Mm 6 - Bible en langue Bulu

Atataʼa ésaé bediakon

¹ Melu mete tañe beyéʼé é nga bet a, Behéléniste be nga kobô Beyude abé e menyiñ. Amu be nga vuane minkuse miap éyoñ be nga kabe biôme ya môs ôse.

² Ane minlôman awôm a mibaé mi nga sulane beyéʼé bese ékôan a jô be na: E nji bo mvaé na, bi lik ésaé Nkatane Mbamba Foé amu ésaé betawôlô be ndian.

³ Jibaʼa jeñan e zañe jenan bôte zamgbwa, bôte mi lôô zôsôô , njalan a Nsisim a fek, ane bia ye ve be ésaé te.

⁴ Ve mfaʼa wongan, bia ye ke ôsu, a tindi ésaé meyeʼelan a ji nkatane Mbamba Foé.

⁵ Ane ékôan ése é nga kañese njôane te: ane be nga tob Etienne, môt a bili mbunan, njalan a Mfufube Nsisim, nalé fe Filipe, Prokor, Nikanor, Timon, Parménasa, Nikôlas ya Antiôche.

⁶ Ane be nga liti be minlôman. Wôna, be nga yeʼelan a beté be mo.

⁷ Ajô Zambe e nga mialan a tañe beyéʼé é nga dañe bete Yérusalém. Abui betuni e nga buni.

Ba bi Etienne a bôte nye mejô

⁸ Etienne, môt a mbe njalan a mvam , a ngul. A nga bo bitua bi mam a mendem bôt be nga semé zañe jap.

⁹ Eyoñe te ñhe, bôte ya Sinagôg, ba be nga nyoñ éto fili a bôte ya Siréne, a ba ya Alékzandri a ba ya Silisi a Azi, baa be Etienne be nga taté sañetan.

¹⁰ Ve mbôle be mbe tee benya bifia ya dôngane nye amu feʼe jé a Nsisim ô nga ve nye ngule ya kobô,

¹¹ be nga viane tindi bôt be jô na: Bi nga wôk a kobôʼô Môze a Zambe abé .

¹² Ane be nga sômôlô bôt. Eyoñe te bemvendé, a beyem bekalate be nga bi nye atemetem, a kee nye Sanédreñ.

¹³ E wé nye be nga bôte nye mejô, a jô na: E môte mi lôô nyô a kobô vôm a ne étyi mbia be mam, a nambeʼe metiñ.

¹⁴ Bi nga wôk a jôʼô na, Yésus ya Nazarét a ne ngule ya tyame nye a tyendé fe memvinda me Môze a nga ve bia.

¹⁵ Bôte bese be nga too Sanédreñ be nga lô nye ne fonoo, a yene asu dé e funaʼane di éngele.