MINKANA 9 - Bible en langue Bulu

Fek a akute mboon

¹ Fek é maneya lôñe nda jé, é maneya ba e beta mekône mé zamgbwa,

² é maneya tyiʼi betite bé tyiñ , a bundane woone wé, a kôme tawôlô wé:

³ é maneya lôme bebo bisaé be binga bé, ja yôtan e mevôme ya tison ma dañe mbetane yôp:

⁴ môt ase a nʼakut a tame yale nné! Ja jô môt ase a ne feʼe momo na:

⁵ zaʼan mi di e belet jam a nyu woon me maneya kôm;

⁶ jôkaʼan mboone mame ya te fek éyoñe te mia ye nyiñ! Nalé fe na wulaʼan e zene ñyemane mam.

⁷ Môt a lebe môt a nyeʼe a kpweʼele bôte bevok a dutu ébiasé e be émien, a nyô a komekane mbo abé , meveñ mme a ye nyoñ ane maʼan.

⁸ Te lebe nkpweʼele bôt a za vini wo ve lebe mfefek, wôna a ye nyeʼe wo.

⁹ Vaʼa mfefeʼe môte biôm, wôna a ye bulu bo fek; vaʼa zôsôa môt ñyeman, wôna a ye kôʼôlane ñyemane wé.

¹⁰ Nkoone Zambe woñ ñwô ô ne atataʼa tine ya ñyemane mam; a ñyemane mame bezôsôô be bôt ô ne mbamba ñwôʼane mam.

¹¹ Amu na melu môé ma ye bo abui vʼamu ma, a mimbu yʼényiñe jôé fe mia ye bo abui vʼamu ma.

¹² Nge ô ne mfefek, ô ne je asu dôé womien; nge ô ne môta bisô ajô dôé ñhe le.

Akute mboone mam

¹³ Akute minga e ne zôʼé nkobô, feʼe momo a te yeme jôm.

¹⁴ Da tabe anyiine ya nda jé, éto éziñe yôp, e mevôme ya tison me ne mbetane yôp,

¹⁵ a yôtan e be bôt ba lôtan be tôñe zene jabe zôsôô ne tiññ na:

¹⁶ môt ase a nʼakut a zaʼa va! E be môt a ne feʼe momo a jô na:

¹⁷ mendim ba te wup me ne évôvoé, a e belet ba te solé é ne mvaé!

¹⁸ Ve môt ate a nji yeme na miñwuan mi ne vôm ate, a na bôt bese minga ate a loon, be ne mimbiʼili mi vôme ya miñwuan.