Mm 10 - Bible en langue Bulu

Korneille ya Sézaré

¹ Môt éziñ a nga to Sézaré a too jôé na Korneille, évete bezimbi ntete wua, ba loone na Nsamba ya Italie.

² Emien a nda jé ése, be nga nyeʼe Zambe, a ko nye woñ. A nga bo Beyude abui ésôs, a loone jôé Zambe biyoñ bise.

³ Môs éziñ, bebé mewolo melale ya mamengôʼé, ane a nga yen éngele Zambe biyeyem, a nyiʼine nda jé, a loʼone nye na: A Korneille!

⁴ Korneille a nga beme nye mis asu, njalan a woñ, a nga yalan a jô na: E ne aya a Nti? Engele a nga jô nye na: Meyeʼelane môé a abui ésôse dôé, Zambe a simesaneya bie asu dé.

⁵ Ajô te ñhe, éyoñe ji, lôme bôte Yopé, be ke loone môt éziñ a ne jôé na Pierre.

⁶ A ne nneñ e nda be môt a ne jôé na Simon, nkôme bikôp, a to nda é ne bebé éwome mañ.

⁷ Ve nné ane éngele a nga zu kobô nye a nga jañe nye mis, Korneille a nga lôme bôt bebaé ya nda jé, a mone bezimbi wua, a mbe ñyeʼé Zambe, a tabeya éjôé jé si ayap.

⁸ A nga mane tebele be, a lôme be Yopé.

Nyenane Pierre a to Yopé

⁹ Tyé kpwaa, éyoñ be ngenane be kele zen , be nto bebé Yopé, Pierre a nga bet e mbalaʼa si ya nda yôp, a ke bo meyeʼelan. A mbe bebé zañe môs .

¹⁰ A nga wôʼô zaé. Be ngenane be yame nye bidi, atemeteme na, a nga ku Som,

¹¹ a yene yôp e yombôʼô; jôm é soʼo yôp, ayaé ya kôñelan, é funaʼane beta éndelé mekuʼu menyiñ, é tebeʼe si.

¹² Eyé te été, mevale me tit mese me bili mebo menyin: e ba ba woñ a ba ba yele yôp.

¹³ Ane tyiñ é nga so yôp é kobôʼô nye na: Kelek, a Pierre, wôék ô di.

¹⁴ Pierre na: Teke bebé a Nti; amu aso abialé dam, me ngenan te nambe jôm é ne mvin, nge tee ntunan.

¹⁵ Tyiñ é nga beta so éyoñe baa é jôʼô nye na: E jôme Zambe a tuneya, wo ye bo te yene je ane jôm é ne mvin!

¹⁶ Tyiñ éte é nga beta so éyoñe lale, ane éyé é nga bulane yôb été.

¹⁷ Pierre a nga kusa veʼele fas nge émien a ne yem atinane ya jôm a nga yen. Minlômane mi Korneille ke ve suane mbé yôb, valé, a kooé na be maneya ke ba sili li a li vôme nda Simon é né.

¹⁸ Ane be nga yôtan, be yi na be tuʼa yem, nge Simon, a ne jôé afe na Pierre, a mbe nneñe ya nda éte.

¹⁹ Nté te ôse, Pierre a mbe a simesaʼane ñyenan a nga yen. Ane Nsisim a nga jô nye na: Tame yene bôt bebaé ba jeñe wo.

²⁰ Sisik éto ji, ô ke mia be be, teke ndiñetan, amu ma ma lôme wo.

²¹ Ane Pierre a nga sis, a ke koone be, nye na, ma nyô. Ma me ne môte mia jeñ. Mia jeñe ma amu jé?

²² Ane be nga yalan a jô na: Evete bezimbi ntete wua, môt a ne zôsôô , nyô a ko Zambe woñ, nye ate fe jôé dé e bili mbamba nkañete ayoñe Beyude ese été. Mfufube éngele, ñwô ô nga liti nye na a loone wo nda jé na, ô vôʼôlô ane a kañete wo metema jam a nga yen.

²³ Ane Pierre a nga diine be mbé a nyoñe be mvoʼé . Tyé kpwaa ya valé, baa be nye be nga ke nsamba, a bobenyañ bʼéziñ ya Yopé.

²⁴ Alu da e lôteya, ane a nga kui Sézaré. Korneille a nga mane bañete bivuvumane bié a benya bemvôé bé, a yange nye.

