Mm 3 - Bible en langue Bulu

Pierre a saé ñyeyem

¹ Pierre ba Yôanes be nga bo be kele bo meyeʼelane ya mewolo melale mamengôʼé e nda Zambe.

² Be nga bo be kele tooé môt a mbe ñyeyem aso abialé, môs ôse, be nga tooé nye fefele mbé ya nda Zambe été, ñwô be nga loone na abeñe mbé , amu na, a jaʼé bôte be nga nyiine nda Zambe mimvolan.

³ Eyoñ a nga yene Pierre ba Yôanes, be yeʼe ke nyiine nda Zambe, a nga simesan e nleme na, be fe ba ye ve nye mimvolan.

⁴ Ane Pierre baa Yôanes be nga yene nye a jô nye na: Fombôʼô bia!

⁵ Ane ñyeyem ô nga fombô be, a ndi nleme na, a ye nyoñe mvolane be be, or, nge argent.

⁶ Ane Pierre a nga jô nye na: Me nji bi or nge argent, ve jôme me bili, nje ma ve wo, a jôé Yésus ya Nazarét, wuluʼu!

⁷ Ane a nga bi nye wo ya mbo nnôm, a bete nye si. Awolo te ebien, nde mebo mé a mvoñelô bi nga bi ngul.

⁸ Eté été, nye ve yôô, a tebe tetele, a nga wulu. A nga nyiine nda Zambe baa be be, a ke a tyele, a kañe Zambe.

⁹ A bôte bese be nga yen a wuluʼu a kañe fe Zambe.

¹⁰ Be nga yeme nye, a jô na: Teke selan, nye foʼo a nga to abeñe mbé ya nda Zambe a jakéʼé bôte mimvolan. Nde bôt be mbe ne vema, feʼe njañan a jam e nga kui be nye.

Pierre a nyoñ nkobô éyoñe baa

¹¹ Amu môte nyô a nji fe kandane Pierre baa Yôanes, nde bôt bese be nga ke mimbil a bômane be. Feʼe ne vema e mbé yôp, e wu be nga loone Mbé Solômon.

¹² Eyoñ Pierre a nga yene be nalé, a nga nyoñe nkobô a jô be na: A mvôʼô Israél, mia vembe étua jam ji amu jé? Nge na, mia fombô bia ne fonoo aya, aval ane nge bia te saé môte nyô a ngule jangane biabebien, nge amu bia bulu nyeʼe Zambe?

¹³ Yemane na, e Zambe Abraham, Izak a Yakob, e Zambe bʼésa bangan, a maneya wumulu mbo ésaé wé Yésus, nye ate mi nga koñ a kate nye mis me Pilate. Mfaʼa wé, a nga kômbô suu nye.

¹⁴ Mi nga bo Mfufup a zôsôa môte njet, a viane mvamane ñwôé bôt.

¹⁵ Ntômba ô bili ényiñ, mi nga bo na ô wu. Zambe a nga wômôlô nye miñwuan. Bi ne bengaa.

¹⁶ Amu mbunan e be jôé Yésus, jôé te e ndôme saé môte mi lôô nyô, a nye mia tuʼa yem. A e mbunane wo so be Yésus, ñwô wo te bo môte nyô nya mvoʼé ane mia bese mi lôô.

¹⁷ Yaa, a bobejañ, ma yeme na, amu ndiman, mi nga bo jame te, jaʼane betebe ôsu benan.

¹⁸ Zambe, nye a nga kobô ajô di anyu be bekulu mejô bese na, nyô a ne ñwoʼone mbon a ye wôʼô mintaé, nde a ndôme mane tôé di.

¹⁹ Kôñelaʼane ñhe minlem, a bulane be Zambe, ndembene mam abé menan me vas;

²⁰ nde biyoñe ya évôvoé bia ye so, mbie Nti émien a ye ve, éyoñ a ye lôme Krist, nye ate a ne mia mveban.

²¹ Yésus ate a yiane nyoñeban yôp, a kui biyoñe ya Zambe a nga jô bie anyu be mimfufube bekulu mejô ya kôa.

²² Ôsusua, Môze a nga jô na: Zambe a ye kuli zañe jenan, ézezañ ya bobenyoñ, nkulu mejô, a funaʼane ma; mia ye vôʼôlô nye, mfaʼa ya mam mese a ye jô mia.

²³ A môt ase a ye bo te vôʼôlô nkulu mejô ate, a ye vas ayoñ été.

²⁴ A bekulu mejô bese, ataté e be Samuél, a ba be nga tôñe nye mvus, be fe, melu map, be nga kobô ajô ya melu bi too ma.

²⁵ Mia bete mi ne bone bekulu mejô, a élate Zambe a nga bo a beéso benan, éyoñ a nga jô Abraham na: E be mvoñe bôte jôé, menda me bôte mese ya si nyô ma ye nyoñ ébotan.

²⁶ Mia bete Zambe a nga taté kuli, a lôme mbo ésaé wé, a botane mia a na, a bo môt ase ya be mia a liʼi mbia mimboone mié.