Mm 11 - Bible en langue Bulu

Nkatane Mbamba Foé Pierre e Yérusalém

¹ Minlôman a bobenyañe be nga tabe Yudé. Be nga wôʼôtane na, meyoñe bikuu me ke me nyoñeya Ajô Zambe.

² Eyoñe Pierre a nga ke Yérusalém, baa be bôte be mbe ntyiʼane metyel be nga sañetan abui, be jôʼô nye na:

³ O keya nyiin ézezañe ya bôte be ne minsôsol a di a be.

⁴ Ane Pierre a nga beta faé be éfufube yʼajô te ataté metataʼa a kui amané a jô na:

⁵ Me nga to tisone Yôpé, me boʼo meyeʼelan. Ane me nga ku avem a yene ñyenane wu: jôm, ane beta ntuʼu éyé, mesu menyin, é soʼo yôp a ku si vôme me nga too.

⁶ E mise mam me nlôô je ne fonoo, me fasek; Me nga yene betite ya si ba wulu a mebo menyin, betite ya fé ba woñ a mebum a ba ba yele yôp.

⁷ Ane me nga wôʼô tyiñ é jôʼô me na: Avôl a Pierre, wôék ô di.

⁸ Ane me nga jô na teke bebé a Nti. Amu ényiñe jame, teke jôm é ne mvin nge étyi, ja ke anyu dam.

⁹ Tyiñ é nga beta so yôp éyoñe baa, é jôʼô na: E jôme Zambe a tuneya, wo, te yene je mvin!

¹⁰ Nalé a nga baʼalane biyoñe bilaa, ane jôme te é nga bulane yôb été.

¹¹ Wôna éyoñe te ébien, bôte belaa be ntele me fefele nda été, e vôme bi nga too. Be mbe minlôman, be soʼo Sézaré.

¹² Ane Nsisim a nga jô me na, me ke, te bo meveñ, bia be be. E bobejañe besamane mi lô ba, be nga ke me liti. Ane bi nga ke nyiine nda môt émien a nee ajô.

¹³ Ane a nga kañete ane a nga yen éngele nda jé, a jôʼô nye na: Lôme bôte Yopé, be ke loone Simon ane jôé afe na Pierre.

¹⁴ A ye liti bibubua mise môé, mbie bia ye zuu nyiane be womien, a bôte bese ya nda jôé.

¹⁵ Ve nné ane ma taté nkobô, ane Mfufube Nsisim a nga zu e be be, avale fe ane a nga bo e be bia atataʼa.

¹⁶ Ane me nga simesane njôane Nti wuna na: Yôanes a nga ve bôte nduan a mendim, ve mia, mia ye nyoñe nduan a Mfufube Nsisim.

¹⁷ Nge Zambe a nga ve bôte bete avale mveane mvame da ane bia bevok, amu bi nga buni Nti Yésus Krist, ma me mbe za, ane me mbe kamane mboone Zambe?

¹⁸ E mvuse ya mejô ma, e bôte be nga wôk, be nga volôbane minlem a tabe ne mieññ a kañe Zambe a jô na: Zambe a veya meyoñe bikuu nkôñelane nlem wo kee môt ényiñ.

Keké ja teléban Antiôche

¹⁹ E ba be nga tub ékpweʼele éyoñ Etienne a nga wu be nga kui Fénésie, Sipre a Antiôche, ve te kate bôte befe ajô Zambe, vengevenge ve Beyude.

²⁰ Ve da, bôte bevoʼo ya be be, bebialé bialé ya Sipre a Siréne, éyoñe be nga kui Antiôche, be nga kate fe Begrék Mbamba Foé Nti Yésus.

²¹ Nti a nga suʼu be, avale ya na, e tañe bôt é nga kôñelane minlem a buni, é nga bo abui.

²² Foé ya ébubua jame te é nga kui melo me keké ya Yérusalém. Ane be nga lôme Barnabas Antiôche.

²³ Eyoñ a nga yen ane mvame Zambe ja bo ésaé vôm ate, nleme wé ô nga jaé a mevak. Ane a nga tindi be na, be bulu late Nti a minleme miabe mise.

²⁴ Emien a mbe môt a ne Zôsô, njalan a Mfufube Nsisim, a mbunan. Nkunda bôt ô nga kôñelane be Nti.

²⁵ Ane Barnabas a nga suʼulane ke jeñe Saül e Tarse.

²⁶ Ane a nga yene nye wé a bulane nye Antiôche. Bese bebaane be nga tabe keké éte.

²⁷ Melu mete, bekulu mejô be nga bo be kôlôʼô Yérusalém a ke Antiôche.

²⁸ Wua ya été a too jôé na Agabus, a nga kate bôt a éfufube ya Nsisim na: Beta mfumbale zaé a ye kui si ése. A a nga kui melu me Claude.

²⁹ Ane beyéʼé be nga tyiʼi na ba ye lôme mvolane e be bobenyañe be to Yudé, abim ane fôʼô jap é né.

³⁰ Ane e nga bo nalé. Atôme ya be bemvendé e nde Barnabas baa Saül be nga kee de mo.