MINKANA 29 - Bible en langue Bulu

¹ Môt ase a bo na be komekaʼane nye ve nye ki a boʼo ntip, a ye buʼuban atemetem teke mebala.

² Eyoñe ngu é ne e mo bezôsôô be bôt, bôte bese ba vak, vʼéyoñe mbo abé a bili éjôé bôte bese ba tat.

³ Nyô a nyeʼe fek, ésaa wé a ne mevak; ve nyô a yeñ a binga bʼébamba a dimili akume dé.

⁴ Njô bôt a belane zôsôô a telé si jé, ve nyô a nʼôzañ mfaʼa nsilane betoya, a ye kuli azoé e si jé.

⁵ Nyô a duʼu e môte mbok a yaa avot e mebo mé si.

⁶ Olam ô ne e mboone mbia môte si, ve zôsôa môt a fôn a mevak;

⁷ zôsôa môt a yem ajô mintetek, ve mbia môt a nji bi feʼe ya yeme de.

⁸ Bekpweʼele bôt ba tyaʼa nduan e tison été, ve mimfefek mia vôôn ayaa e bo te kui été.

⁹ Ye wo yem éyoñe mfefek ô bili ajô a akut? Toʼo mfefeʼe te wo yaa nge woé, wo ye bo teke bi awoʼon.

¹⁰ Bekuli metyi ba vini zôsôa môt, ve bezôsôô be bôt ba kaman ényiñe jé.

¹¹ Akute môt da kulan ayaa dé ese, ve mfefek wo jéʼé ayaa te éyoñ wo solé de.

¹² Njô bôt, a tame ñhe veʼele vôʼôlô nkobô minsos, wôna bivete bié bise bia ye yaa.

¹³ Nzôzoé ba mvômvô ba tôban, ve Zambe nye a ve bebaane éfufube mis.

¹⁴ Njô bôt a tyiʼi minteteʼe mi bôt mejô zôsôô , a ye yen anʼéto njôane jé ja yem éyoñ ése.

¹⁵ Nkasa a minkomekan bia ve fek, vʼésoé ndôman ja yeñ a ébien ja ve nyia ôson.

¹⁶ Eyoñe mbia be bôt be bili éjôé abé da bo abui, ve bezôsôô be bôt ba ye bo bengaa ya nkuane wop.

¹⁷ Vaʼa nyô mone melep wôna nleme wôé wo ye bômbô si, a mon ate a ye jalé wo a mefok.

¹⁸ Eyoñe ñyenane mam ô ntoo momo, bôt be nʼéyoñe te teke fe jôm ja telé be. Ve nyô a baʼale metiñ, a ne njalan a mevak!

¹⁹ Be ne te lebe mbo ésaé a mejô yʼanyu amu a ye wôk ve te bo.

²⁰ Ye ô yeneya foʼo môt a ne avôle ya kobô? Ke a nye a akut ô viane buni akut.

²¹ Mbo ésaé ba te dañe voñôlô aso mongô a viane suʼulane buni na a ntoo mon.

²² Môt a ne mbia nlem a tyaʼa mintañete, a nyô a wôʼôlun a bo abui mbia be mam.

²³ Mebune me môt ma kee nye ôsame ve nyô a ne njeʼebane nlem a ye nyoñe duma.

²⁴ Nyô ba ñwuwup ba kabane biôm a vini émien, a ye nyoñe melep nge a kobô bebela aba mejô; a Zambe a ye yoʼé nye nge a bo te kobô bebela.

²⁵ Woñ, e mise me bôt ô ne ôlam, ve nyô a too ndi be Zambe jôm é ne teke nye bo.

²⁶ Bôt abui ba jeñe mvolan e be nyô a jôô, ve jôm é ne ji môt ja so be Zambe.

²⁷ Ekotekote môt é ne mbia jôm e be bezôsôô be bôt, a nyô zene jé é ne zôsôô a ne mbia jôm e be mbo abé .