MINKANA 6 - Bible en langue Bulu

Melep mevale meva

¹ A mone wom nge wo kañese yaʼane memvôla, me môte mia nye mi too, nge ô veya womien asu môte mfe,

² nge ô maneya tiñeti womiene ngataʼa a mejô yʼanyu dôé, nge ô biliya a nkobô yʼanyu dôé,

³ Boʼok avale di, a mone wom na ô nyii womien: amu ô maneya ku e mo me ébemôtô te kele le kute meboñe si a ndeñele ébemôte wôé;

⁴ te beté ôyo dis nge ve biyakolô biôé awoʼon.

⁵ Nyiʼi womien ane nkok e mo me suteman, anʼônon e mo me nlam anon.

⁶ A nleles, kele be suluk; fombôʼô mezene mé a wo ye bi fek;

⁷ é nji bi ntebʼôsu ya mewosan, nge mone bezimbi a bili beta mebak nge bekôndé, nge njôô;

⁸ ja kômesane bidi bié a ésep, ja naane jôme ya di éyoñe ya nkôane bidi.

⁹ A nleles, wo ye bômbô si a kui éyoñ évé? Wo ye kôlô si ya ôyo viôé éyoñ évé?

¹⁰ Mon ôyo tyôtyoé, mone ñyaane ndaya mone mbaʼane mo ô bôô si.

¹¹ Eyoñe te ñhe azoé da ye dilane wo ane môt a so atemetem, a ôsame ane môt a bo bita éyoñ ése.

Akute môt

¹² Nyô a ne zezé jôm a ne e môt a nʼékotekot; a wulu minsos anyu ne lut;

¹³ a nyete mis, a kobôʼô a mebo, a bo mendem a anyu ya mo;

¹⁴ ékotekot é ne nye nlem , a simesan abé éyoñ ése, a tyaʼa mintañete.

¹⁵ Ajô te a ye kui ôsame atemetem; a ye buʼuban éyoñ jijia teke biañ.

¹⁶ Zambe a vini mam mesaman, yaa me ne zamgbwa a dañe wôʼangôndô ya abé :

¹⁷ e mise me ne bives, Ôyem wo duʼu bôt e mo ma kulu metyi me ne te bijô

¹⁸ e nleme wo bindi bikotekote bi mam mebo ma mate mbil ya bo abé ,

¹⁹ ékotekote ngaa ja laane minsos nyô a miase mintañete e zañe bobenyañ.

E minga a wone bôt

²⁰ A mone wom, baʼaleʼe mebendé mʼésoo, a te ben ñyeʼelane nyua;

²¹ kaʼa bie e nleme wôé éyoñ ése, a tiñeti bie e tyiñe jôé.

²² Bia ye liti wo zen e dulu dôé, bia ye baʼale wo énoñe jôé, a bia ye kobô wo éyoñ wo vee ôyo.

²³ Amu abendé e ne lambe, nyeʼelane ki éfufup, a minkomekan mia ve ñyeʼelan, mi ne zene yʼényiñ;

²⁴ bia ye baʼale wo be mbia minga, a e be évôvoé ôyeme biwonoʼo ya éza minga;

²⁵ te nyamete abeñ dé e nleme wôé été, a te bili ôlam ya biyakolô bié.

²⁶ Amu minga ébamba a yene mvaé a éfuse belet, ve éza minga mejian a lam ényiñ môt é nʼédima.

²⁷ Ye môt a ne kôbane nduan e be émien te na mengômesane mé ma kalane nduan a dik?

²⁸ Ye môt a ne wulu e maʼa me nduane yôp, te na mebo mé ma dik?

²⁹ Avale te fe da kui e be môt a ke e be minga ébe môtô; môt ase a nambe nye a ye nyoñe melep .

³⁰ Be ne te bisaé ñwuwube wo wup mfaʼa ya volô ndoʼo jé éyoñ wo wôʼô zaé;

³¹ Vʼéyoñ be dilaneya wô, wo ye yaʼane jôme jia biôme mewôme zamgbwa, a ye ve akum ese a bili e nda jé.

³² Ve môt a bo mejian a minga, a ne feʼe momo, môt a kômbô jañele ényiñe jé nye a bo avale te;

³³ a ye bi ve meveñ a ôsame, a ôsone wé wo ye bo te man.

³⁴ Amu zes ja bo fam é yaa ane tit, e môse yʼakunaʼa é ne te kʼéngôngo;

³⁵ é ne te bisi ntañ mejian , a é nji kañese toʼo na wo ve nye biôm abui.