MINKANA 31 - Bible en langue Bulu

Melep ma yiane Njô Bôt

¹ Melep me Lemuél njô bôte ya Masa a nga nyoñe be nyia wé.

² Ma ye jô wo aya a mone wom? Ma ye jô wo aya a mone yʼabume dam? Ma ye jô wo aya a mone ya mintiñetane miam?

³ Te kuane ngule jôé e be binga, a mezene môé e be ba ba jañele bejô bôt.

⁴ Jame te e nji bo di bejôô, a Lemuél, e nji bo di bejôô bôte na be nyu woon nge di bone bejô bôte na be jeñe binyunyui bi ne ngu.

⁵ Be za vuane metiñ nge be mane nyu, a bo te tyiʼi ajô bingôngole bi bôt zôsôô .

⁶ Vaʼane nyô a ntoo bebé ya wu binyunyui bi ne ngu, a woon e be nyô a bili ôlune nlem .

⁷ A nyaʼak a vuan azoé dé, éyoñe te a ye bo te beta simesane njuʼu wé.

⁸ Kuʼi anyu dôé asu mvumvuk, asu ajô ya ba bese be liʼiya éto éngôngo.

⁹ Kuʼi anyu dôé, tyiʼi mejô zôsôô , kamaʼan ajô éngôngole môt a ajô nzôzoé .

Minga a nʼédima

¹⁰ Za a ne yene minga a yian? Tañe jé ja dañe nyô mekoʼo me nʼédima beta ndañan:

¹¹ nleme nnôm ô too nye ndi, a nseñge wo ye bo te jemban,

¹² e melu mese yʼényiñe jé. A bo nnôme mvaé sa abé .

¹³ A jeñe mimvote betit a sut a tiñe biyé a mevak.

¹⁴ A funane sitima a litan akum a soo bidi ôyap,

¹⁵ a kôlô si dibi e ngenan, a ve bôte ya nda jé bidi, a kabe bebo bisaé be binga bé bisaé,

¹⁶ a fas ajô ya afub éziñ a kuse de; a bé afube mindik a maʼane yʼésaé jé.

¹⁷ A tiñeti ngu angeteñ dé ane kandé, a a ve mo mé ngu.

¹⁸ A wôʼôtane na maʼane mé me ne mvaé; lambe wé a ne te dim a alu.

¹⁹ A nyoñ ôlé ba diñe minsiñga ya tiñe biôm a anyu dé da bi mbôbé minsinga.

²⁰ A kui mo mé asu éngôngole môt, a ve nzôzoé biôm.

²¹ A nji ko avebe woñ asu nda jé, amu bôte ya nda jé ése be beʼe ngômesan é nʼayôñ.

²² A tiñ mimfinga, a bili mengômesan me nʼéfumulu abui a évele.

²³ Nnôm a bili ésemé e mimbé yʼakak éyoñe ba bemvendé ya nlam be too vôm ba kobô mejô.

²⁴ A loé be mengômesan a kuane me, a kôme bekandé a ve bekuan abom ba bo makit;

²⁵ ngu a éjijin bi ne nye ngômesan; a simesane mam yʼakiti a vioé ôse anyu.

²⁶ A kui anyu a fek, ôyeme wé wo yeʼele a évôvoé ése.

²⁷ A tuʼa fombô ane mame ya nda jé ma wulu, a ne te di bidi bi éles.

²⁸ Bone bé ba kôlô si a jô nye na a nʼébotan; nnôme wé fe a kôlô si a seʼe nye na:

²⁹ abui bengon be binga e too mbamba ntaban, ve wo wo dañe bese.

³⁰ Ejijin ja duk , abeñ ki momo jôm; ve minga a ko Zambe woñ nye ba ye sek.

³¹ Vaʼane nye maʼane ya ésaé jé, a e mimbé akak, mimboone mié mia yiane ve nye duma.