MINKANA 7 - Bible en langue Bulu

Minga mejian a won ésoé ndôman

¹ A mone wom, baʼaleʼe mejô mam a te vuane minjôane miam.

² Baʼaleʼe mebendé mam, nalé ate wo ye nyiñ, a baʼaleʼe miñyeʼelane miam avalʼane benyia ya mise môé.

³ Tiñetiʼi mie anyu dôé ya mo, tiliʼi mie e akoʼo ya nleme wôé.

⁴ Jôʼô feʼe na ô ne kale jam! A loone ñyemane na e mvôé jam,

⁵ éyoñe te bia ye baʼale wo e bʼéza minga e be minga bikuu a bikôkone bié.

⁶ Me nga too e vundu ya nda jam me fombôʼô atan

⁷ nde me nga yen ézezañe ya mekute bisoé bendôman été, jia é too foʼo teke fek

⁸ ésoé ndômane te é mbe é lôtôʼô e njoñ, bebé e vôme minga éziñ a mbe a too,

⁹ jame di e nga boban éyoñe môs wo ndeñ, éyoñ alu e nga subu a dibi e nga taté vin.

¹⁰ A teme na minga éziñ a nga zu tôbane nye, a beʼe mengômesan ane minga bijabô, mvô é too fe nye njalane nlem ,

¹¹ minga a too ayok a ôsone momo be nye, dulu mebo, te tabe si e nda jé,

¹² anaʼana e njoñ, anaʼana e minseñ, ésaé é too ve na a ke a yabe befam e mevôm mese.

¹³ Ndʼa nga bi ndômane nyô a wubane je ve jô nye a ayas ése na:

¹⁴ me nga bili mvôla mveane metunaʼa ya nlatane ngbwa, den me tôéya mintiñetane miam,

¹⁵ ajô te ma te zu ôsu viôé na me jeñe wo, a me yeneya wo,

¹⁶ me maneya kôm énoñe jam a mimfinga, a bindelé bi ne ntiñan a minsinga mia so Ejipte;

¹⁷ me maneya sôé beôlobinda e vôm ma bômbô: mir, Aloés a Sinamôm.

¹⁸ Zaʼak bi tame jaé nyeʼesane ngum alu a kui tyé, bi buʼubane mvaé nyeʼane wo ve.

¹⁹ Amu nnôme wom a nji ke bo e nda , a keya dulu e nʼôyap;

²⁰ a nga ke fe mfeʼe moné. A ye beta kui nda ve môse ngon ja ye bo abôm.

²¹ Ndʼa nga tindi nye na a kañese a atyeñe mboone mame biwonoʼo dé, a nga dutu nye a évievion atyeñe ya biyaé bié.

²² Eté été, ndôman éte ve zu tôñe nye ane nnôm nyak a ke vôm ba tyiʼi benyak, anʼakut ba kaʼa ngataʼa na ba zu ve de melep ,

²³ akekui akoñ élaé e tulaneya nye ések, aval ane ônon wo ke avô e vôm avot e né, ô too te yeme na ajô yʼényiñe jé nde le;

²⁴ ajô te éyoñe ji vôʼôlaʼane ma a bone bam a keʼane melo e mejô yʼanyu dam.

²⁵ Nleme wôé ô boʼo te duʼubane na ô tôñ avale minga te, te jañ e mezene mé été,

²⁶ amu a kpwéya bôt abui, ba bese a nga wôé be mbe beta mingungu.

²⁷ Nda jé é ne foʼo ve zen ja kee bôt e vôme ya miñwuan, e zene ja siliki e bitabaʼa yʼawu.