Mm 21 - Bible en langue Bulu

Mbulan e Yérusalém

¹ Eyoñe bia be be bi nga kandan ane bi nga bete sitima a ke foʼo ve Kôs. Tyé kpwaa, bi nga ke Rôdes. A kôlôya valé, ane bi nga tôlane Patara.

² E Patara, bi nga kooé sitima a kele Fénésie. Ane bi nga bet, a ke mañe yôp.

³ Bi nga kui bebé Sipre. Ane bi nga saʼale a ke mbo ngale ya ékôte mañ, a kee dulu dangane ôsu mfaʼa ya Siri a ke Tir, vôme sitima a nga yiane kaʼa mimbeʼe.

⁴ Ane bi nga bômbô valé melu zamgbwa. Nalé a too, amu bi nga yene bebuni . Mfufube Nsisim a nga tindi be be kobô Paul na, a bo te ke e Yérusalém.

⁵ Eyoñe ntabane ya valé ô nga kpwaan, bi nga kôlô:binga, a bongô, be nga ke litane bia; éyoñe be maneya lôte tison ése, bi nga kute meboñe si éwome mañ a bo meyeʼelan.

⁶ Eyoñe bi maneya yaʼane be, bi nga bete sitima, be ke be nga bulan.

⁷ Bi nga ke ôsu a sondô dulu dangan nkôlane ya Tir, a kui Ptôlémayis. Wôna, éyoñe bi maneya batane bobejañ, bia be be bi nga tabe ngume môs .

⁸ Tyé kpwaa, bi nga kôlô a ke Sézaré. Vôm ate bi nga bi éyoñe ya ke nda Filipe, nkatefoé wua ya bôte zamgbwa. Ane bi nga tabe nda jé.

⁹ A nga bili bindune bengon binyin bi nga bo bi kuluʼu mejô.

¹⁰ Wôna, bi too nda jé melu abui, ane nkulu mejô ya Yudé a nga suan a too jôé na Agabus.

¹¹ A nga zu yene bia. A nga nyoñe kandé Paul, a tiñeti mo a mebo mé a jô na. Mfufube Nsisim a jô na, môt a nee kandé nyô, e ne Beyude ba ye kaʼa nye ana, a kee nye mo meyoñe bikuu.

¹² Eyoñe bi maneya wôʼô mejô mete, ane bia be bobejañ bi nga yeʼelane Paul na, a bo te ke Yérusalém.

¹³ Ane a nga yalane bia na: Zʼajôô nde mia yii de, a ve me nlem atek? Me ne nkôman, saa ve nkaʼane ngataʼa étam, ve jaʼane awu e Yérusalém amu jôé Nti Yésus.

¹⁴ Amu a nji kômbô wôʼô bia, nde bi nga jôʼé a jô na, nkômbane Zambe ô bobaʼan.

¹⁵ Eyoñe bone melu mete me nga man, bi mane fe kômesan, ane bi nga bet a ke Yérusalém.

¹⁶ Beyéʼé ya Sézaré be nga zu e nsamba wongan, be nga ke tooé bia e nda be Mnason ya Sipre, ñyeʼé aso ayap.

¹⁷ Eyoñe bi nga kui Yérusalém, bobejañ be nga nyoñe bia abui mevak été.

¹⁸ Tyé kpwaa, Paul a nga ke e nda be Yakob bia be nye. Vôm ate fe bemvendé bese be nga too.

¹⁹ Eyoñ a maneya batane be, ane a nga kañete be mame mese Zambe a nga bo ézezañe bikul.

²⁰ Bôte be nga wôʼô nkobô Paul be nga ve Zambe duma, a jô nye na: A mojañ, ô ne yen abui betoyini be bôt ba buni be ne Beyude. Bese ba ve ngule ya baʼale metiñ.

²¹ Ve da, be wôʼôtaneya menyiñ abui ajô dôé. Nyeʼelane wôé ô ne tindi Beyude bese baa be bikul be too na, be liʼi Môze. E too ve ane wo kômbô jô be na, be bo te tyiʼi bone babe metye, a bo te beta baʼale metiñ.

²² Bi bo aya, amu teke selan, ba ye foʼo wôʼôtane na ô ne va.

