye bo te beta lôte wo zañ, ngule jé é maneya ne meñ.

² Nyô a tyame minlam a zu wosane wo, baʼaleʼe ôleme viôé! Mombôʼô e zene yôp! Yemeteʼe angeteñ dôé, boʼo ayok a ngule jôé ése!

³ Amu Nti a beta telé étôtoʼo Yakob, avale fe ane duma Israél, amu besa biôm be nga sa be a mane tyiʼi mintyaé mindiʼi miap.

Ninive a kuya

⁴ Ebene ya mimbene mié é ne nduban évele; Bezimbi be beʼe mengômesan me ne nyôl angôô. Eyoñe bevagoñ ba bete nnoñ, bityé biab bia ngemban ane nduan, a mekoñ ma fôʼôsan.

⁵ Bevagoñ ba wulu minjoñ a ayoʼo ese, a vasane mevôm mevôm. Bia yené vʼane belambe, bi wuluʼu fʼavô ane feleves.

⁶ Njô bôte ya Ninive a loone biwôlô bezimbi bié ve ba zu ba kolé abak éyoñ ba wulu, ba ke mbi akaʼa ya tison a tebe mvus ében.

⁷ Mimbé ya ôsôé mi yombôya, a nda njô bôt é kuya si!

⁸ Eveʼela Zambe minga é ntele nsoé, be vaaya je. E binga ba baʼale je ba tat ane vôme bezum ba yôn; ôlune wob été, ba kute mo tôé.

⁹ Ninive, aso melu mvus, a nga funane fôndô mendim, éyoñe ji mese me nga mane kui atan! Tebaʼane mvoʼé , yemane ngu! Ve teke môt a fombô mvus!

¹⁰ Wôlaʼane argent, Wôlaʼane or, bi ne bidi bi biôm bi ne tekʼamané, avise ya mevale me biôm mese me nʼédima!

¹¹ Biôme bise bi ne mfitan, nteʼane si, ntyaʼan, ngule nlem ja man. meboñ ma nyiʼibi menyôl ma fôʼôban, a mesu ma bo éyôé.

Ninive a funane ngbwengbwem é bibaneya

¹² Abôʼa bengbwengbwem e ne vé? Bitoñ bengbwengbwem bi nga boʼo bi koʼone bidi biabe valé éyoñe nnôme ngbwengbwem a mbe a kele nsôm, minlem mi bon mi nji tyebe yôb a môt éziñ.

¹³ Nnôme ngbwengbwem a mbe a lamesaʼan mfaʼa ya ve bone bé bidi, a mbe a wôék asu beyale bé; a mbe a jaléʼé mefub mé a betit a bi, a mebôʼa mé a mimbaane betit.

¹⁴ Me ne wo ngame yat. Nalé Nti a ne ngul ése a jô! Yaa, ma ye bo bevagoñe bôé ve ôtita ôtita. Nkpwaté mekôn wo ye mine bitoñe bengbwengbweme biôé. Ma ye telé ñwôlane biôme wôé e si nyô, a ba ye bo te beta wôʼô tyiñe ya minlômane miôé.