Mm 9 - Bible en langue Bulu

Ndôbaʼane Nti baa Saül e zene Damas

¹ Saül ve ke ôsu, te vôʼôbô ajô bisisia a ñwôane beyéʼé be Nti.

² Ane a nga ke sili Ntuni nnen a ve nye bekalate ya ke meba me Zambe ya Damas. Ôsimesane wé ô too na, nge a yene bôt, befam nge binga ba buni, a kele be nkaʼane mengataʼa Yérusalém.

³ A ngenan a kele zen , bebé ya kui Damas, ateme na beta éfufup, a soʼo yôp, a nga bômane nye a minkôkô mié.

⁴ Ane a nga ku si a wôʼô tyiñ é jôʼô nye na: A Saül, a Saül, amu jé wo kpweʼele ma? A nga yalane na:

⁵ A Nti, ô ne za nye ma kpweʼele? Nti na: Me ne Yésus, ma wo kpweʼele.

⁶ Kôlôʼô si ô ke tison, e wé nye ba ye liti wo jame wo yiane bo.

⁷ E bôt baa be nye be nga too nsamba, be nga too feʼe ne vema. Be nga wôʼô tyiñ , ve te yene môt.

⁸ Saül a nga kôlô si. Akôsa bo mis me mbe nye nkuan, ve a nji fe beta yen. E bôte baa be nye be mbe nsamba be nga ke be bili nye wo a kui Damas.

⁹ Valé a nga bômbô melu mela te yen, jaʼane di nge nyu.

¹⁰ Nyéʼé wua a mbe jôé na Ananias, a nga to Damas. Nti a nga loone nye biyeyem été a jô nye na: Ananias, nye ke ve yebe na, ma nyô a Nti.

¹¹ Ane Nti a nga jô nye na: Wo ye ke njoñ ba loone na Tetele njoñ, ô sili môte ya Tarse a ne jôé na Saül, e nda be Yudas. A ne été, a boʼo meyeʼelan.

¹² A yeneya môt a nyiʼin a betéʼé nye mo na a beta yen.

¹³ Ananias a nga yalane na: A Nti, me wôʼôya bôt abui be kobôʼô ajô môt ate, be simesaʼan abé ese a nga bo mimfufube miôé e Yérusalém.

¹⁴ A ngenan a bili ntute ngul a nga nyoñe be betuni benen benen, mfaʼa ya kaʼa ba bese ba loone jôé dôé.

¹⁵ Ve Nti a nga jô nye na: Kelek, amu môt ate a ne ékpwelé me tobeya mfaʼa ya miase jôé dam e be meyoñe bikuu, bejôô bôt a mvôʼô Israél.

¹⁶ Mamien ma ye tyeñele nye mam mese a ye jibi amu jôé dam.

¹⁷ Ane Ananias a nga ke a nyiine nda été, a beté nye mo a jô na: A Mojañ, Saül, Nti nye a te lôme ma, e Yésus a nga yené e be wo zene yôbe ya dulu dôé, nde wo ye beta yen a jaé ne lut a Mfufube Nsisim.

¹⁸ Biôm, ane ndalebôbôp, bi nga kôlô nye mis a ku si été été, ane a nga beta yen. Nde ñhe a nga duuban.

¹⁹ Eyoñe be nga ve nye bidi, ane a nga beta nyoñe ngu. Ane a nga tabe abe melu baa be beyéʼé ya Damas.

Saül a taté ésaé ya kañete Krist

²⁰ A, teke yange, a nga taté kañete e meba me Zambe été na: Yésus a ne mone Zambe.

²¹ Bôte bese be nga wôʼô nye be nga semé, a jô na: Ye saa nye a nga wosane bôte bese be nga loone jôé dina e Yérusalém? Ye mia jô na a nji vañe zu bole bôte na a kee be nkaʼane be betuni benen?

²² Ve Saül a nga ke ôsu a bôôé bôte minleme si, a a nga jañele Beyude ya Damas fek, a tuʼa liti be ndeme na Yésus a mbe foʼo Mesie.

