Mm 13 - Bible en langue Bulu

Barnabas ba Saül ba ke nlôman e Sipre

¹ Bekulu mejô a beyeʼele bôt be nga too keké ya Antiôche. Barnabas, Siméoñ a mbe jôé afe na Niger, a Lusius môte ya Siréne, Manaén nye baa Hérôde Tétrak be nga yeñ aso bongô a Saül.

² Môs éziñ be nga bo ésulane ya kañe Nti a bômbô zaé asu meyeʼelan. Mfufube Nsisim a nga kobô be na: Jôkaʼane me Barnabas baa Saül be bo ésaé me tyiʼiya na be bo.

³ Wôna éyoñe be maneya bômbô zaé a yeʼelan, a mane beté be mo, ane be nga suu be be ke.

⁴ Eyoñe Mfufube Nsisim a maneya lôme be, ane Barnabas baa Saül be nga siliki a kui Sélesi. Nkôlane ya valé, be nga fubu miel été a ke mfaʼa ya Sipre.

⁵ Eyoñe be nga kui Salamine, be nga kañete Ajô Zambe meba me Zambe Beyude été. Yôanes, mvolô wop a nga to fe nsamba wop.

⁶ Eyoñe be maneya lôt ékôte mañ a kui Pafôs, ane be nga tôbane mvimviʼi, nkulu mejô me ne minsos, mone Beyude, a too jôé na, Bar-Yésus.

⁷ A nga too bebé a njô bôte Sergius Paul, ntyetyeñe môt. A nga bañete Barnabas baa Saül, a liti be beta nkômbane wé ya wôʼô mejô me Zambe.

⁸ Ve mvimviʼi, Elimas, avale jôé dé da tinan, a nga wosane be a jeñe zene ya dutu njô bôte Sergius Paul a bo te buni Mbamba Foé.

⁹ Eyoñe te Saül nge na Paul, njalan a Mfufube Nsisim, a nga beme nye mis asu a jô nye na:

¹⁰ Wo môt ô ne njalan a mefeʼe me mvô, mone Satan, nyô a wosane zôsôô ase a so be Zambe, ntéavé wo ye jôʼé vite mezene me Nti me ne zôsôô ?

¹¹ Tame yene wo Nti ô ne be wo. Wo ye bo ndim, te fe yen éfufube jôbe nté éziñ. Eté été, dibi e nga ku nye mis ne viu, a nga tyiñelane kotendoʼo a yi nliti zen .

¹² Eyoñe njô bôt a nga yene jame te, ane a nga buni, amu nyeʼelane mame ya e be Nti ô nga bi nye nlem .

Paul a kate Mbamba Foé Antiôche

¹³ Ane Paul baa be nsamba wé be nga kôlô Pafôs a ke Pergé afôla ya Pamfilie. Ane a nga kandane be a bulane Yérusalém.

¹⁴ Ve nkôlane ya Pergé, be nga ke dulu ôsu akekui Antiôche ya Pisidie. E môse Sabat, be nga nyiine aba Zambe a tabe si.

¹⁵ Mvuse ya nlañane kalate metiñ, a bekulu mejô, bivete ya aba Zambe bi nga jô be na: A bobejañ, nge mi bili bifia biziñe ya lebe bôt, kobaʼan.

¹⁶ Eyoñe te Paul a nga tebe tetele a febe bôt a wo a jô na: A mvôʼô Israél a mia bese mia ko Zambe woñ, vôʼôlane ma.

¹⁷ Zambe ya ayoñ dangan Israél, a nga tobe betate bangan. Ane a nga fôlô bôt melu be nga too si ya Ejipte; wôna, a éwôlô ya wo wé, a nga vaa be wé;

¹⁸ bebé mimbu mewôm menyin, a nga ve be bidi e nkôte si.

¹⁹ Eyoñ a maneya jiane meyoñe zamgbwale ya Kanaan, a nga ve be si jap ane ngap.

²⁰ Jame te ese e nga bobane bebé tañe mimbu ntet a mewôm metan. Mvus éte, a nga telé be betyiʼi mejô a kui melu me Samuel nkulu mejô.

²¹ Ane be nga kômbô a sili njô bôt. Nde ñhe Zambe a nga telé be njô bôt Saül mone kis, môte ya mvôʼô Bényamin, nye ate a nga jôô be mimbu mewôm menyin.

²² Eyoñe be vaaya nye éto, ane Zambe a nga tobe David a bo njô bôte wop. Ajô dé nde a nga kobô avale dina na: Me yeneya môt a funane nleme wom, nyô a ye jalé minkômbane miame mise, a ne jôé na David, mone Yesé.

²³ Mvoñe bôte jé, nje ñhe Zambe, aval ane ngakaʼa jé é mbe, a nga bo na Yésus nyii bôt ya Israél a bialé.

