Mm 18 - Bible en langue Bulu

Mbamba Foé a nyoñeban e Koréñte

¹ Eyoñe Paul a nga kôlô Aténe, a nga ke Koréñte.

² Ane a nga tôbane mone Beyude wé, a too jôé na Akilas, môte ya Poñ, a ndôme so Italie, ba minga wé Prisile, amu njô bôte Claude a nga ve atiñe na, Beyude bese be kôlô Rôme. Paul a nga ke yene be.

³ A, amu a mbe a yeme asu ésaé dap, asu ésaé ya tiñe bindelé, a nga tabe e nda jap, a boʼo ésaé te valé.

⁴ Sabat ase, a nga nyoñe nkobô, a ve ngule ya dutu Beyude a Begrék.

⁵ Ve éyoñe Silas baa Timôté be nga so Masédôan, Paul a nga ve éyoñe jé ése mfaʼa ya nkatane Mbamba Foé. Nlô éfia ya kobô e zañe Beyude ô too ve na: Mesie nye a ne Yésus.

⁶ Eyoñe Paul a nga yen ane ba wosane nye a taa nye, a nga samese mengômesane mé a jô be na: Metyi menane me tabeʼe mia minlô. Me seke fe ajô. Ataté éyoñe ji, ma ye ke be meyoñe bikuu.

⁷ Nkôlane ya valé, a nga ke e be môt, be loʼone nye jôé na Titus Yustus, nkañe Zambe. Nda jé é too fefele aba Zambe Beyude.

⁸ Gripus, évete ya aba Zambe Beyude, a nga buni Zambe a nda jé ése. Bekoréñtieñ abui, éyoñe be nga wôʼô bisulan bi Paul, be nga kôñelan a bo bebuni , a duban.

⁹ Wôna alu éziñ, Nti a nga kui Paul nlô a jô nye na: Te ko woñ, kele ôsu a kobô, te tabe évô.

¹⁰ Amu me ne be wo. A teke môt éziñ a ye nambe wo mfaʼa ya bo wo mbia jam. Amu jama bôt a ne mvebane be ma e tisone nyô.

¹¹ Ane Paul a nga tabe été tañe ngume mbu a ngon ésaman, a yeʼeleʼe mejô me Zambe.

Paul a kate étom asu Galioñ

¹² Melu njôô bôte ya Akayi a nga too, Beyude abui be nga fulan, a wosane Paul. Ane be nga ke somane nye e nda mejô.

¹³ Be nga boʼolô nye na: Môte nyô a kee bôt e ñyebe Zambe ô nji bo ane metiñ.

¹⁴ Eyoñe Paul a nga ye kobô, ane Galioñ a nga yalane Beyude a jô na: Nge ajô di e nga ye bo étom éziñ, nge ntyamane atiñ , me nga ye nyoñ ésomane jenan a mia Beyude!

¹⁵ Vʼamu mintañete mienan mia nnambe ajô ñyeʼelan, ajô môé a metiñe menan, ajô te da fombô mia. Ma, me voʼo tyiʼi avale ajô di.

¹⁶ Ane a nga vaa ajô te nda mejô.

¹⁷ Ane bese be nga bi Sostén, évete ya aba Zambe Beyude, a woʼo nye ébôm e nseñe nda mejô. Ve njô bôte Galioñ teke veʼele kee dis.

Paul a lôte Antiôche a ke a beta bo ésaé

¹⁸ Paul a nga beta tabe ôbe nté Koréñt, ane a nga liʼi bobenyañ a ke Siri, baa be Prisile a Akilas. A nga tyeñebane nlô e Sañkré, amu a nga bo ntiñetan éziñ.

¹⁹ Ane be nga ke Eféze, vôme Paul a nga kandane bôt ba be nye be nga ke nsamba. Ve nye, a nga ke aba Zambe Beyude a kobô be.

²⁰ Be nga buʼu nye a beta tabe ôbe nté e be be. Ve a nga ben.

²¹ Eyoñ a nga kôlô, a nga jô be na: Ma ye beta zu e be mia nge Zambe a kañese. Ane a nga fubu sitima Eféze,

²² ane a nga ke Sézaré a ke batane Keké, a suʼulane ke Antiôche.

²³ E wé, a nga tabe ôbe nté. A nga beta bulane afôla ya Galate a Frigi a kele a ve beyéʼé ngule nlem .

Dulu nkatane Mbamba Foé lale

²⁴ Mone Beyude, jôé na Apôlôs, môte ya Alékzandri a nga kui Eféze. A mbe éwôlô ñyeme mam. A nga ve nlô wé mfaʼa ya lañe mimfufube mintilan.

²⁵ A nga yéʼé ajô zene Nti. Njalan a évé, a nga kañete a yeʼele ajô Yésus ne sañesañ. A nga boʼo a yeme ve nduane Yôanes.

²⁶ A nga kobô a ngul ése aba Zambe Beyude été. Ve éyoñe Prisile baa Akilas be nga wôʼô nkobô wé ajô Yésus, be nga nyoñe nye nsamba wop, a tuʼa beta liti nye zene Zambe.

²⁷ Amu a nga bili nkômbane ya ke Akayi, bobenyañ, be nga vaʼa jame te. Ane be nga bendé bobenyañ ya wé na, be nyoñe nye mvoʼé . Eyoñ a nga kui, a nga bo beta mvolan amu mvame Zambe e be bebuni ya wé.

²⁸ Nalé a too, amu bifia bié, mbie bi nga so kalate Zambe, bi mbe adit e mise Beyude, mfaʼa ya tuʼa liti be na, Mesie nye a ne Yésus.