MINYÔN 1 - Bible en langue Bulu

Yérusalém a ntoo vʼane nkus

¹ Za akaʼa étame tisone nyô é ntoo di nyô é nga too bôte ne lut melu mvus! Nyô é nga wum e meyoñ été é ntoo ane nkus. Nkpweʼe tison ô nga jôô bifuse mesi o ntoo éyoñe ji asu bisaé biʼalo.

² Ja yône ngum alu, milik me lene je memañ. Ba bese be nga nyenyeʼe je teke môte wua a volô je nlem . Bemvôé bé bese be boya je njoñ, be ntoo besiñe bé.

³ Eyoñe Yuda a ke minkôm, ôsame a éto ôlo bi lateya nye. Yuda a too bikule zañ, ve a kate bi awoʼon. Bekpweʼele bé be diliya nye ôfanefane vôm.

⁴ Mezene ma ke Siôn me ne ôlun été amu bezuu abôk be liʼiya me ébooé. Mevôme mé ya bôte ba sulan me ntoo ne ngongongo, a betuni bé ba sôôé abuk. Bengo be binga bé ba wôʼô ôlun; jame te e nʼayô mfaʼa wé.

⁵ Bôte be ne nye ngame yat be dañeya nye besiñe bé be too mvoʼé . Nti nye a tulu nye nlem amu abui melo dé. Ayôme bongô dé da ke minkôm be tele nsiñ ôsu.

⁶ Yérusalém a dimiliya étôtoʼo jé ése bivete bié bi ntoo ane minkok mi nji fe yene jôme ya di, a mmie mia ke ñwua ngal ôsu, ngule momo.

⁷ E biyoñe ya ôsame wé nyô a ényiñe ndeñendeñe jé ji, Yérusalém a simesane mam mese a nga bili me mbe mvaé melu mvus, éyoñe bôte bé be nga ku e mo besiñ, teke môt a volô be, bôt be ne nye ngame yat be nga yene nye a woé njañane wé.

⁸ Yérusalém a nga bo abé dé abui abui ajô te a ntoo jôm é ne mvin; ba bese be mbe be seméʼé nye ba biasé nye éyoñe ba yene soé jé; mfaʼa wé a liʼiya nye ve na a sôôé abuk a lume mvus.

⁹ Ezingi jé é beʼe mebate ya mvine jé, a nji boʼo a yemek e jam da ye kui be nye; ajô te nkuane wé ô kuiya be nye atemetem, ve teke môt a volô nye nlem . A Nti! Ô lôô ôsame wom! Amu nsiñe wom a dañeya!

¹⁰ Nsiñ a maneya sa jôm ése Yérusalém a nga bili é too nyʼédima. A Yérusalém a maneya yene meyoñe bikuu me nyiʼin e vôme wé a nʼétyi, e ma ô nga ve atiñe na me bo te nyiin ésulane bôte jôé.

¹¹ Bôte bé bese ba tat: ba jeñe bidi; be maneya ve jôm be nga bili é too édima asu bidi, ane be ne beta ve binyiñe biabe ngu. Tame yen a Nti a fombô ane me ntoo nsilibane si.

¹² Avale jame di e ngenane te kui be mia mia lôte njoñ, fombaʼan a yen nge mintaé mife mia funan émiam e mie Nti a veya ma e môse ya beta ayaa wé.

¹³ A too yôb été, a lômeya nduan é diʼi ma bives, a dañe bie ngu; a yaaya avot e mebo mame si a sôʼôlô ma kayale; a boya ma me tabe étam a kone môs ôse.

¹⁴ Nti a lôô bikobe biam me nga bo, bi boya atiñ e wo wé été, bi beteya a kui me tyiñ . Nti a boya ngule jame momo jôm, a kalaneya ma e mo besiñ mbe me se nguleya bo jam.

¹⁵ Nti a maneya titane biwôlô bezimbi bise me nga bili; a nga tôkane nkane bita ya wosane ma a mane wôé bisoé bi bôte biam. Nti a maneya miate éndune ngone ya Siôn anʼébuma ndiʼi woon e vôm ba miate bibuma.

¹⁶ Mam mete mme ma bo na me yi, milik ma kui me mis amu nyô a ne volô ma nlem a beta wômôlô ényiñe jam a keya ma ôyap. Bone bam be ntoo éngôngo amu nsiñ a maneya dañ.

¹⁷ Siôn a same mo môte ya volô nye nlem a ne momo; Nti a maneya ve besiñ ba bômane Yakob na be tebe nye ngame yat, Yérusalém a ntoo jôm é ne mvin ézezañe jap.

¹⁸ Nti a ne zôsôô amu me nga bo abendé dé melo. Vôʼôlaʼan, mia meyoñ me bôte mese, yenane njuʼu wom. Bengone bam a bendômane bam be maneya ke minkôm.

¹⁹ Me nga loone bôt be mbe be nyekeʼe ma, ve be maneya duʼu ma. Betuni bam a bemvendé bam be nga wu e tison été: Valé be jeñe jôme ya di mfaʼa ya beta nyoñe ngu.

²⁰ A Nti, tame yen aval ôlun me tele été, miñya mia boʼo mʼabum été nleme fe ntyaʼan amu me nga bo foʼo wo melo. Mfaʼa yʼatan nkpwaté mekôn ô maneya jiane mvoñe jam, e be mamien été ki foʼo vʼawu.

²¹ Be nga wôk ane ma tat ve teke môt a volô me nlem; besiñe bam bese be nga wôʼôtane njuʼu wom, be nga vak amu wo ô nga bo me de; boʼo na e môs ô nga telé ô zu, éyoñe te be fe ba ye tôban ane me bili.

²² Abé dab ese e zaʼak asu dôé ô bo be ane ô nga bo ma, amu mbia mimboone miam mise. Amu mintate miam mi nʼabui a nleme wom wo wôʼô mintaé.