²³ Boʼo ñhe avale bia ye jô wo. Bi bili bôte benyine va, be nga bo ngakaʼa.

²⁴ Nyoñe be, ô bo ntunan, mia be be fufulu. Be ne fe tyeñebane minlô. Bôte bese ba ye yeme na menyiñe ba wôk a ajô dôé me nji bo été. Ve na, wo fe wo jalé metiñ.

²⁵ Ve mfaʼa bikul bi buniya, bi nga sili be mintyiʼane miangan, e ne na be tyi betit be nga vebane be bezambe ya bikuu, metyi ya betit ba wu abuk, a mboone mbia be mam.

²⁶ Tyé kpwaa, Paul a nga nyoñe bôte bete benyin a taté ntunane baa be be éyoñe jia. Ane a nga ke nda Zambe a kate be éyoñe melu ya ntunane ma ye man. A na, mveane wo ye veban asu môt ase ya be be.

Ba bi Paul e nda Zambe

²⁷ Melu zamgbwale me nto bebé ya man, ane Beyude ya Azi be nga yemelane nye e nda Zambe, be nga tindi ékôane bôt ése é bi nye.

²⁸ Be nga yôtane be jôʼô na: A mvôʼô Israél, zaʼa vôʼôlan, e nye le, e môt a wosan ayoñe dangan a metiñe me Môze, a e vôme nyô, a ñyeʼelan a yeʼele bôte vôm ase, a e be bôte bese. A keya fe kee Begrék e nda Zambe, a ndamane étyi ya mfufube vôme wu.

²⁹ Valé be yeneya Trôfime môte ya Eféze, baa nye e tison, be buniʼi na Paul a nyiñeliya nye e nda Zambe.

³⁰ Ane tison ése é nga ngômelan, a bôte bese be nga zu ndulu. Ane be nga bi Paul a kuli nye atane ya nda Zambe, a mane fete mimbé mise.

³¹ Eyoñe be nga zu kate évete bezimbi na, Yérusalém ase a nga ngômelan, be nga jeñe zeneya wôé Paul. Be nga kate nye na: Mvoʼé é nji bo tison. Lubulubu a ntoo vôm ase.

³² Ane a nga sulane bezimbi a bivete biap été été, a ke vôme ntañete ô mbe. Eyoñe bôt be nga yene bivete bezimbi a nsamba wop, ane be nga jôʼé Paul ébôm.

³³ Ane évete bezimbi é nga ke Paul bebé a bi nye, a ve tyiñe na, be kaʼa nye a ngôkop ébaé. A nga kômbô yem, Paul a ne za, a a nga bo jé.

³⁴ Ve ékôane bôt é nga bo zôʼé. Môt ase ve kobô avale dé, teke ngume tyiñ a nyô mbok. Teke ngum éfufub éziñ évete bezimbi é mbe ngule ya bi ajô te. Ane a nga ve tyiñe na, be kee Paul nda mimbôk.

³⁵ Eyoñe Paul a nga ye bete ôbet wo ke nda , ane bezimbi be nga jibi beʼe nye yôp, amu mbia évô a njete bôt.

³⁶ Amu be nga tôñe be mvus ba zu ba yôtane na: A yian awu.

Paul a kobô bôte ya Yérusalém

³⁷ Eyoñe be nga kômbô ke nyiñeli nye nda mimbôk été, Paul a nga sili évete bezimbi na: Ye me ne ngule ya jô wo éfia éziñ? A nga yalan a sili nye na: Ye wo yeme kobô Grék?

³⁸ Ye sa wo ô ne môte yʼEjipte a nga sômôlô a kee bôte mintete minyin be beʼe atyeñ e nkôte si?

³⁹ Paul nye na: Ye ma nga? Me ne mone Beyude ya Tarse, afôla ya Silisi, bialébialé ya tison é ne te duma tyôtyoé. Ma yeʼelane wo na, vaʼa me ngule ya kobô bôt.

⁴⁰ Eyoñ a veya nye ngul, ane a nga sili, Paul a nga tebe tetele a febe bôte wo. Ane be nga ku ne kubuk. Ane Paul a nga kobô be nkobô Beyude a jô na: