Mm 22 - Bible en langue Bulu

¹ A bobejañ a betate, vôʼôlane mejô ma zu kobô mia mfaʼa ya kame mamien.

² Bôte be nga ke ôsu a dañe ku bivô éyoñ be nga wôʼô na Paul a zu kobô nkobô Beyude.

³ Me ne mone Beyude. Me nga bialé Tarse, afôla ya Silisi. Ve da, e tison nyô nje me nga yaé a nyoñ ayéʼé, e fefele Gamaliél, teke selan ane metiñe ya beésa bangan me né. Me nga nyeʼe ajô Zambe ndindima, foʼo ve ane mia bese mi né éyoñe ji.

⁴ Me nga kpweʼele zene nyô, jaʼan a kui vôme ya wôé bôt be nga tôñe je. Me nga bi bôt, befam a binga, a kee be nda mimbôk.

⁵ Ntuni nnen, a nsamba bemvendé, be ne ngule ya bo bengaa. Mbe be nga ve ma bekalate ya bobenyañe bangan, éyoñ me nga ke Damas, nlômane ya ke kak a zu be Yérusalém, mfaʼa ya ve be melep e be ba be nga to wé.

⁶ Me to dulu zañ, bebé Damas, atemeteme na, bebé zañe môs , beta éfufup a soʼo yôp, a nga bômane ma a minkôkô mié.

⁷ Ane me nga ku si. Me nga wôʼô tyiñ é jôʼô me na: A Saül, a Saül, wo kpweʼele ma a jé?

⁸ Ane me nga yalan a jô na, ô ne za a Nti? Ane tyiñ é nga beta so, é jôʼô na: Me ne Yésus ya Nazarét, ma wo kpweʼele!

⁹ E bôte bia be be bi nga too nsamba, be nga yen éfufube te, ve be nji wôʼô tyiñ é nga kobô ma.

¹⁰ Ane me nga sili na, e ne ñhe me bo aya a Nti? Ane Nti a nga yalane ma a jô na: Kôlôʼô si ô ke Damas. E wé, nye ba ye tuʼa kate wo ésaé é vebaneya be wo.

¹¹ E nde bôte bia be be bi mbe nsamba be nga bi me wo, a kui Damas. Amu minkôkô mi éfufube te mi nga kpéeé ma ndim.

¹² Môt éziñ a nga too, jôé na, Ananias, a mbe môt a ne zôsôô , mbaʼale metiñ. A nga bili mbamba nkañete e be Beyude bese be nga to valé.

¹³ Ane a nga zu yene ma, a jô me na: A Saül, mojañ, mise môé me kuʼiban a yen. Eto te ébien, e mise mam me nga kuiban a yen émien asu.

¹⁴ Ane a nga jô me na: Zambe ya beésa bangan a boya na, ô yeme nkômbane wé. O yeme nyô a ne zôsôô , a wôʼô tyiñe jé émien.

¹⁵ Wo yiane bo ngaa wé, e mise me bôte bese, mfaʼa ya mam mese ô maneya yen a wôk.

¹⁶ Jé wo ye beta sili, zaʼa bi ke. A ntoo ve duban a tunebane mfaʼa ya mam abé môé, a loone jôé dé.

¹⁷ Eyoñe me bulaneya Yérusalém, me nga too me boʼo meyeʼelan e nda Zambe été.

¹⁸ E nga kui ma môs éziñe na, me ku si ne vema a yene Nti, a jôʼô me na: Kôlôʼô Yérusalém avôl, teke yange. Amu bôt baa ye ke buni nkañete wôé ajô dam.

¹⁹ Ane me nga yalane na a Nti, ke ba tuʼa yeme na, ma me nga ke e meba me Zambe Beyude a bi bôt, a kee be nda mimbôk, a bôme ba bese be nga buni wo.

²⁰ Jaʼane Etienne, e zôsôô nkañete wôé, éyoñ metyi mé me nga kui, ke me mbe valé, me kañeseʼe mboone bewôé bôt bete. Me nga bo fe me baʼaleʼe mengômesane map.

²¹ Ve Nti a nga jô me na: Kele mfaʼa ma jô wo. Amu mfaʼa wo dañ ôyap, e be meyoñe bikuu, ñwô ma lôme wo.

²² Beyude be nga wôʼô mejô Paul a nga kobô, be nga bete metyiñe yôp a jô na: Be vaʼa avale môte di e si nyô, a nji yiane nyiñ!

²³ Amu be nga bo be bamek, a wua melôʼô map e mbuluk été,

²⁴ évete bezimbi é nga bendé na, be nyiñeli Paul e nda mimbôk été, a bôme nye, ndemben ba ye yem amu jé abui zôʼé da bo, a za éfia ba boʼolô nye.

²⁵ Eyoñe be nga ye buti Paul si na be bôme nye, ane Paul a nga jô mone bezimbi a mbe vaa na: Bialébialé éjôé ya Rôme, éyoñ be ngenane te tyiʼi ajô dé, ye ô bili ngule ya bôme nye?

²⁶ Eyoñe mone bezimbi a nga wôʼô njôan ôte, a nga ke jiʼa kate ntebe ôsu: wo ye bo aya? Môt a ne mone nlame ya éjôé ya Rôme!

²⁷ Ane évete bezimbi é nga beta zu sili Paul na: Kate ma, yʼône mone nlame ya éjôé ya Rôme? Paul na ya!

²⁸ Ane évete bezimbi é nga jô na: Me nga bi ngul éte a tañ anen. Paul a nga jô nye na: Ve ma, me bili je aso abialé.

²⁹ Bôt be nga ye bôme nye be nga jôʼé été été, ve mfaʼa évete bezimbi, woñ ô nga bi nye nlem éyoñ a nga yeme na mone nlame ya éjôé ya Rôme nye a kôme baʼale nkaʼane ngataʼa.

Paul a kat ajô asu Sanédreñ

³⁰ Tyé kpwaa, ane a nga tyiʼi na, a tuʼa yeme zʼajôô Beyude ba boʼolô Paul. A nga bo na be tiine nye mengataʼa. Ane a nga bendé na, betuni benen be sulan fufulu a Sanédreñ. Ane a nga lôme Paul a ke kobô ajô asu dap.