Mm 27 - Bible en langue Bulu

Dulu ya Italie

¹ Eyoñ be nga tyiʼi na bia ke Italie, ane be nga ve Paul a mimbôʼô mivoʼo mo me évete bezimbi ntete wua. A mbe jôé na, Yulius ya nsamba Augustus.

² Ane bi nga bete sitima Adramite, a ke ékôte mañe ya Azi, a wulu mañe mañ. Môte ya Masédôan, afôla ya Tésalônik a too jôé na, Aristark, a nga zu nsamba wongan.

³ Tyé kpwaa, bi nga tebe Sidoñ, amu Yulius a nga semé Paul. A nga jôʼé nye a ke yene bemvôé bé, a bi maʼa ya nyoñebane be be.

⁴ Akôlô ya valé, bi nga ke dulu ôsu e mañe mañ, a lôte Sipre, amu évuñulu é nga ndeñele bia.

⁵ Ane bi nga dañe mañe me nga womôlô Silisi a Pamfilie, akekui Mire, afôla ya Lisié.

⁶ Valé, évete bezimbi ntete wua é nga yene sitima ya Alékzandri a kele Italie. A nga bo na bi bet été.

⁷ Dulu dangan e nga bo njuk abe melu, te ngule ya wulu avô. E nga bo bia ayaé na, bi kui knide amu évuñulu. Nde bi nga viane womôlô kréte, mfaʼa ya Salmoné.

⁸ Eyoñ bi lôte kréte, ane bi nga kui vôme ba loone na: Abeñe kindik, bebé a tison é ne jôé na Lasé.

⁹ Eyoñ ôbe ayap ô nga lôt, e nga to angôndô ya wulu mañe mañ, e too ke na, éyoñe ya bômbô zaé asu nkañan é maneya lôt. Paul a nga kômbô liti be ôsimesane wé avale di na:

¹⁰ A bemvôé bam, ma tuʼa buni na, dulu ya mañe mañ éyoñe ji, da ye soo bia bidim a beta njañelan, sa ve akum étam a sitima, ve jaʼane binyiñe bi bôt.

¹¹ Ve évete bezimbi ntete wua é nga too ñwulu sitima baa éjiane Masa ndi a dañe nkobô Paul.

¹² Evete bezimbi ntete wua é nga dañe buni ôsimesane ntebe ôsu, a e wu mie sitima, a lôte wu Paul. Ve amu melu ya ôyôn me mbe abé kindik éte, beta ngabe ya bôt a mbe tyiñe na, be kee dulu ôsu. Be veʼe feʼe na, be ne kui Fénix, kindiʼi ya Kréte é mbe é yoo, asu nkean éwome ya mfaʼa jôp da tôô, a ji ya mfaʼa jôp da dime na, be ke yange ôyôn ô man.

Okôs wo vun be mañe yôp

¹³ Mone mfep ya alumbu nké a nga bo. Ane be nga vaʼa na, e feʼe wop a ne tôéban. Be nga ke tetele éwome mañe ya Kréte.

¹⁴ Atemeteme na, mbia ôkôs a soʼo ékôte mañ, ba loone ôkôs ôte na, érakiloñ, a nga zu jimbi be.

¹⁵ Ane ô nga kee sitima, nye teke fe ngule ya bet. A teke ngule ya beta liti zen , ane évuñulu é nga woʼotô bia.

¹⁶ E tee mon ékôte mañ ba loone na kôda a volôʼô bia, nde bi nga bi éyoñe ya bôndé fek, a ngule ya wulu sitima.

¹⁷ Ane beliti zen ya sitima be nga ke selé nye kindik a tiñeti nye minkol mbômaʼane. Nalé, amu be nga ko woñ ya ke jimbi mebôme me nselek ya biwome bi kindik ya Libie. Ane be nga telé, a jôʼé na évuñulu nje é woʼotô bia.

¹⁸ Tyé kpwaa, amu mbia ôkôs a nga ke ôsu a fôʼô bia, ane be nga jibi wua akum ôsôé.

¹⁹ Wôna, môse lale, a mo map bebien, be nga ke ôsu a kandé biôme ya sitima a wua bie mañ été.

²⁰ Bi nga tabe abui melu, te yene jôp nge ateté. Okôs ô nga too angôndô, aval ô ngenane te tame yen, avale ya na, bi nga jañele ndi minlem ya nyiñ.

²¹ Bôte be nga tabe ayap, teke di jôm. Ane Paul a nga tebe tetele a jô na: A bemvôé bam, nge mi nga ye wôʼô melebe mame na, bi bo te tame kôlô Kréte, ve bi nji tôbane avale njuʼu di, a jañele abim akume di.

²² Eyoñe ji, ma yeʼelane mia na, mi bo ngule minlem. Amu teke môt éziñ ya be mia a ye jañele ényiñe jé, sitima étam nye bia ye jañele.

²³ Alu ebiene di, éngele Zambe wom, nyô ma bo ésaé, a te yené e be ma,

²⁴ a jô me na: A Paul te ko woñ, amu wo yiane kobô asu njô bôte nnen. A Zambe a ye nyii bôt bese mia be be mi ne nsamba.

²⁵ Ajô te boʼone ngule minlem, a bemvôé bam, amu da ye bobane nalé.

²⁶ Ve da, bia ye foʼo ke jimbi ékôte mañ éziñ.

²⁷ Alu awômô a nyini, nde évuñulu é nga kee bia e mañe ba loone Adriatik. Wôna, e zañe alu, beliti zen be sitima be nga taté wôʼôtane si.

²⁸ Eyoñe be nga wua ôsoñoʼo, be nga yene nté édok ô nto méta awôm a étan.

²⁹ A woñe ya na, sitima a za jimbi mekok , be nga wua bitelé bi nyiine mvuse sitima a febe tyé a ôkaé.

³⁰ Beliti zene ya sitima be nga jeñe zene ya tup. Ane be nga suu bial wo litane bôte ôsôé, a be nga vañe jô bôte na, be futi bitelé ôsu ya sitima.

³¹ Ve Paul a nga jô mbaʼale sitima ya Rôme a bezimbi na: Nge bôte ba be kôlô sitima été, be se ngule ya nyiñ.

³² Ane bezimbi be nga tyiʼi minkole ya bial a jôʼé wô ô ke.

³³ Nté be nga bo be yangeʼe melende me tyé, Paul a nga lebe bôte na, be di bidi a jô be na: Den a ne môs awômô a nyini, mi tele angôndô été, teke di jôm.

³⁴ Ma lebe mia na mi di jôm éziñ, amu e ne ajô ényiñ mfaʼa wônan. Ma beta baʼalane mia na, teke môt a ye jañele koñ ésile jé.

³⁵ Eyoñ a nga mane kobô nalé, ane a nga nyoñe fembé a ve akéva, a beʼe je, a taté di.

³⁶ Be bese fe be nyoñe ngu, a di éyoñe jap.

³⁷ Bi nga to bese bôte mintete mibaé a mewôm mesaman e sitima été.

³⁸ Eyoñe bi nga mane di a jaé, be nga jeñe zene ya ve sitima éveves, a wua minkuta bidi mivok e mañ été.

³⁹ Eyoñe tyé é nga lendé, beliti zene ya sitima be nji beta yemelane vôm be né. Ve be nga yen mendim me mañ mʼéziñ a kindik. Be nga bili nkômban, nge e mbe ngule ya bo na, be telé sitima vôm ate.

⁴⁰ Ve éyoñe be nga bo te yene zene ya tebe, ane be nga tiine bitelé ya sitima a liʼi bie mañ. Be nga kuli fe minkole mia volô mfulane sitima mfaʼa ya mvus. Ane be nga tindi éyé ja beʼe évuñulu ôsu ya sitima, avale ya na, évuñulu nje é tindi be a kee be kindik.

⁴¹ Ve sitima a nga viane ke jimbi abôme nselek a bôlé mañe yôp, te ngule ya ke ôsu, amu ngule ya mintyôa mi mañ.

⁴² Bezimbi, éyoñ be nga yene na mimbôk mivok mia zu mane tup, e ba ba yeme jok, be nga bôndé feʼe ya wôé be.

⁴³ Ane évete bezimbi ntete wua é nga dañe kômbô nyii Paul. A nga kame be, be bo te bo nalé. A nga ve ngule na, e ba ba yeme jok, be jok, a ke kindik.

⁴⁴ E ba bevok be ke ba tyebe e mimbôlane mi biôme ya sitima. Ane bese be nga mane nyiñ.