MINKANA 4 - Bible en langue Bulu

Melebe mʼésaa

¹ Vôʼôlaʼan ñyeʼelane wo so e bʼésaa a bone bam a tuʼa kee melo menan nalé mia ye yem ane mi ne bo mintyetyeñ:

² amu ma kalane mia mbamba ayéʼé: a te wuane ñyeʼelane wome fé.

³ E ne bebela na me mbe mon e bʼésaa wom, nkpwek a atyiʼi mon e fefele nyia wom.

⁴ Nde ñhe ésaa wom a mbe a yeʼele ma a jôʼô me na: nleme wôé ô baʼaleʼe mejô mam; baʼaleʼe mebendé wôna wo ye nyiñ,

⁵ nyoñe fek a nyeman, te vuane bie, nalé fe te vite mejô yʼanyu dam.

⁶ Te liʼi fek amu ja ye baʼale wo, nyekeʼe je nde ja ye lôñe wo nkaʼalé.

⁷ Nge wo kômbô bi fek, tatéʼé ve ngule ya yéʼé jôme fek é né; tabeʼe nkômane ya ve jôm ése ô bili asu ya bo ñyeme mam.

⁸ Wumuluʼu fek, éyoñe te ja ye bete wo yôp, ja ye bo duma dôé nge wo wubane je;

⁹ ja ye jalé wo ékat é nʼabeñe nlô a ve wo ékate njô bôt é nʼétôtok ane maʼan.

¹⁰ A mone wom, vôʼôlôʼô a nyoñe mejô mam; nalé ate mimbu yʼényiñe jôé mia ye bo abui;

¹¹ me yeʼeleya wo zene ya fek, me wuluya wo e mezene ya zôsôô .

¹² Nge wo wulu, teke jôm ja ye ndeñele adaa abo dôé; a nge wo mate mbi, wo ye bo te kolé;

¹³ bii ñyemane mam, te jôʼé wô; baʼaleʼe wô amu ô nʼényiñe jôé;

¹⁴ te nyiin e zene ya bôt be nʼabé, mbe ba wulu e zene mbia be bôt.

¹⁵ Saʼaleʼe je, te lôt été; kele je fefel a te fombô je.

¹⁶ Amu be nji ke ôyo te na be bo abé , be nji buti dis, te na be bo môt éziñe na a kolé ôbak;

¹⁷ amu ba nyiñ a bidi ya mboon abé , a ba nyu woone yʼévô.

¹⁸ Zene bezôsôô be bôt é ne avalʼanʼéfufube ja dañe faé;

¹⁹ zene bebo abé ki ane dibi; be ne teke yem jôm ja ye bo be na be kolé ôbak.

Tabeʼe Ntye! Te bo mvô nge tyendé

²⁰ A mone wom tukaʼa vôʼôlô mejô mam, keʼe alo dôé e minkobô miam,

²¹ mejô mete me boʼo te ke wo ôyap: baʼaleʼe me e nleme wôé été;

²² amu mejô mete me nʼényiñ e be ba ba yeme me, me too fe mvoʼé ya nyôle jab ése.

²³ Baʼaleʼe nleme wôé a dañe jôm éfe ése, amu nne menjeñ mese yʼényiñ ma so été.

²⁴ Saʼaleʼe mvôle nkobô ése ja so anyu, a akute nkobô ya biyaé fe e tebeʼe wo ôyap.

²⁵ Mise môé ma yiane lôbô vʼôsu fombôʼô zôsôô vʼôsu viôé

²⁶ tyee mfaka, wo zu lôt a mezene môé mese me boʼo mbamba nkôman.

²⁷ Te yale li nge li nalé fe te telé abo dôé e vôm abé e né.