Mm 19 - Bible en langue Bulu

Paul a ne Eféze, bôt bʼôsu ba duban

¹ Melu Apôlôs a nga to Koréñt, mme Paul a nga suane Eféze. A nga tyii e zene mefôla me si ya minkôle yôp. Valé a nga koone beyéʼé bʼéziñ,

² a sili be na: Ye mi nga nyoñe foʼo mfufube Nsisim éyoñ mi nga bo bebuni ? Ane be nga yalane nye a jô na: Ye bi nga tame wôʼô wôʼô be kobôʼô ajô Mfufube Nsisim.

³ Paul a nga sili na: Nduan ôvé ñwô mi nga nyoñ? Be nga yalane nye na: Nduane Yôanes.

⁴ Ane Paul a nga beta nyoñe nkobô a jô na: Yôanes a nga bo bôt nduane ya nkôñelane minlem, a sili be na, be buni môt a ye zu nye mvus, e ne na Yésus.

⁵ Ane be nga wôʼô nye, a nyoñe nduan a jôé Nti Yésus.

⁶ Paul a nga beté be mo. Ane Mfufube Nsisim a nga zu e be be. Be nga kobô minkobô mife a kulu mejô.

⁷ Be nga too bese bebé bôt awôm a bebaé.

Esaé Paul Eféze

⁸ Paul a nga bo a kele aba Zambe ya Beyude bebé ngon élal ése, a kobôʼô bôt a ngul ése ajô éjôé Zambe. A mbe a jeñe mezene mese ya dutu bôt a nga kobô be.

⁹ Bôte bevok be nga bo minleme ayet te ngule ya dutuban. Be nga viane tuʼulane ajô Zambe e zañe bôt. Paul a nga kandane be a dutu beyéʼé vôme wob étam, a yeʼele be Ajô Zambe môs ôse aba sikôlô ya Tiranôs été.

¹⁰ Nalé a nga tabe mimbu mibaé akekui bôte bese ya Azi, Beyude a Begrék, be nga kui abime ya kôme wôʼô mejô me Zambe.

¹¹ Zambe a nga ve Paul ngule ya bo bitua bi mam.

¹² Be nga kui vôme ya bo bie minkôkon, a belane jaʼane bennebeken a biyé bi nga nambe nyôle jé. Bôte bete be nga saéban, a mimbia minsisim mi nga kôlô.

¹³ Mingengañe Beyude mi nga wulu e minlame minlam, mie fe mi nga veʼele kobô bôt be nga bili mimbia minsisim a jôé Nti Yésus, be jôʼô na bia jô mia a jôé Nti Yésus Paul a kañete!

¹⁴ Bone zamgbwale be beta ntuni ya Beyude, Séva, be nga veʼele bo nalé e be bebien.

¹⁵ Ane mbia nsisim a nga kobô a jô na: Yésus ma yem, ma yeme fe môt a ne Paul, ve mia mi na beza?

¹⁶ Eté été, môte mbia nsisim a nga too be nye a nga jimbi be a ngul. Ane be nga tup be too bebé ane minsoé, menyôle kpwetan a meveñ.

¹⁷ Bôte bese ya Eféze, Beyude a Begrék, be nga mane wôʼô beta ajô nyô. Woñ ô nga bi be minlem. Ane be nga kañe anene ya jôé Nti Yésus.

¹⁸ E jama bôt a nga buni a nga kobô tyiñe yôp a ve mintiñetane ya mimboone miap.

¹⁹ Abui bôt e nga tôñe mame ya mebiañ e nga kôane bekalate bap a diʼi be nduan, bôte bese be lôô. Eyoñ ba fase tañe ya bekalate bete, ba yene na, be ne kui moné tañe toyini mewôm metan.

²⁰ Nde amu ngule Nti, ajô Zambe e nga fôé a bo ngul.

