Mm 12 - Bible en langue Bulu

Yakob a wôéban; ba bi Pierre a suʼulane vaa nye mimbôk

¹ Melu mete njô bôte Hérôde a nga taté na a kpweʼele bôte bevoʼo ya keké.

² Ane a nga wôé Yakob a monyañe wé Yôanes a nkpwaté mekôn.

³ Eyoñ a nga yene na, Beyude be nga yene jame te mvaé, ane a nga taté mfefé ébia, aval ane Pierre. A mbe melu be nga di fembé é ne tee mvusan.

⁴ Eyoñ a biya nye, ane a nga futi nye nda mimbôk, a telé bezimbi minsamba minyin, nsamba ôse bôte benyin, be baʼale nye. A nga bo a vañe na a ye boʼolô nye e mise me bôt, éyoñ abôʼô ya Pak e lôteya.

⁵ Pierre a nga too foʼo nda mimbôk, ve ngule meyeʼelan ya keké, a mban ôse, é nga bete be Zambe ajô dé.

⁶ Hérôde a nga ye bo na a kat ajô. Alu te, Pierre a too ôyo, ézezañe bezimbi bebaé, ntiñetane ngôkop ébaé. Bebaʼale ki be tele minsamba e mbé yôp.

⁷ Atemeteme na, éngele Nti a nga so. Ane nda é nga jaé ne lut a éfufup. Engele a nga vele Pierre ôyo a mbibane nye mone abaé abum, a jô nye na: Kôlôʼô si avôl! Eté été, bengôkop be nga sotane mo me Pierre.

⁸ Engele a nga ke ôsu a jô nye na: Jaé kandé jôé a tiñeti besilefase bôé! Ane a nga bo nalé. A nga beta jô nye na: Jaék alôʼô dôé a tôñe ma.

⁹ Ane Pierre a nga tôñe nye. A nji buni na, mboone éngele wu ô mbe nya ajôô. A nga yene ve ane biyeyem.

¹⁰ Ane be nga taté lôte vaa ôsu, a nyô baa. Ane be nga kui e mbé étyé ô nga too anyiine tison. Ane mbé ôbien ô nga yombô ôsu viap. Eyoñe be kuiya atan, be nga ke e susuʼa njoñ. Ane éngele a nga jañe nye mis atemetem.

¹¹ Ane Pierre a nga tuʼa bi fek. Ane a nga kobô a jô na: Me yemeya éyoñe ji, e ne bebela na, Nti a te lôme éngele wé a a vaaya ma mo me Hérôde a ôsimesan ôse ya Beyude.

¹² Ane a nga jeñe zen , a kui nda be Marie nyia Yôanes, be nga dañe loone nye na Yôanes Mark. E nda éte été, abime bôt e nga bo e boʼo meyeʼelan.

¹³ Eyoñ a nga kute mbé , ésoé mbo ésaé minga, a too jôé na Kôde, a nga zu yalane mbé .

¹⁴ Ane a nga wôʼô tyiñe Pierre. Wôna, njalan a mevak, a nga bo te diine mbé , ve bulane jiʼa ke kate foé na Pierre nye a kut, a tele mbé si.

¹⁵ Ane be nga jô nye na; Ô ne akut. Ve a nji ke ku évôl. Bee nye na, jôʼô ñhe na a ne éngele wé.

¹⁶ Nté te ôse, Pierre ki a ne ve kute mbé . Ane be nga suʼulane diine wô. A mbe foʼo Pierre. Ane be nga too feʼe ne vema.

¹⁷ Ane a nga jeʼe be na, be tabe bivô a mfebane mo. A nga kañete be ane Nti a nga vaa nye nda mimbôk. A nga suʼulane jô be ve na: Kelane katane Yakob a bobejañ. Ane a nga téé dulu a ke mfaʼa mfe.

¹⁸ Eyoñ tyé é nga lendé, ényenyam é nga bo e zañe bezimbi. Be nga sili bebiene na, bia yeme na Pierre a boya aya?

¹⁹ Hérôde a nga bo na be jeñe nye, ve teke nye yen. Ane a nga bendé na be fase jame te e be bebaʼale, be zuu be, a wôé be. Ane a nga siliki a kôlôʼô Yudé a ke Sézaré e vôm a nga tabe ôbe nté.

Awu Hérôde

²⁰ Bôte ya Tir a Sidoñ baa be Hérôde be nga bili angônda beta étom. Be nga kui tyiñe na, ba ke yene nye. Blastus, mbo ésaé njô bôt a suʼu be mvuse na be kôm étom évôvoé été, a zene ya nlatane ngbwa. Amu mvolane ya si jap ô nga so ve e be njô bôt.

²¹ Eyoñe môse ndôbaʼane be nga tiñeti ô nga kpwaan, Hérôde a beʼe éyé njô jé, a nga tabe si éto njôô jé a kobô bôt.

²² Ane be nga kute nye mekôp a jô na: Tyiñe Zambe ébiene ñhe foʼo nyô, saa tyiñe môt.

²³ Eté été, ane éngele Nti a nga bibi Hérôde, amu a nji ve Zambe duma. Ane minsoñ mi nga di nye, ve wu.

²⁴ Ajô Zambe e nga ke ve ôsu a mialan.

²⁵ Wôna Barnabas ba Saül, éyoñe be maneya bo ésaé jap e Yérusalém, be nga ke. Yôanes a mbe jôé afe na Mark a nga ke nsamba wop.