Mm 1 - Bible en langue Bulu

Nkeane yôbe Yésus

¹ A Téôfil, e kalate wom ôsusua me nga tili, me nga dañe liti mimboon a miñyeʼelan mise Yésus a nga bo a yeʼele bôt, aso atataʼa,

² akekui môs a nga nyoñebane yôp, njalane a Mfufube Nsisim, valé a maneya tyeñele beyéʼé a nga top.

³ Beyéʼé bete mbe ñhe a nga liti émien, mvuse ya mintaé mié a awu dé, a mendem abui, nté ya melu mewôm menyiñ. A nga yené e be be a laane be ajô éjôé Zambe.

⁴ Ezezañe ndian baa be beyéʼé, a nga bendé be na: Te kôlane Yérusalém, ve tame yange ngakaʼa Nti, nyô me nga kate mia, e ne na:

⁵ Yôanes a nga du foʼo bôt a mendim, ve mia, mia ye duban a Mfufube Nsisim, teke ayab éyoñ mvus éte.

⁶ Nde éyoñ be nga sulane vôme wua, be nga sili nye na: A Nti, ye éyoñ é kpwaneya na ô beta telé éjôé ya ayoñ Israél?

⁷ Ane a nga jô be na: E nji bo ajô denane na, mi yeme biyoñ a zia melu Esaa wom a nga telé a ngule njôane jé.

⁸ Ve mia ye nyoñe ngu éyoñe Mfufube Nsisim a ye zu be mia. Mvus éte, mia ye bo bengaa bam, ataté Yérusalém, Yudé ase a Samari, akekui mekuʼu mese ya si nyô.

⁹ Mvuse ya mejô mete, e mise map été, ane a nga betebane e yôp, nsume nkut ô nga solé nye mise map été.

¹⁰ Be ngenane be fombôʼô yôp mfaʼa a nga ke, a teme na bôt bebaé, be beʼe bifumulu mengômesan, be ntele be fefe,

¹¹ a jô be na: A bôte ya Galilé, amu jé mia langane va, mi fombôʼô yôp? Yésus ba te nyoñe mia yôbe nyô, a ye beta so, avale mia te yen a kelek.

¹² Nkôlane ya nkôle ba loone jôé na, Nkôle beôlivié, ane be nga bulane Yérusalém. Nkôle te ô ne nté ane môt a wulu môse Sabat

¹³ Eyoñ be bulaneya, be nga ke étune nda ya yôp, vôm ate, mfulane minlem, be nga bo meyeʼelan. Be mbe na: Pierre, Yôanes, Yakob a André, Filip a Tômas, Bartélémi a Metias, Yakob mone Alfé, Simon a mbe jôé afe na Zélôte a Yude mone Yakob.

¹⁴ Binga bʼéziñ aval ane Marie, nyia Yésus, a bobenyañe be Yésus, be nga to fufulu a beyéʼé.

Metias a nyoñ éto Yudas

¹⁵ Melu mete Pierre a nga tebe tetele e zañe bobenyañ. Be mbe nsulane valé, bebé bôt ntet a mewôm mebaé. Ane a nga yôtan a jô na:

¹⁶ A bobejañ, e jame Mfufube Nsisim a nga kat e kalate Zambe été anyu David, e nga yiane tôéban, ajô Yudas, nye a nga suʼulane bo nliti zen ya bôt be nga bi Yésus.

¹⁷ A nga lañeban ane wua ya be bia, ane a nga nyoñe ngabe jé ya ésaé jangan.

¹⁸ Nde môt ate a nga kus éfuse si a maʼane ya abé dé. A nga ku si bubutu, ane abum e nga tui, miñya mise mi jôʼô atan.

¹⁹ Bôte bese ya Yérusalém be nga wôʼ ajô te. A si éte é nga lobane nkobô wobe na: Hakeldéma, e ne na, si metyi.

²⁰ Ajô te nde e ne ntilan kalate besame été na: Nda jé é boʼo éfut, môt éziñ a boʼo te tabe été, a na môte mfe a nyoñ ésaé jé.

²¹ Bôt bese be nga litane bia melu mese Nti Yésus a nga wulu bia,

²² ataté nduane Yôanes, akekui a nga nyoñebane yôp, wua ya be be a yiane lañeban e nsamba bengaa ya ñwômane wé.

²³ A be nga liti bôte bebaé ônyu, Yôsep, be nga loone na Barsabas, a jôé mebatan na Yustus a Metias.

²⁴ Nde be nga bo meyeʼelan ma: wo, a Nti, wo yem minlem ya bôte bese, litii wua ya bôt ba bebaé, mbé ô tobeya na

²⁵ a nyoñ ésaé Yudas a nga jôʼé aval ane nlôman , mfaʼa ya ke vôm a ye nyoñ ane ngap.

²⁶ Ane be nga bo asimba . Ane asimba e nga tobe Metias nye ate, ataté éyoñe te, a nga jalé tañe minlôman awôm a mibaé ya mi nga liʼi awôm a wua.