²⁵ Eyoñe Pierre a nga suan, Korneille a nga ke sôô nye, a ku nye mebo si, a ve nye duma.

²⁶ Pierre a nga jô nye na: Kôlôʼô si! Ane a nga bete nye si a jô nye na: Ma fe me ne môt ane wo.

²⁷ Be kele ba laan, ane a nga nyiine nda été. A nga koon abui bôt,

²⁸ Nye na: Avale mia yem, e ne étom mfaʼa mone Beyude na, a latan, nge siñelane a mone bikuu. Ve mfaʼa wom, Zambe a maneya yeʼele ma me yeme na, me nji yiane yene môte mvin nge tee ntunan.

²⁹ Ajô te ñhe me nji veʼele yeme mebo si éyoñ ô nga loone ma.

³⁰ Ane Korneille a nga nyoñ nkobô a jô na: A ntoo den melu melaa, mewolo melale ya mamengôʼé, me mbe me yeʼelane e nda jam.

³¹ Atemeteme, na môt a beʼe étôtoʼo ngômesan a ntele ma ôsu a jô me na, meyeʼelane môé me nyoñebaneya a Korneille, a akabe dôé, Zambe a simesane de.

³² Ajô te lôme môt e Yopé, a ke loone Simon, ba loone jôé afe na Pierre, a zu va. A too nneñ e be Simon, nkôme bikôp, e fefele éwome mañ.

³³ Eté été, ma te lôme bôt be zu loone wo, ô boya mvaé ane wo te zu koone bia. Bia bese ba, bi ne asu dôé, mfaʼa ya vôʼôlô mam mese Nti a veya wo na, ô kate bia.

Nkobô Pierre e nda Korneille

³⁴ Ane Pierre a nga taté nkobô a jô na: Me yemeya foʼo na, Zambe a nji bo éngengame.

³⁵ Meyoñ mese, môt a ko nye woñ a bo zôsôô , nye a nyoñebane mvoʼé e be nye.

³⁶ A nga lôme Foé jé e be mvôʼô Israél, Mbamba Foé ya mvoʼé , amu Yésus Krist, nyô a ne Nti ya bôte bese.

³⁷ Mia yeme beta jame ya mevak, ate. A nga yian afôla ese ya Yudé. E nga taté e Galilé, e mvuse ya nduane Yôanes a nga kañete.

³⁸ Yésus ya Nazarét ate, mia yem ane Zambe a nga ve nye Mfufube Nsisim a ngul. A nga volô bôt e vôm ase a nga lôt. A nga saé bôte bese Satan a nga bi éto belo si, amu Zambe a nga too be nye.

³⁹ Bia bevok, bi ne bengaa ya ésaé jé ése a nga bo sii Beyude, aval ane Yérusalém. Nye be nga tyelé krôa yôp a wu.

⁴⁰ Zambe a nga wômôlô nye miñwuan.

⁴¹ A nga liti émien, saa be bôte bese, ve be bengaa Zambe émien a nga top, te yene biyoñ bi za boʼok. Bia be nye bi nga di, mvuse ya ñwômane miñwuane wé.

⁴² Ane a nga bendé bia, bi kate de bôt a bo bengaa. Nye Zambe a nga telé ntyiʼi mejô ya bevevee a miñwuan.

⁴³ Nye ate bekulu mejô bese ba kañete ajô dé e be môt ase a telé ndi nleme jéé be nye.

Bikul bia nyoñe Mfufube Nsisim

⁴⁴ Pierre a ngenan a kañeteʼe bibubua bi mam bite, ane Mfufube Nsisim a nga zu e be bôt be nga wôʼô ajô Zambe.

⁴⁵ A mbe jame ya semé, e be bôte be mbe ntyiʼane metyele be nga litane Pierre; nalé fe meyoñ bikuu, mveane Mfufube Nsisim ô nga mialane e be be.

⁴⁶ Be nga wôʼô be kobôʼô minkobô , a wumu Zambe. Ane Pierre a nga beta nyoñe nkobô a jô na:

⁴⁷ Ye môt a ne ngule ya kamane bôte ba be duban a mendim, mbe bete be nyoñeya Mfufube Nsisim aval ane bia?

⁴⁸ Ane a nga ve tyiñe na be duu be a jôé Yésus Krist. Ane be nga buʼu nye a beta tabe be be abe melu.