NAHUM 1 - Bible en langue Bulu

¹ Nkulane mejô asu Ninive. Kalate ñyenane mame Nahum môte ya Elkôs.

Zambe, ékowoñ a mbamba môt

² Nti a ne e Zambe a nʼaban, a kun émien; Nti a kun émien, a ne njalan a ayaa; Nti a kun émien e be besiñe bé, teke jamé be.

³ Nti a ne te jiʼa yaa, anene dé da so e ngule jé; a ne te jamé môt a bili mekua; Nti a lôt ôlende été a ôkôs été. Minkut mmie mi ne mbuluk ya mebo mé si.

⁴ A bamé mañ, me ve kôt, a vele asôé ese. Basañ a Karmel ba joʼolan. Sam ya Libañ fe ja joʼolan.

⁵ A bo minkôle na mi fôʼôsan; a bone minkôle na mi nyemé si ja bulekan asu dé émo a bôte bese be too été.

⁶ Za a ne jibi ayaa dé? A za a ne tebe ayôñ ayaa dé e ngame yat? ayaa dé da mialan ane nduan a bôé mekôk.

⁷ Nti a ne mbamba môt, a ne vôme ya sobô e môse ya njuk; a baʼale ba ba ke sobô be nye, jaʼan éyoñe ntyôa ô ne ngu wo lôt.

⁸ Ve a ye jiane vôme nyôna ne meñ a mendim ya ndôn, a a ye tôñesane besiñe bé akekui dibi été.

Mimbañete asu Yuda a Ninive

⁹ Mia bôndé feʼe ya bo Nti jé? Nye a jian ne meñ! Ôlun woo ye ke bo biyoñ bibaé.

¹⁰ Toʼo be maneya tiñetan ane minsinik, toʼo be biliya a nyuane bilam, ba ye mane diʼi bese ane minkôte bilok.

¹¹ Môt a nga bôndé feʼe ya bo Nti abé a nga so be wo, nyô a nga bili asimesane momo môt.

¹² Avale di nde Nti a jô na: Nge be ne bese, toʼo be ne abui aya nge ngu, ba ye jañ, jôm teke liʼi. Akôsa bo me nga liti wo njuk maa ye ke beta liti wo wô.

¹³ Eyoñe ji ma ye buʼu ébôñeté jé é vase be wo, a ma ye té mengataʼa môé.

¹⁴ A Ninive, jame Nti a bendé ajô dôé nde di: Wo ye bo te beta bi mvoñe bôt é beʼe jôé dôé; ma ye vaa ngunemelan é ne nkpwelan a éveʼela é ne mboon a nyeman étyé e ndaa Zambe wôé; ma ye faʼa soñe jôé amu ô nji beta bo mfañe jôm.