Mendum ma bo Eféze a Paul a kôlô

²¹ Mvuse ya beta be mam mete mese, Paul e nsisim été, a nga nyoñe ntyiʼane ya ke Yérusalém a lôte Masédôan a Akayi. A nga kobô na: Nge me kele wé, da ye bo mvoʼé na me beta ke Rôme.

²² Ane a nga lôme Timôté baa Eraste Masédôan, be mbe bevolô bé. Ve émien a nga ke ôsu a tabe ôbe nté Azi.

²³ Melu mete mme ôbe abui ézezam ô nga boban ajô zen éte.

²⁴ Môt éziñ, nlui biôme bi or, ba loone nye jôé afe na Démitrius, a nga bo a lôñe menda me zambe Artémis a moné. A nga volô mintyetyeñe na mi bi ébeʼe beʼe moné.

²⁵ Ane a nga sulane mintyetyeñe bebo bisaé mié, a ba bese be nga bômane nye, a jô be na: Mia yem a bemvôé bam na, nne mvolane wongane wo so ve ésaé bia bo ji.

²⁶ Ve mia bese mia yen a wôk, sa ve Eféze étam, ve ngume Azi ôse na, Paul nyô, a fôʼô jama bôt. A yeʼele be na, bezambe bia lui a mo mangan, be nji bo bezambe.

²⁷ Ajô te sa ve asu ésaé dangan étam nde da ye biaséban, ve nalé fe duma ya ndaa beta zambe minga, Artémis da ye bo momo, e zambe bôte bese ya Azi a si ése ba kañ.

²⁸ Eyoñ be nga wôʼô nkobô te, be nga yaa a dañe bete metyiñe yôp a jô na: Artémis ya Eféze a ne anen.

²⁹ Ane zôʼé é nga yiane tison ése. Ane bôt abui be nga ke mimbil e nda bivôé, a bi bôte bebaé ya Masédôan be nga wulu nsamba Paul. E ne na, Gayius ba Aristark.

³⁰ Paul a mbe nkômane ya ke ndôbaʼan. Ve bebuni be nji kañese.

³¹ Bemvôé bevoʼo ya Azi be nga lebe nye na, a bo te veʼele ke nda bivôé.

³² Ekôan été, môt ase a nga yôtan, te wôʼô jôme nyô mbok a jô, avale ya na, abui bôt e mbe te yeme yem amu jé be nga sulane ékôan.

³³ Bôt bʼéziñe ya ékôan, be nga ve Alékzandre fek, nye Beyude be nga telé ôsu viap. Ane Alekzandre a nga fep ékôane bôt wo na, a kômbô faé be éfufup.

³⁴ Ve éyoñe be nga yeme na a mbe mone Beyude, bese be nga zametan a yôtane tyiñe jia, bebé tañe mewolo mebaé, be jôʼô na: Artémis ya Eféze a ne anen!

³⁵ Akôsa bo nalé, ntili bekalate a nga kui vôme ya jeʼe ékôan a mejô mana na: A bôte ya Eféze, ye môt éziñ a ne dimi na, tison Eféze é ne mfufube tison e beta zambe Artémis, a beta éveʼela wé a nga ku a soʼo yôp?

³⁶ Amu éyalane ya nsili wu é ne teke bisô. Mia yiane volôbane minlem, a saʼale mbia mimboon.

³⁷ E bôte mia te bi, a zuu be va, be nji bo mbia jam ya biasé nye.

³⁸ Nge Demétrius a mintyetyeñe bebo bisaé ba tôñe nye, be bili mejô a môt éziñ, meba mejô me ne. Bejô bôt be ne. Be kele ñhe nda mejô.

³⁹ A, nge mi ngenane mi bili mam mefe ya fas, ajô da ye tyiʼi ékôan é ne ntelan.

⁴⁰ Bi ne bebé ya bi bijô bi nzametaʼan amu ékôane ya dene ji. Amu bi nji bi amu ya ndôkaʼane bôte nyô.

⁴¹ Eyoñ a nga mane kobô nalé, ane a nga suu bôt be ke.