MINYÔN 2 - Bible en langue Bulu

Nti a ne Yérusalém e ngame yat

¹ Jia! Nti, ayaa dé été, a futiya Yérusalém e minkute si étôtoʼo yʼIsraél, a sôʼôlôya je é soʼo yôb a kui si! E môse yʼayaa dé a nji ke fe simesan ételé mebo jé.

² Nti a maneya mine bitabaʼa bi Yakob bise te kʼéngôngo; ayaa dé été, a maneya tyam bitison biʼalem ya Yuda, a maneya wua bie si; a sameleya si a bejôô yʼété.

³ E beta ayaa wé été, a maneya buʼu ngul ése yʼIsraél; a bulaneya mbo nnôme wé mvus besiñ be too jam a boya Yakob da funane nduan ja yôñ a diʼi mimfaʼa mise.

⁴ A koléya élaé jé ane nsiñ, mbo nnôme wé ki nkômesane ya limiti je ane nyô a ne ngame yat, a maneya wôé jôm ése mis me mbe me yene mvaé, ayaa dé e kalaneya e nda Zambe ya Yérusalém ane nduan.

⁵ Nti a ntoo foʼo vʼane nsiñ; a mineya Israél; a mineya fe menda bejô bôte mé, a maneya tyame bitisone biʼaleme bié, du a miñyôn a jaléya bie e be ngone ya Yuda été.

⁶ A maneya buʼu akaʼa dé avalʼane di yʼafup. A maneya tyame vôm a mbe a tôbaʼane bia Nti a boya na bôt be vuan beta ésulan a Sabat e Siôn; e ngul yʼayaa dé été, a sameleya njô bôt a betuni.

⁷ Nti a beneya ataʼa metunaʼa dé a yene vôme wé a nʼétyi nyé. A kalaneya mimfine menda bejô bôte ya Siôn e mo besiñ, zôʼé é bobaneya e nda Nti avalʼane môs abôk.

⁸ Nti a tyiʼiya na a tyam akaʼa mekoʼo ya Yérusalém a limiya nko, a se nguleya bulane wo mvus te na a mane mine be; akak a mfin bi ne ôlun été, jina a ji vok bi ntoo ntyaman.

⁹ Mimbé mié mi maneya nyiine si été, a maneya tyame bie a té mengôñ. Njô bôte wé ba be bivete bié be ne mmialan e meyoñ été; metiñ me nji fe bo. Toʼo na bekulu mejô bé fe teke fe yene mam me too nlitane Nti.

¹⁰ Bemvendé ya Yérusalém be too si, teke kobô; be maneya kute mbuluk e minlô miap, be maneya jaé minkuta; bengo be binga ya Yérusalém ba luu minlô mfaʼa ya si.

¹¹ Mise mam me jaéya a milik miñya mia boʼo mʼabum zôñ é tuiya ma amu mbia jam a kuiya be ngone yʼayoñe dam, amu bon a benyañebéé ba wu évé e mevôme ya tison me ne ndam

¹² ba jô benyia na: Fôn a woon bi ne vé? A ba wu ane bôt be ne mbalane meveñ e mevôme ya tison me ne ndam, be nga jii e mebé benyia.

¹³ Ma ye beta jô wo aya? Asu dam za a ne veʼane wo, a me ne volô wo nlem aya a Yérusalém? Amu njuʼu wôé ô nʼanen foʼo vʼane mañ: Za a ne nguleya bo wo mvoʼé ?

¹⁴ Minyenane bekulu mejô bôé be nga yen asu dôé mi mbe momo a minsos be nji ke kulan ékobe jôé a bo wo na ô saʼale minkôm; foé jap, asu dôé, é mbe ve minsos a meduʼan,

¹⁵ ba bese ba lôte va ba kute wo mefas, ba loñe vioñ a meʼete nlô ya tebe ngone ya Yérusalém e ngame yat. Ye tison be mbe be loʼone na: Ntut abeñ, mevaʼa ya si ése, nje foʼo nyô?

¹⁶ Besiñe bôé bese ba dii wo menyu nyô, ba loñe vioñ a latane mesôñ, ba jô na: Bi maneya mine nye! E môs bi mbe bi yangeʼe ñwô wu, bi kuiya wô, bi lôô wô!

¹⁷ Nti a tôéya jam a nga tyik, a boya mejô a nga nyoñe ntyiʼan mimbu ya mvus. A tyameya te kʼéngôngo; a boya wo avaʼa besiñ, a beteya ngule ya besiñe bôé yôp.

¹⁸ Nleme wob wo yône be Nti. A akaʼa ya ngone Siôn, jôkéʼé miliʼi môé me lôt anʼôtôñe mendim! Te ve womien awoʼon, a nyia dise wôé a boʼo te woʼon.

¹⁹ Te tabʼévô, awolo anʼawolo, ve jalé ngum alu a miñyône miôé. Sôʼé e mam mese me ne wo nlem ane mendim asu Nti. Same mo môé yôbe be nye amu ajô ényiñe ya bitume bi bone biôé, mbie bia ku some zaé e mefefele minjoñ mese.

²⁰ A Nti fombôʼô a yen za nye wo bo avale mboone di. Ye binga be ne kui vôme ya di e bone be nga biaé a nyeñele? Ye be ne nguleya wôé betuni a bekulu mejô jaʼane vôme wôé a nʼétyi?

²¹ Bisoé a minnôm ba bôbôane si; bengo be binga bam a bendômane bam ba ku mimbim a nkpwaté mekôn; wo jian e môse yʼayaa dôé, wo tyiʼi tyiñ te kʼéngôngo.

²² O maneya bañete bikowoñ besiñe biam aval ane môs abôk. E môs ayaa dôé da tôtan, teke môt a fam nge nyiñ, a Nti! Bone me nga yale a nyeñele besiñe bam be maneya wôé be.