MINKANA 3 - Bible en langue Bulu

Nde nlem be Zambe

¹ A mone wom te vuane ñyeʼelane wom a nleme wôé ô tame baʼale mebendé mam:

² amu ma ye kôʼôlane nté ya melu môé, mimbu ya ényiñe jôé a mvoʼé jôé.

³ Nsemane metiñ a bebela bi boʼo te kôlô be wo, tiñetiʼi bie e tyiñe jôé. Tiliʼi bie akoʼo ya nleme wôé.

⁴ Nalé ate wo ye nyoñe mvam a nya ñwôʼane mam e mise me Zambe a bôt.

⁵ Vaʼa womiene be Zambe a nleme wôé ôse, a te buni atyeñe dôé.

⁶ E mezene môé mese été, tame meme nye, éyoñe te a ye kôme mezene môé zôsôô .

⁷ Te liti e mise môé été na ô ne fek, ve ko Zambe woñ a saʼale abé;

⁸ mvoʼé ñhe le asu nyôle jôé, a ñwônan asu bivese biôé.

⁹ Kañe Zambe a akume dôé a bembômô ya biôme wo bi;

¹⁰ éyoñe te mengune môé ma ye jaé ne lut, a befôndô bôé ba ye jaé a mfefé woon.

¹¹ A mone wom te biasé ébôme Zambe nge ko mveane bijô wé woñ;

¹² amu nyô Zambe a nyeʼe nye a ve bijô, avalʼésaa a bo e mon a nyeʼe.

Fek é ne élé yʼényiñ

¹³ Ebotan a môt a someya fek, nalé fe môt a yeme fas,

¹⁴ amu mfi fek ja ve ô ne mvaé a dañe wu argent, a akume da so fek da dañe or;

¹⁵ fek é ne dia a dañe mekoʼo me nʼédima, a biôme bise ya minkômbane miôé bi nji ke bo ane je.

¹⁶ Ayab ényiñ é ne nye mbo nnôm; akum a duma ki mbo ngale wé.

¹⁷ Mezene mé me ne mezen me ne mvaé a mezene mé mese ma soo mvoʼé;

¹⁸ fek é ne élé yʼényiñ e be ba ba bi je. A ba ba baʼale je be ne njalan a mevak.

¹⁹ Nti Zambe a nga belane fek éyoñ a nga té si, a nga belan atyeñ éyoñ a nga yemete yôp;

²⁰ beyee be nga kuiban a ñyemane mame wé, ñyemane mame wé ñwô fe minkut mia miase mveñ.

²¹ A mone wom baʼaleʼe fek a mfasane mam te kañese na bi ke wo ôyap.

²² Bia ye bo ényiñe ya nsisime wôé, a mvame ya tyiñe jôé.

²³ Eyoñe te wo ye wulu e zene jôé a ndi ése, a abo dôé da ye bo te kolé ôbak;

²⁴ nge wo bômbô si, wo ye bo te ko woñ; a éyoñ ô mbôô si wo ye ke mbamba ôyo.

²⁵ Te ko woñ toʼo na jame ya ko woñ da so atemetem, toʼo mewosane bebo abé éyoñe ma so.

²⁶ Amu Zambe a ye bo nyô ô too nye ndi a a ye kaman abo dôé mfaʼa ya ôlam ôse.

Zambe a botan e môt a nyeʼe nyô mbok

²⁷ Te bene mbamba jame ya bo e be ba ba yiane nye, éyoñ ô bili ngule ya bo nye bôt.

²⁸ Te jô môte mia nye mi too na: kelek ô betaʼa zu. Nge na a akiti ma ye ve wo! Eyoñ ô bili jôme ya ve nye.

²⁹ Te bôndé môte mboʼo mbia jam, éyoñ a too wo fefele ne mieññ.

³⁰ Te jeñe môte mejô te na a te bo wo mbia jam.

³¹ Te nyamete môt a nʼévô, a te tobe jia ya mezene mé.

³² Amu Zambe a yen ékotekote môt mbia jôm, ve nyeʼane wé ô ne be bôt be ne zôsôô;

³³ biyoʼé bi Zambe bi ne e ndaa môt a ne nkpwala , ve a botane ndaa bôt be ne zôsôô .

³⁴ A nji bisi bekpweʼele bôt ve a mvamane ba ba suu bebiene si.

³⁵ Mimfefek mia ye nyoñe duma ane ngap, ve mekute ki ma ye nyoñ ébiasé nnen ane ngap.