²³ Eyoñ é lôteya ôbe ayap, ane Beyude be nga kui tyiñe ya bo na a wôéban.

²⁴ Ve Paul a nga yeme nkuane tyiñe yʼémoʼo jap. Amu be nga kui vôme ya baʼale mimbé ya tison alu baa môse na be wôé nye.

²⁵ Vʼalu éziñ, beyéʼé bé be nga suu nye si e tetele beta mfine ya nkaʼalé a too e mone nkoé été.

²⁶ Eyoñ a nga kui Yérusalém, Saül a nga veʼele jeñe na, beyéʼé be tabe nye ndi; ve bese be nga ko nye woñ, teke ngule ya buni na a mbe foʼo ñyeʼé.

²⁷ Ane Barnabas a nga nyoñe nye e nsamba wé, a liti nye minlôman. A nga kañete be ane a nga yene Nti e zene ya Damas, a aval a nga kobô nye. A nga kañete fe be avale Saül émien a nga kañete jôé Yésus a ngul ése.

²⁸ Ataté éyoñe te, Saül a nga fubu nsamba wop, meke a meso ya Yérusalém, be kobôʼô a ngule minlem a jôé Nti.

²⁹ Be nga laan, baa be Behéléniste a sañetan. Ve mfaʼa wop, be jeñe mezene ya wôé be.

³⁰ Eyoñe bobenyañ be nga wôʼô nalé, be nga ke litane be e Sézaré, e wé, be nga bo na be ke Tarse.

³¹ Keké é nga nyiñ évôvoé été e mefôla mese ya Yudé, Galilé a Samari. E nga wôn, a wulu a woñ mfaʼa Nti a, amu mvolane Mfufube Nsisim, é nga yaé.

Pierre a saé Enée a wômôlô fe Tabita

³² Amu e nga bo e kui éyoñ ése na, Pierre a ke a wulu. A bo a kele be bebuni ya Lida.

³³ Ane a nga yene môt a too jôé na Enée, e Lida wé, a mbôô e ntuʼu énoñ, tañe mimbu muam; a nga to ñyeyem.

³⁴ Pierre a nga jô nye na: A Enée, Yésus Krist a saé wo, kôlôʼô si a kôme énoñe jôé womien. Eté été, a nga kôlô si.

³⁵ Eyoñe be nga yene nye, bôte bese ya Lida a njeʼese ya Saroñ be nga meme Nti.

³⁶ Minga éziñ a mbe Yopé a too ñyeʼé; a mbe jôé na Tabita, nge na Dorkas A mbe kum mfaʼa ya mbamba mimboon a mimvolan a nga bo a volôʼô bôt.

³⁷ Melu mete, a nga kon a wu; éyoñe be nga mane woʼo nye mendim, be nga bôôé nye étune nda ya yôp.

³⁸ Mbôle Lida a nga too bebé a Yopé, beyéʼé be nga wôʼôtane na, Pierre a mbe wé, ane be nga lôme bôte bebaé na be ke loone nye, a jô nye na: Tôñe bia, te yange.

³⁹ Teke yange, Pierre a nga ke baa be be. Eyoñ a nga kui, be kele nye étune nda ya yôp. Minkuse mise mi nga yône nye mis, mi litiʼi nye biyé, a belenekôt a nga bo a jaléʼé be éyoñ a nga vee.

⁴⁰ Ane Pierre a nga kuli bôte bese atan. Ane a nga kute meboñe si a yeʼelan; ane a nga kôñelan asu mfaʼa mbim ô nga bôô, a jô na: A Tabita kôlôʼô si! Ane a nga kui mis a yene Pierre. Ane a nga nyokan a tabe tôtoo.

⁴¹ Be nga bi nye wo, a telé nye tetele a beta loone bebuni a minkus, a liti be nye a ntoo vevee.

⁴² Bôte bese ya Yopé be nga yem ajô te, a abui bôt e nga buni Nti.

⁴³ Pierre a nga tabe ôbe ayap e Yopé, e nda Simon a nga bo a kôme bikôp.