MINKANA 30 - Bible en langue Bulu

Mejô mʼAgur

¹ Mejô mʼAgur, e mone Yaké. Mejô me môt ate asu Itiél, asu Itiél a Ukal.

² E ne bebela na ma me ne tit a dañe môte mfe ase, a feʼe môt ja jeñebane be ma;

³ me nji ke yéʼé fek a me nji yeme mam ma fombô Zambe.

⁴ Za a nga bete yôp nge so wé? Za a nga bi évuñulu e menyiʼi me mo mé été? Za a nga late mendim e ngômesan éziñ été? Za a nga telé minné mise ya si? Jôé dé e ne za a jôé mone wé ke za, nalé wo ye yeme de?

⁵ Ajô Zambe ese e ne mveʼelan. Emien a nʼében asu ba ba sobô be nye.

⁶ Te beté jôm éziñ e mejô mé, a za komekane wo a ô za yené nlaa minsos.

⁷ Ma sili wo mam mebaé: te bene ma me, nté me ngenane te wu!

⁸ Boʼo na meduʼan a nkobô minsos bi ke ma ôyap; me nji kômbô bo azoé nge kum vaʼa ma ve bidi bia yiane ma.

⁹ Me za kate wo éyoñ abum é ntoo ma nlem; a me za jô na: Za a ne Zambe? Nge wup éyoñ azoé e biya ma. A ndamane jôé Zambe wom.

¹⁰ Te bôte mbo ésaé mejô e be masa wé, a za yoʼé wo a ô za beʼe mekua.

¹¹ Bôte bʼéziñ ba yoʼé bʼésaa, be too fe teke botane benyia.

¹² Bôte bʼéziñ ba buni fe na be ne mfuban e mise mabe bebien, be too fe teke kômbô sôbe bebien e mvine mboone jap été.

¹³ Bôte bʼéziñ be bili mise mʼébiasé, be beteʼe bivula biabe yôp.

¹⁴ Mesôñ me bôte bʼéziñ me ne minkpwaté mekôn, a minkekeʼe miap mi too atyeñ, asu ya min a bo na bingôngole bi bôt bi jañ e si nyô été, a bo fe na minzôzoé mi jañ e bôt été.

¹⁵ Môt a viʼi bôte bevok a bili bengon bebaé: vaʼak! Vaʼak! Biôm bilaa bi ne te jaé, yaa binyin bi ne te jô na: Abime te da yian!

¹⁶ Vôma miñwuan, nkôkôme minga, si teke jaé mendim a nduan é ne teke veʼele jô na: Abime te da yian!

¹⁷ E dis da kpweʼele ésaa nge biasé mewôk e bili mfaʼa nyia, bingbwañ yʼôtôñ bia ye tube dise te a bone be ndôé ba ye mine de.

¹⁸ Biôme bilaa bia dañe ma nkôñ, yaa binyin mbie ma dimi,

¹⁹ awoé ndôé e yôb été, e di nyo akoʼo yôp, awoé sitima ézezañe mañ, a awoé fam e be ngone minga.

²⁰ Minga mejian a bo mam avale di: A mane di a fimi fe biyaé, éyoñe te a jô na: Me nji ke bo abé .

²¹ Si é ne fôʼôsan amu mam mela, amu menyin é se nguleya jibi:

²² ôlo wo suʼulane jôô, akut da tuʼu bidi

²³ nlulube minga wo ke aluk, a mbo ésaé minga a tyendé minga a nga bili nye.

²⁴ Betit ba dañe tyôtyoé si nyô be ne benyin ve da mbe ba dañe fek:

²⁵ bilôñelôñelan, nsamba ô ne ngule momo, ve wo kômesane bidi bié a ésep;

²⁶ bengôm, nsamba betit ô ne fe ngule momo, ve ba bo bitabaʼa biap e mekoʼo été;

²⁷ bitandak bi nji bi njôô, ve bise bia kui atan nsamba wua;

²⁸ afaé nde ô ne nguleya bi a mo, ve e too e menda bejô bôt.

²⁹ Biôm bilaa bi nʼéjijin, bi ne binyin bi bili mbamba dulu:

³⁰ ngbwengbwem, mbene ya betite bese, nje é se nguleya mate jôm éziñ,

³¹ tite mewosan nje é bili angeteñ e ne ngu, nge nnôm ékela, a njô bôt ba nkane bezimbi wé be ne nsamba.

³² Nge mebun me veñesaneya wo akut a nge ô bili mbia bʼasimesan, butiʼi wo wôé anyu;

³³ amu mfuʼane menyañ wo ve boto, mmiatane jôé wo kuli metyi, a nsoñan ayaa wo té mintañete.