MINYÔN 4 - Bible en langue Bulu

Minyôn ajô Yérusalém

¹ Jia! or a ntoo teke fe faé! Nya or a maneya tyendé! Mekoʼo me nʼétyi me ntoo mmialan e mebôta ya minjoñe mise!

² Bidima bi bone be Siôn mbie bi mbe tañe nya or, jia! Be ntoo éyoñe ji ane mevieʼe me tyia, mboone ya mo me mmé meviek!

³ Jaʼane minkemvaʼa fe mi beʼe minleme benyia a mia nyia bone mebé; ve ngone yʼayoñe dam é ntoo njet ane bʼéngutu ya fé.

⁴ Ôyeme nyañebéé wo kabetane ndʼanyu jé amu évé. Bon ba sili belet ve teke môt a tyiʼi bʼôfufus,

⁵ ba be mbe be jaʼa bidi bi ne zam be nga wu zaé minjoñ; ba be nga yaé e bitôtoʼo mengômesan été be nga bune mekun éyoñe ji.

⁶ Mbia be mam me ngone ya bôte bam me nʼanen a dañ abé ya Sodom nye a kpwééban étun éyoñ te na môt éziñ a nambe nye.

⁷ Benazirieñ bé be mbe mfuban a dañe sut, nalé fe éfumulu a dañe menyañ; menyôle mab me mbe évele a dañe mekoʼo me nʼédima; minsise miab blum ane Safir.

⁸ Ba yené évindi éyoñe ji a dañe mvilaʼa, teke môt a beta yeme be minjoñ ékôbe jab ja kabetan e bives, é maneya kôt ane njaʼa.

⁹ Bôte nkpwaté mekôn ô nga wôé be nga bi maʼa a dañe ba ba wu a zaé. Mbe ba bok a nteʼan amu teke bidi ya mefup.

¹⁰ Binga bete, mbe be nga bili nyeʼan e mo map, bebien be maneya yame bone bap be bo be bidi e beta njuʼu ngone yʼayoñe dam été.

¹¹ Nti a keya kui akuʼu yʼayaa dé, a sôéya ayaa dé e nʼayôñ. E Siôn, a boʼéya nduan ja diʼi nje é maneya mine mimbôkaʼa mié.

¹² Toʼo bejô bôte ya si nyô toʼo bôt be too émo ji be nji bo nguleya buni na: Môt a wosane ma, nsiñ a ne nyiin e mimbé ya Yérusalém,

¹³ nalé a boban amu abé bekulu mejô bé, a minkobane betuni bé mbe be nga kuli metyi bezôsôô be bôt ézezañe jé.

¹⁴ Be nga ke ba ndeñe minjoñ ane mindindim, nseme metyi ô too be nyô. môt a too te nguleya nambe mengômesane map.

¹⁵ Be mbe be jôʼô be na: Kôlaʼan, mia mimvimvin! Kôlaʼan! Kôlaʼan! Te nambane bia! Eyoñe ba ke ba tub te yeme vôm ba ke, bikuu bi nga jô na: Be se nguleya tabe be bia ayap.

¹⁶ Nti Emien a maneya tyamelane be a nji fe beta fombô be; be nji semé betuni nge mvamane minnôm.

¹⁷ Mise mangan me nga kʼôsu a bili ateʼe zesé mfaʼa ya yange mvolan ô nji ke so. Bi too vôme bia mombô, bia fombô nsoon ayoñe bôt e se nguleya nyii bia.

¹⁸ Ba yemelane medaa mebo mangan avale bi se fe nguleya ke mevôme mangan, asuʼulane dangan e ntoo bebé; melu mangan me kpwaneya; yaa, asuʼulane dangan e soya.

¹⁹ Bôte ba kpweʼele bia be nʼavôle mebo a dañe bendôé ya yôp; ba ndeñele bia e minkôle yôp, e vôm ôzôm ô né, ba yabe bia.

²⁰ Nyô a mbe ényiñe jangan, nyôô Nti a ne ñwoʼone mbon a biliya e bibé biap. Bi mbe bi jôʼôk ajô dé na: Bia ye nyiñe meyoñ été bi too éjijine jé si.

²¹ Fônôk a vak, a ngon Edom. Wo ô too si ya Ut! Elaé ja ye fe lôte be wo, wo ye bili bilam a telé womien sôsoé!

²² A ngone Siôn, ékobe jôé é maneya; Nti aa ye fe beta kee wo minkôm. A ngon Edom, ékobe jôé nje a ye ve melep . A ye kulan abé dôé.