²⁴ Eyoñe Yôanes a nga so, a nga taté mane yôtan ajô nduane ya nkôñelane minleme Israél a,

²⁵ éyoñ a sondôʼô ésaé jé, a nga jô na: Mia buni na me ne za? Sake ma me ne nye, ve môt éziñ a zu me mvus, nye a dañe ma, me nji bi nkôñe ya kuli nye, jaʼane minkole ya besilefase bé.

²⁶ A bobejañ, mi kusa bo mvoñe bôt Abraham nge ki ba ba ko Zambe woñ, Mbamba Foé ya nyiane nyô, a nga lômbane be bia.

²⁷ Bôte ya Yérusalém a betebe ôsu bap, be nga bene Yésus, éyoñ be nga tyiʼi ajô dé a ve nye mekua. Be mbe te yeme na ba yemete mejô bekulu mejô ba lañe Sabat ase.

²⁸ Jaʼane be nji bi éfia a yiane wu je, ve be nga sili Pilate na a wôé nye.

²⁹ Eyoñ be nga jalé mam mese me mbe ntilan ajô dé, be nga vaa nye élé yôp a jame nye soñ.

³⁰ Ve Zambe a nga wômôlô nye miñwuan.

³¹ Mvus éte a nga yené e be bôte ba be nye be nga bo be kôlôʼô Galilé a ke Yérusalém melu abui. Bôte bete be ne bengaa e mise me bôt.

³² Bia fe bia kate mia Mbamba Foé ate. Ngakaʼa é nga kateban e be betate,

³³ Zambe a kômeya tôé je be bia, bone bap, e vôm a nga wômôlô Yésus, aval ane e ne ntilane same baa na: Ô ne mone wom, môse wu, me biaéya wo.

³⁴ E ne aval ane Zambe a nga jô na, a ye wômôlô nye miñwuan. Nde nyôle jé ja ye bo te boé soñ a zen éziñ, vôm a jô na: Ma ye ve mia mimfufup a benyaa bebela ya be David.

³⁵ Amu ajô te fe, a beta kobô afôla afe na: Wo ye bo te jôʼé mfufub wôé ô boé soñ.

³⁶ Ajô te David, éyoñ a maneya bo ésaé ya jalé nkômbane Zambe melu mé, a nga ke ôyo awu. Be nga bôôé nye fefele ya be ésaa bé, a a nga boé e soñ.

³⁷ Ve nyô Zambe a nga wômôlô ñwuan a nji boé soñ.

³⁸ Yemane de a bobejañe na, maʼa amu nye, nde bi bili Mbamba Foé ya njamane mam abé , a mekabe bi mbe te ngule ya bi me soʼo bia e metiñe me Môze.

³⁹ E be nye, mekabe mete ma vebane be môt ase a buni.

⁴⁰ Tabaʼane ntyele na ajô bekulu mejô be nga jô e bi mia na:

⁴¹ fombaʼan, mia bôte mi ne mbia anyu, woñ ô tame bi mia a jañane bôte mis! Amu ma ye foʼo bo jam nté mi ngenane mi vee, E jame mi nji ye buni nge môt éziñ a too ye kate mia de.

⁴² Eyoñ be nga kui atan, be nga yeʼelane Paul baa Barnabas na be beta baʼalane nkobô wop sondô mbok.

⁴³ Eyoñ ékoone bôt é nga tyamelan, beta ngabe ya Beyude a beyéʼé be nga ke litane be a, e minlañe miab été, Paul baa Barnabas be nga tindi be be kabetane mvame Zambe.

Paul ba Barnabas ba ke e be bikuu

⁴⁴ E Sabate mbok a nga tôñ, bebé bôt bese ya tison be nga sulan a zu wôʼô Ajô Zambe.

⁴⁵ Eyoñ Beyude be nga yene ajô te, be nga bo zok a wosane mejô me Paul a Barnabas.

⁴⁶ Ane Paul baa Barnabas be nga bo ayoʼo ya kpwaane be na: E be mia nye ajô Zambe e nga yiane taté kateban, ve amu mia bene de, a yene miabebien ane ba be nji yiane nyoñe ngab ényiñe ya melu mese, nde bia ke e be meyoñe bikuu.

⁴⁷ Amu dina e ne abendé bi bili e be Nti na: Me nga telé wo ô bo éfufube ya meyoñ , nde wo ye kee nyian e mekuʼu ya si.

⁴⁸ Eyoñe meyoñe bikuu me nga wôʼô mejô mete, be nga jaé ne lut a mevak a kañe ajô Nti, a ba bese be mbe ntiñetane ya nyoñ ényiñ be nga buni:

⁴⁹ ajô Nti e nga mialane afôla si te ese.

⁵⁰ Ve Beyude be nga sômôlô biwôlô bi binga bi nga kañe Zambe a benyaa bôtô ya tison. Ane be nga taté kpweʼele Paul baa Barnabas, a titane be afôla dap.

⁵¹ Eyoñe be nga sase mbuluk mebo map, ane be nga ke Ikône.

⁵² Ve mfaʼa beyéʼé, be nga liʼi, njalan a mevak a Mfufube Nsisim.