MINKANA 5 - Bible en langue Bulu

Mebôbelaʼa me ne abé

¹ A mone wom, tukaʼa vôʼôlô feʼe jam keʼe alo dôé e ñyemane wom,

² nalé wo ye baʼale mbamba mfasane mam a nalé ate biyaé biôé bia ye baʼale ñyemane mam.

³ Amu biyaé bi éza minga bia lene wôé, a nkobô wé ô nʼévôvoé a dañe mbon;

⁴ vʼasuʼulan, nkobô te ô nʼayô avalʼanʼôvuta, ô too fʼakab ane nkpwaté mekôn ô bili meyo mebaé.

⁵ Mebo mé ma lumbu awu; medaa mebo mé ki ma kui e vôme ya miñwuan.

⁶ A ne teke tôñe zene yʼényiñ, mezene mé ma jañ émiene teke yeme nalé;

⁷ ajô te vôʼôlaʼan ma éyoñe ji a bone bam, a te mia liʼi minkobô yʼanyu dam.

⁸ Tindiʼi nye ôyab e zene jôé, a te subu mbé ya nda jé bebé.

⁹ Ô za kuane duma dôé e be bôte befe a kuane mimbu miôé e be njenjete môt.

¹⁰ Bikuu bi za jalé mebum a mefoʼo môé a ébuma ya njuʼu wôé ô za jaé éza nda;

¹¹ ô za viane suʼulane tat abui éyoñe nyôle jôé a minsône miôé bia ye mane tek.

¹² Ô suʼulane viane jô na: amu jé me nga vini nyeʼane avale di, a amu jé nleme wom ô nga vini melep ?

¹³ Amu jé me nga bo te vôʼôlô tyiñe beyeʼele bam, a bo te kee alo dam e be ba be mbe be lebe ma?

¹⁴ Tame ñhe yen me ntele vôm ma silibane si a me nto bebé nkôlan e vôme bôte bese ba nyiñ.

Nyekeʼe minga ya éyoñe ndômane jôé

¹⁵ Tame nyu mendime yʼanjeñe dôé, ma ma kui anjeñe womien ô nga fak.

¹⁶ Ye menjeñe mendime môé ma yiane mialane mendim atan, ye atôñe mendime dôé da yiane lôt e minjoñ?

¹⁷ Ba yiane foʼo vʼasu dôé étam, sa na mia be bikuu mi kabane be.

¹⁸ Ebotan a anjeñe mendime dôé, a minga ô nga luk ô too ésoé ndôman a boʼo jôme yʼavaʼa dôé;

¹⁹ a boʼo ngal émvule ya nyeʼan; a ngal nkok a ne njalan a mvam; nyeʼane wé ô bii wo éyoñ ése ane bilam a nyeʼane te ô bii wo nkôm.

²⁰ Ajô te, a mone wom, amu jé wo ye nyeʼe éza minga, a latane tôé ya be nneña minga?

²¹ Amu mezene me môt me bôô Zambe ôsu, a nye a tyee mimfaka mié mise.

²² Mbia môt a biliya e bikobe bié émien été, mengataʼa yʼabé dé me kaʼaya nye.

²³ A ye wu amu ayéʼé momo, a ye jañ amu abui akute mboone mame dé.