MINYÔN 5 - Bible en langue Bulu

Bulaʼane bia be wo a Nti

¹ A Nti ô simesaʼane jam e kuiya be bia fombôʼô a yen ane ba taa bia.

² Akume dangan da dañ étyi e keya be bôte befe, menda mangan ki e be bikuu

³ bi ntoo bobenyui te kʼésaa benyia bangane ki ane minkus.

⁴ Bia nyu mendime ya menjeñe mangan ve taté ve moné, bia kuse fe njaʼa jangan.

⁵ Bi beʼe bôte ba tibili bia mvus; bi teʼeya, bi nji bi awoʼon.

⁶ Bi sameya mo Ejipte a Asiri na bi bi bidi abime ya di a jaé.

⁷ Bʼésaa bangan be nga bo abé ve be nji fe bo, a bia bi beʼe mbeʼe ya bikobe biap.

⁸ Alo da jôô bia a teke môt a vaa bia e mo map.

⁹ Bia juu ényiñe jangan asu ya bi bidi, nkpwaté mekône ya fé ô too bia ôsu.

¹⁰ Ekôbe jangan ja bili ayôñ ane mbuñ ba yame bidi amu bindeñelaʼa ya zaé.

¹¹ Be nga jôʼôbô binga e Siôn a ngu, a bindune bengon e bitisone ya Yuda.

¹² Mo mab me nga tyelé bivete yôp. Be nji semé bemvendé.

¹³ Bendôman be nga beʼe akoʼo ba koʼo bidi bobefam be nga kolé ôbak amu adite bibañ bi njaʼa.

¹⁴ Bemvendé be bôt be nji fe beta tabe Bimoʼo a bendôman be jôʼéya nyiane bia.

¹⁵ Avaʼa ya minleme miangan e maneya, mebôʼô mangan me veñesaneya du.

¹⁶ Ekate duma ya nlô wongan é kuya! Ngoʼo bia amu bi boya abé !

¹⁷ Tame yen amu jé minleme miangan mia kon, tame yen amu jé mise mangan ma bo ndim,

¹⁸ amu nkôle Sioñ ô ntoo bilik, a amu na bemvak mbe be nga wulu été.

¹⁹ Ve wo Nti ô ne njô bôt nnôm éto, wo jôô a kui miaé mi bôte mise.

²⁰ Amu jé ô ne vuane bia nnôm éto, ye ô ne vuane bia ngume nté ényiñe wongan ôse?

²¹ A Nti boʼo bia na bi bulane be wo, a bia ye foʼo bulan. Betaʼa bo melu mangan mimfefé aval ane melu mvus!

²² Ye e ne bo na ô wuaya foʼo bia fé, ye ô wôʼôya bia abé a dañe nné?