MINKANA 28 - Bible en langue Bulu

¹ Mbo abé a tup te na môt éziñ a tôñe nye mvus, bezôsôô be bôt be bili ndi minlem anʼétoñe ngbwengbwem.

² Eyoñe si éziñ é nyiineya e nzametaʼan été, bivet bi nʼabui, vʼéyoñe môt a ne fek a ñyeman a tebeya mam ma ke vʼôsu.

³ Nzôzoé môt wo tibili bingôngole bi bôt, wo funane ndula mveñ, e jame da tôñe valé e ne na njembane bidi.

⁴ Ba ba liʼi metiñ ba seʼe mbo abé ve ba ba baʼale me ba wosane nye.

⁵ Mbia be bôt be ne te wôʼô nya ntyiʼane mejôô ve ba ba jeñe Zambe ba wôʼô mam mese.

⁶ Nzôzoé wo wulu e zôsôô été ô ne mvaé, a dañe nkukume ñwô mezene mé me nʼékotekot.

⁷ Nyô a baʼale metiñ a ne mon a ne fek, ve nyô a yeñ a bebo ébamba a woʼo ésaa ôsone nyô.

⁸ Nyô a kôʼôlan akume dé zene ya nsenge a nyoñan abet a kôane biôm bite asu nyô a ko bingôngole bi bôt éngôngo.

⁹ Nge môt éziñ a vôôn alo te kômbô wôʼô metiñ, meyeʼelane mé mebien me ne angônda mbia jam.

¹⁰ Nyô ase a tindi bezôsôô be bôt e mbia zen , a ku ébé émien a nga fak, ve bezôsôô be bôt be bili maʼa ane élik.

¹¹ Nkukum ô ne fek e mise mé émien ve nzôzoé wo yeme fas ô ne kulane nye.

¹² Eyoñe bezôsôô be bôt ba dañ, jame te e ne beta duma, éyoñe mbia be bôt ba betebane yôp, môt ase a sobô.

¹³ Nyô ase a solé bikobe bié a se nguleya ke ôsu, ve nyô a meme bie a liʼi bie a yene mvam .

¹⁴ Ebotan a môt a ko woñ éyoñ ése, ve nyô a bo nleme wé ayet a ye ku minjuʼu été.

¹⁵ Mbia môt a bete bingôngole bi bôt e nlô yôp a ne e ngbwengbwem ja bam a e urs a wôʼô zaé.

¹⁶ Ntebʼôsu a nji bi fek a bo mam mʼétibelaʼa abui abui, ve nyô a vini maʼan me nʼékotekot a kôʼôlane melu yʼényiñe jé.

¹⁷ Môt a beʼe metyi me môte mbok a tub a kui ébé soñ: môt a boʼo te telé nye!

¹⁸ Nyô a wulu e zôsôô été a ye nyiiban, ve nyô a tôñe mezene mebaé me too ékotekot a ye ku e zene jia yʼété.

¹⁹ Nyô a bo ésaé e si jé a ye jaé a bidi, ve nyô a tôñesane zezé mam a ye jaé a azoé.

²⁰ Zôsôa môt a ye jaé a bibotan, ve nyô a nʼôjejaʼa ya bo kum, ba ye bo te nyoñe nye ane nyô a ne te bijô.

²¹ Nsemane mingum mi bôt ô nji bo mvaé, avale fe ane nyô a wôé môt amu ôfufus adi.

²² Môt a bili mise minyamete a jiʼa wua émien njeñan akum été, ve a ne te yeme na azoé da ye kui be nye.

²³ Nyô a bamé môt a suʼulane yene mvam abui, a dañe nyô a bili ôyeme meduʼan.

²⁴ Nyô a wub ésaa ba nyia biôm a jôʼô na: E nji bo mbia jam! Baa môt a bo ésaé ya tyam be ne nsamba wua.

²⁵ Nyô a bili ndam asimesan a ne mbôé mintañete, ve nyô a vʼémiene be Zambe a ne mefoʼo été.

²⁶ Nyô a buni émien a nʼakut, ve nyô a wulu a fek a ye kôtéban.

²⁷ Nyô a ve minzôzoé biôm a ye bo te kui ôsame, ve nyô a dime mis e be minzôzoé a ye nyoñ abui biyoʼé.

²⁸ Eyoñe bebo abé ba betebane yôp, môt ase a sobô, a éyoñ ba wu, bezôsôô be bôt ba bo abui.